អភិបាល​ខេត្តកំពង់ស្ពឺ​ ប្រកាស​ដកហូតដី​ព្រៃឈើ​ជិត​​​៨​ រយ​ហិកតា​នៅស្រុក​ឱរ៉ាល់​យកមក​គ្រប់គ្រង

លោក វ៉ី សំណាង អភិបាលខេត្តកំពង់ស្ពឺ នៅថ្ងៃទី ២០ ខែមករា ឆ្នាំ ២០២២ បានប្រកាសបដិសេធ និងដកហូតដីព្រៃឈើក្នុងដែនជម្រកសត្វព្រៃភ្នំឱរ៉ាល់ជិត ៨ រយហិកតា (៧៨៤) នៅស្រុកឱរ៉ាល់យកមកគ្រប់គ្រងជារបស់រដ្ឋវិញ។

តាមដីការបស់រដ្ឋបាលខេត្តកំពង់ស្ពឺសម្រេចថា ” ត្រូវបានប្រកាសបដិសេធ និងដកហូតដីព្រៃឈើដែលទទួលរងនូវការកាប់គាស់រុករាន ទន្ទ្រានយកដីព្រៃរបស់រដ្ឋដើម្បីវាតយកដីធ្វើកម្មសិទ្ធដោយខុសច្បាប់ លើទីតាំងដីចំនួន ពីរកន្លែង ដែលមានផ្ទៃដីសរុប ៧៨៤ ហិកតា ស្ថិតក្នុងដែនជម្រកសត្វព្រៃភ្នំឱរ៉ាល់ ត្រង់ចំណុចភូមិត្រាង និងភូមិចំបក់ ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ”៕