ព័ត៌មានជាតិ
ទេសរដ្ឋមន្រ្តី លី ធុជ ចូលរួមពិធីទិវាជាតិអូស្ត្រាលី រំលឹកខួបលើកទី៧០ កម្ពុជា-អូស្ត្រាលី
ក្នុងនាមរាជរដ្ឋាភិបាល និងប្រជាជនកម្ពុជា លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន នៅល្ងាចថ្ងៃទី ២៦ ខែមករា ឆ្នាំ ២០២២ បានអញ្ជើញចូលរួមជាភ្ញៀវកិត្តិយស ក្នុងពិធីប្រារព្ធទិវាជាតិអូស្ត្រាលី រំលឹកខួបលើកទី៧០ នៃការបង្កើតទំនាក់ទំនងការទូតជាផ្លូវការរវាងកម្ពុជា និងអូស្ត្រាលី នៅនិវេសដ្ឋានឯកអគ្គរដ្ឋទូតអូស្រ្តាលីប្រចាំនៅរាជធានីភ្នំពេញ។
លោកទេសរដ្ឋមន្រ្តី បានលើកឡើងអំពីទំនាក់ទំនងការទូតជាប្រវត្តិសាស្រ្ត ភាពជាដៃគូ និងកិច្ចសហប្រតិបត្តិការយ៉ាងជិតស្និទ្ធ រវាងរដ្ឋាភិបាល និងប្រជាជននៃប្រទេសទាំងពីរ ដែលបានកសាងឡើងតាំងពីឆ្នាំ១៩៥២ ហើយទំនាក់ទំនងនេះ បានបង្កើតនូវមូលដ្ឋានគ្រឹះយ៉ាងរឹងមាំសម្រាប់កិច្ចសហប្រតិបត្តិការ និងការផ្តល់ផលប្រយោជន៍គ្នាទៅវិញទៅមក រវាងប្រជាជាតិ និងប្រជាជននៃប្រទេសទាំងពីរ។
លោកទេសរដ្ឋមន្រ្តី បានរំលឹកឡើងផងដែរ នូវការតស៊ូមតិដ៏មុះមុតរបស់ប្រទេសអូស្ត្រាលី សម្រាប់ដំណើរការស្វែងរកសុខសន្តិភាពនៅកម្ពុជានៅចុងទសវត្សរ៍ឆ្នាំ១៩៨០ និងដើមទសវត្សរ៍ឆ្នាំ១៩៩០ រួមទាំងការដើរតួនាទីនាំមុខក្នុងអំឡុងពេលបេសកកម្មរបស់អង្គការសហប្រជាជាតិនៅកម្ពុជា (UNTAC)។ ចាប់តាំងពីពេលនោះមក អូស្ត្រាលីបានបន្តផ្តល់នូវជំនួយសប្បុរសធម៌ដល់កម្ពុជា ដើម្បីគាំទ្រដល់ការអភិវឌ្ឍលើវិស័យផ្សេងៗដូចជា ការអប់រំ សុខាភិបាល អភិបាលកិច្ច ហេដ្ឋារចនាសម្ព័ន្ធ និងកសិកម្ម ដែលជាការរួមចំណែកដល់ការគាំទ្រសន្តិភាព ស្ថិរភាព និងការអភិវឌ្ឍប្រកបដោយចីរភាពរបស់កម្ពុជា។
លោកបន្តទៀតថា ទោះបីជាប្រទេសទាំងពីរប្រឈមមុខនឹងបញ្ហាជាច្រើនក៏ដោយ ក៏ទំនាក់ទំនង និងកិច្ចសហប្រតិបត្តិការយ៉ាងជិតស្និទ្ធរបស់ប្រទេសទាំងពីរ បានបន្តពង្រឹងលើគ្រប់វិស័យ រាប់ចាប់ពីការអភិវឌ្ឍ នយោបាយ សន្តិសុខ និងសេដ្ឋកិច្ចសង្គម ជាដើម។
ថ្មីៗនេះ ក្នុងកិច្ចខិតខំប្រឹងប្រែងរួមគ្នា ដើម្បីប្រយុទ្ធប្រឆាំងនឹងជំងឺរាតត្បាតកូវីដ-១៩ ដែលមិនធ្លាប់មានពីមុនមក កម្ពុជា បានវាយតម្លៃខ្ពស់ចំពោះប្រទេសអូស្ត្រាលី ដែលផ្តល់ជំនួយប្រមាណ ៦០លានដុល្លារក្នុងមួយឆ្នាំដល់កម្ពុជា ដើម្បីពង្រឹងសន្តិសុខ សុខភាព ការការពារសង្គម ហេដ្ឋារចនាសម្ព័ន្ធ និងការស្តារសេដ្ឋកិច្ចឡើងវិញ។
លើសពីនេះ រាជរដ្ឋាភិបាលកម្ពុជា សូមវាយតម្លៃខ្ពស់ចំពោះភាពជាដៃគូរបស់រដ្ឋាភិបាលអូស្ត្រាលី ក្នុងការជួយបង្កើតផែនការឆ្លើយតបនឹងកូវីដ-១៩ នៅកម្ពុជា ឆ្នាំ ២០២០-២០២២ ក្នុងគោលបំណងកាត់បន្ថយផលប៉ះពាល់សង្គម និងសេដ្ឋកិច្ចពីជំងឺកូវីដ-១៩ ព្រមទាំងបានផ្តល់វ៉ាក់សាំង Pfizer-BioNTech ចំនួន ២.៣៥ លានដូស ដែលជាការឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រដ្ឋាភិបាលអូស្ត្រាលី ក្នុងការគាំទ្រកម្មវិធីវ៉ាក់សាំងជាតិរបស់កម្ពុជា។
លោកបានបញ្ជាក់បន្ថែមថា ដោយឡែក សម្រាប់វិស័យសកម្មភាពមីននៅកម្ពុជា ប្រទេសអូស្ត្រាលី គឺជាដៃគូអភិវឌ្ឍន៍ដ៏លេចធ្លោមួយ ដែលបានបរិច្ចាគថវិកាប្រមាណជាង ១០០ លានដុល្លារអូស្ត្រាលី ចាប់តាំងពីឆ្នាំ ១៩៩៤ ដែលទឹកចិត្តសប្បុរសរបស់រដ្ឋាភិបាល និងប្រជាជនអូស្ត្រាលី រួមជាមួយនឹងម្ចាស់ជំនួយផ្សេងទៀត បានចូលរួមជួយសង្រ្គោះដល់អាយុជីវិតប្រជាជនកម្ពុជាជាច្រើន កាត់បន្ថយចំនួនពិការភាព និងកាត់បន្ថយផ្ទៃដីមានការគម្រាមកំហែងដោយសារមីន។
ក្នុងនាមកម្ពុជាជាប្រធានអាស៊ានឆ្នាំ២០២២ កម្ពុជាបានត្រៀមខ្លួនរួចជាស្រេចដើម្បីធ្វើការយ៉ាងជិតស្និទ្ធជាមួយរដ្ឋសមាជិកអាស៊ាន និងអូស្ត្រាលី ក្នុងការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយរវាងអាស៊ាន និងអូស្ត្រាលី ដើម្បីជំរុញទំនាក់ទំនងកាន់តែទូលំទូលាយ និងផ្តល់ផលប្រយោជន៍ទៅវិញទៅមក ក៏ដូចជាថែរក្សាសន្តិភាព សន្តិសុខ វិបុលភាព និងការអភិវឌ្ឍប្រកបដោយចីរភាពក្នុងតំបន់។
ក្នុងឱកាសនោះ ក្នុងនាមរាជរដ្ឋាភិបាលកម្ពុជា លោកទេសរដ្ឋមន្រ្តី បានបញ្ជាក់ជាថ្មីនូវការប្តេជ្ញាចិត្តដ៏មុតមាំរបស់កម្ពុជា ក្នុងការធ្វើការយ៉ាងជិតស្និទ្ធជាមួយប្រទេសអូស្ត្រាលីក្នុងក្របខ័ណ្ឌទ្វេភាគី និងពហុភាគី ដើម្បីជំរុញទំនាក់ទំនងស្និទ្ធស្នាល និងកិច្ចសហប្រតិបត្តិការប្រកបដោយផ្លែផ្ការវាងប្រទេសយើងទាំងពីរ ដែលនាំមកនូវផលប្រយោជន៍ទៅវិញទៅមកសម្រាប់ប្រជាជាតិទាំងពីរ និងតំបន់៕
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍១១ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore