ព្រឹកនេះ សម្តេចតេជោ ហ៊ុន សែន អញ្ជើញទទួលវ៉ាក់សាំង៣០ម៉ឺនដូសពីប៉ូឡូញ

នៅព្រឹកថ្ងៃទី៣០ខែមករា ឆ្នាំ ២០២២ សម្តេចអគ្គមហាសេនាបតីតេជោ ហ៊ុន សែន នឹងអញ្ជើញទទួលវ៉ាក់សាំងបង្ការជំងឺកូវីដ១៩ ប្រភេទអាស្ត្រាហ្សេនីកាចំនួន ៣០ ម៉ឺនដូសដែលជាជំនួយរបស់រដ្ឋាភិបាល និងប្រជាជនប៉ូឡូញជូនចំពោះរាជរដ្ឋាភិបាល និងប្រជាជនកម្ពុជានៅទីស្តីការគណៈរដ្ឋមន្រ្តី ។

វ៉ាក់សាំងអាស្ត្រាហ្សេនីកាចំនួន ៣០ ម៉ឺនដូសដែលជាជំនួយរបស់រដ្ឋាភិបាល និងប្រជាជនប៉ូឡូញត្រូវ បានដឹកមកដល់កម្ពុជាកាលពីយប់ថ្ងៃទី ២៩ ខែ មករា ២០២២។ មកដល់ពេលបច្ចុប្បន្ន កម្ពុជាទទួលបានវ៉ាក់សាំងបង្ការជំងឺកូវីដ១៩សរុបជាង ៤៣លានដូស​ហើយ។ ក្រៅពីការបញ្ជាទិញរបស់រាជរដ្ឋាភិបាលកម្ពុជាដោយផ្ទាល់ កម្ពុជា ទទួលបានវ៉ាក់សាំងបង្ការកូវីដ១៩ ដែលជាជំនួយពីប្រទេសជាមិត្តតាមរយៈយន្តការទ្វេភាគី និងតាមរយៈយន្តការរបស់មជ្ឈមណ្ឌលកូវ៉ាក់ផងដែរ។

វត្តមានវ៉ាក់សាំងដ៏ច្រើនសន្ធឹកនេះ បានធ្វើឱ្យកម្ពុជាសម្រេចការចាក់វ៉ាក់សាំងជូនប្រជាពលរដ្ឋបានយ៉ាងឆាប់រហ័សមុនផែនការកំណត់។ របាយការណ៍ចាក់វ៉ាក់សាំងរបស់ក្រសួងសុខាភិបាល បានបង្ហាញថា គិតត្រឹមថ្ងៃទី២៩ ខែមករា ឆ្នាំ២០២២ កម្ពុជាសម្រេចបានការចាក់វ៉ាក់សាំងសរុប១៤,៣៥១,៨០៥ នាក់ ។

តាមរយៈការចាក់វ៉ាក់សាំងជូនប្រជាពលរដ្ឋបានលឿនរហ័សនេះ ធ្វើឱ្យសង្គមកម្ពុជាបង្កើតបានភាពស៊ាំបូករួមនឹងការបន្តប្រកាន់ខ្ជាប់នូវការអនុវត្តវិធានការសុខាភិបាលផងនោះ កម្ពុជាកាត់បន្ថយបានការឆ្លងរាតត្បាតមេរោគប្រកបដោយប្រសិទ្ធភាពខ្ពស់ ហើយបានបើកសកម្មភាពសង្គមសេដ្ឋកិច្ចគ្រប់វិស័យឡើងវិញកាលពីខែវិច្ឆិកា ឆ្នាំ២០២១  ៕

អត្ថបទ៖ ណារី