ព្រះមហាក្សត្រ យាងចូលរួមពិធីបើកព្រឹត្តិការណ៍ ប្រកួតកីឡាអូឡាំពិករដូវរងា នៅទីក្រុងប៉េកាំង

ដូចការគ្រោងទុក នៅព្រឹកថ្ងៃទី ៣ ខែកុម្ភៈ ឆ្នាំ ២០២២នេះ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានយាងចាកចេញពីប្រទេសកម្ពុជា ដើម្បីចូលរួមពិធីបើកព្រឹត្តិការណ៍ ប្រកួតកីឡាអូឡាំពិករដូវរងា នៅទីក្រុងប៉េកាំង ប្រទេសចិន។

យាង និងអញ្ជើញ ជូនព្រះរាជដំណើរ ព្រះករុណា ព្រះមហាក្សត្រ នៅឯអាកាសយានដ្ឋានអន្តរជាតិភ្នំពេញ មានព្រះរាជវត្តមាន និងវត្តមាន សម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចអគ្គមហាពញាចក្រី ហេង សំរិន ប្រធានរដ្ឋសភា, សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងមន្ត្រីជាន់ខ្ពស់នៃរាជរដ្ឋាភិបាលកម្ពុជា ជាច្រើនរូបទៀត។

សូមជម្រាបថា ពិធីបើកព្រឹត្តិការណ៍ ប្រកួតកីឡាអូឡាំពិករដូវរដូវរងា នៅទីក្រុងប៉េកាំង ប្រទេសចិន គឺចាប់ផ្ដើមពីថ្ងៃទី ៤ ដល់ទី ២០ ខែកុម្ភៈ ឆ្នាំ ២០២២។ គុណតម្លៃរបស់កីឡាអូឡាំពិកនេះ ត្រូវបានប្រជាជន និងប្រទេសចិនគោរព និងអនុវត្តយ៉ាងខ្ជាប់ខ្ជួន ដើម្បីលើកកម្ពស់តម្លៃរួមរបស់មនុស្សជាតិ ដែលជាពិសេស កីឡាអូឡាំពិករដូវរងា ២០២២នេះ គឺជាតឹក តាងបញ្ជាក់កាន់តែប្រ័ត្យក្សបន្ថែមទៀតថា នេះជាវេទិកាកីឡា ដែលបានចូលរួមចំណែកយ៉ាងសកម្ម ដល់ការកសាង សហគមន៍រួម ជោគវាសនាមនុស្សជាតិ។

នេះ មិនមែនជាលើកដំបូង នៃការអនុវត្តយ៉ាងខ្ជាប់ខ្ជួន នូវស្មារតីរបស់កីឡាអូឡាំពិករដូវរងានោះទេ។  ប៉ុន្តែប្រទេសចិន ធ្លាប់បានធ្វើជាម្ចាស់ផ្ទះ ពិធីប្រកួតកីឡាអូឡាំពិករដូវក្តៅ កាលពីខែសីហា ឆ្នាំ ២០០៨ ហើយទទួលបាននូវការចាប់អារម្មណ៍ និងសាទរពីពិភពលោកទាំងមូល។ នៅឆ្នាំ ២០២២នេះ សហគមន៍អន្តរជាតិ កំពុងយកចិត្តទុកដាក់ជាងមុនលើប្រទេសចិនក្នុងកម្មវិធីដ៏មហិមានៃការធ្វើជាម្ចាស់ផ្ទះនៃកីឡាអូឡាំពិករដូវរងា ២០២២។

សូមបញ្ជាក់ថា រដ្ឋធានីប៉េកាំង គឺជារដ្ឋធានីទី ១ លើលោកដែលបានរៀបចំ ការប្រកួតកីឡាអូឡាំពិកទាំងរដូវក្តៅ និងរដូវរងា ហើយការប្រកួតកីឡាអូឡាំពិករដូវរងា នៅរដ្ឋធានីប៉េកាំង នឹងក្លាយជាការប្រកួតកីឡាអូឡាំពិក បែបបៃតងបំផុតក្នុងប្រវត្តិសាស្ត្រ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត