ព័ត៌មានជាតិ

សហគមន៍ទេសចរណ៍ និងអង្គការក្រៅរដ្ឋាភិបាល នាំគ្នាដាំកូនឈើនៅតំបន់ព្រៃលិចទឹកបឹងទន្លេសាប

បានផុស

៤ years មុន

នៅ

ថ្ងៃព្រហស្បតិ៍ ៣ កុម្ភៈ ២០២២

ដោយ

សៀមរាប ៖ សហគមន៍ទេសចរណ៍វប្បធម៌ ធម្មជាតិបឹងពារាំង សហការជាមួយអាជ្ញាធរក្រុងសៀមរាប អង្គការអហ្វហ្វាម និងអង្គការសម្ព័ន្ធភាព ដើម្បីអភិរក្សធនធានជលផល រួមទាំងស្ថាប័នពាក់ព័ន្ធជាច្រើនទៀត បាននាំគ្នាដាំកូនឈើស្ដារព្រៃឈើឡើងវិញនៅតំបន់៣ នៃតំបន់ព្រៃលិចទឹកបឹងទន្លេសាប ស្ថិតនៅសង្កាត់ជ្រាវ ក្រុងសៀមរាប ខេត្ដសៀមរាប ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក គង់ មង្គល ប្រធានសមាគម សហគមន៍ទេសចរណ៍វប្បធម៌ធម្មជាតិបឹងពារាំង លោកមានប្រសាសន៍នៅថ្ងៃទី០៣ ខែកុម្ភៈ ឆ្នាំ២០២២នេះថា កូនឈើព្រៃលិចទឹកនេះមានជាង១ពាន់ដើម បានដាំនៅលើផ្ទៃដីជាង៣ហិកតា ដែលជាការដកហូតពីជនខិលខូចលួចកាប់ទន្ទ្រានកន្លងមក។ ការដាំនេះ ក្នុងគោលបំណង ដើម្បីស្ដារព្រៃលិចទឹកឡើងវិញ ទឹកជាជម្រកត្រីពងកូននារដូវវស្សា។

លោកបានបន្ដថា កូនឈើទាំងនោះមានជាច្រើនប្រភេទ រួមមានដើមរាំងទឹក ដើមឫស្សី ដើមម្ដេញ ដើមសណ្ដាន់ ដែលជាជំនួយពីអង្គការអហ្វហ្វាមផង និងជារបស់សហគមន៍ទេសចរណ៍ផង។ លោកបានបន្ដទៀតថា សហគមន៍ទេសចរណ៍មួយនេះ នឹងបន្ដបណ្ដុះកូនឈើព្រៃលិចទឹករាប់ពាន់ដើមទៀត ដើម្បីទុកយកទៅដាំក្នុងតំបន់៣ នៃព្រៃលិចទឹកនៅតំបន់ទេសចរណ៍ធម្មជាតិបឹងពារាំងបន្ថែមទៀតនៅលើផ្ទៃដីប្រមាណ៥០ហិកតា ដែលរងការឆាបឆេះកាលពីឆ្នាំទៅមិញ។

ដោយឡែក លោក មិញ ប៊ុនលី អ្នកសម្របសម្រួលអង្គការសម្ព័ន្ធភាពដើម្បីអភិរក្សធនធានជលផល ហៅកាត់ថា(Fact ហ្វេក) លោកមានប្រសាសន៍ថា ការដាំព្រៃលិចទឹកនេះមានសារ:សំខាន់ខ្លាំងណាស់ ព្រោះព្រៃលិចទឹកជាជម្រកត្រីពងកូន ជួយកាត់បន្ថយការប្រែប្រួលអាកាសធាតុ កាត់កន្ថយការហូរច្រោះដីចូលបឹងទន្លេសាប ជម្រកសត្វស្លាប ជាពិសេសព្រៃលិចទឹកមានភាពទាក់ទាញអ្នកទេសចរផងដែរ។

លោកបានបន្ដថា អង្គការFact មានការគាំទ្រយ៉ាងខ្លាំងដែលបានសម្ដេចតេជោ ហ៊ុន សែន នាយករដ្ឋមន្ដ្រី ដកហូតដីព្រៃលិចទឹកពីជនខិលខូច ហើយធ្វើការដាំកូនឈើ ដើម្បីស្ដារព្រៃឈើឡើងវិញនេះ។ លោកស្នើឲ្យអាជ្ញាធរមានសមត្ថកិច្ច ចូលរួមទប់ស្កាត់ការនេសាទខុសច្បាប់ និងការកាប់បំផ្លាញព្រៃលិចទឹក ហើយរួមគ្នាដាំដើមឈើលិចទឹកឡើងវិញផងដែរ។

លោក ប៊ូ ម៉េងទ្រី អភិបាលរងក្រុងសៀមរាប មានប្រសាសន៍ថា ដីព្រៃលិចទឹកក្នុងតំបន់៣ ដែលបានដកហូតពីជនខិលខូចកន្លងមកនៅទូទាំងខេត្ដសៀមរាប មានចំនួនជាង ២,៤០០ហិកតា ប៉ុន្ដែរដ្ឋបាលក្រុងមានផែនការដាំស្ដារឡើងវិញជាបន្ដបន្ទាប់ នូវដើមឫស្សី ដើមរាំង គ្រាប់ត្នោត ក្នុងសង្កាត់ទាំង៧សង្កាត់ នៅលើទីតាំងជាប់បឹងទន្លេសាប ដែលបានទន្ទ្រានឈូសឆាយកាន់កាប់កន្លងមក។ លោកបន្ដថា នៅពេលដែលទឹកទន្លេសាបស្រក នឹងបន្ដដាំកូនឈើលិចទឹកបន្ថែមទៀតរហូតដល់គ្រប់ផែនការដែលរាជរដ្ឋាភិបាលបានកំណត់៕

ដោយ ៖ គឿនវេត