កម្ពុជា នឹងយកពន្ធពីក្រុមហ៊ុន Facebook និង Netflix ចាប់ពីខែមេសា តទៅ

កម្ពុជា ចាប់ផ្តើមប្រមូលពន្ធទៅពាណិជ្ជកម្មតាមអនឡាញ នៅឆ្នាំ ២០២២នេះ។ ក្រុមហ៊ុនបរទេសធំៗដែលកំពុងធ្វើពាណិជ្ជកម្មតាមអនឡាញ ដូចជាក្រុមហ៊ុន Facebook ក្រុមហ៊ុន Netflix បានទា​ក់ទងមកចុះបញ្ជីជាមួយអគ្គនាយកដ្ឋានពន្ធដារ ដើម្បីអនុវត្តបង់ពន្ធ អាករលើតម្លៃបន្ថែម (VAT)។

លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានថ្លែងនៅក្នុងកម្មវិធីពិសេសស្តីពីពន្ធលើប្រាក់ចំណូល និងព្រឹត្តិការណ៍ថ្មីៗ របស់អគ្គនាយកដ្ឋានពន្ធដារ នៅថ្ងៃទី ០៣ ខែ កុម្ភៈថា ចាប់ពីថ្ងៃទី ០១ ខែមេសា ឆ្នាំ ២០២២តទៅ អគ្គនាយកដ្ឋានពន្ធដារ នឹងចាប់ផ្តើមអនុវត្តយកពន្ធទៅលើអាជីវកម្មអនឡាញ ដូចជាក្រុមហ៊ុន ហ៊ុន Facebook ក្រុមហ៊ុន Netflix ជាដើម។ លោកបានបន្តថា មន្រ្តីពន្ធដារ បានទទួលការស្នើសុំចុះបញ្ជីពីភ្នាក់ងារក្រុមហ៊ុនទាំងនេះរួចហើយ ប៉ុន្តែដោយសារការរៀបចំមិនទាន់រួចរាល់ភាគីក្រុមហ៊ុនសុំពន្យាពេលបីខែសិន។

ទោះយ៉ាងណា កម្ពុជា មិនទាន់អាចព្យាករណ៍អំពីចំណូលពីវិស័យពាណិជ្ជកម្មតាមអនឡាញនេះបាននៅឡើយទេ។ លោក គង់ វិបុល បញ្ជាក់ថា មានតែការបង្កើតឲ្យមានច្រកទ្វារ internet Gateway ដើម្បីគ្រប់គ្រង និងពង្រឹងលើការប្រមូលពន្ធពីការធ្វើពាណិជ្ជកម្មតាមអនឡាញនេះឱ្យមានប្រសិទ្ធភាព ទើបអាចដឹងចំណូលជាក់លាក់ពីវិស័យនេះ។

អគ្គនាយកដ្ឋានពន្ធដារ បានគូសបញ្ជាក់ថា អ្នកជាប់ពន្ធអនិវាសនជន ដែលធ្វើការផ្គត់ផ្គង់ទំនិញ ឌីជីថល ឬសេវាឌីជីថល តាមប្រព័ន្ធអេឡិចត្រូនិក ឬរាល់សកម្មពាណិជ្ជកម្មតាមប្រព័ន្ធអេឡិចត្រូនិក ចូលមកកម្ពុជា ត្រូវរួសរាន់មកចុះបញ្ជីអាករលើតម្លៃបន្ថែមសាមញ្ញ (Simplified VAT Registration) ឱ្យបានរួចរាល់ មុនថ្ងៃទី០១ ខែមេសា ឆ្នាំ២០២២។

ក្នុងករណីដែលអ្នកជាប់ពន្ធអនិវាសនជន មិនបានចុះបញ្ជី ឬមិនបានមក ធ្វើបច្ចុប្បន្នភាពព័ត៌មាន ឬមិនបានដាក់លិខិតប្រកាស និងបង់ប្រាក់អាករលើតម្លៃបន្ថែម ជូនអគ្គនាយកដ្ឋានពន្ធដារឱ្យបានទាន់ពេលវេលា ត្រូវទទួលរងទោសទណ្ឌ ដូចមានចែងក្នុងច្បាប់ និងបទប្បញ្ញត្តិស្តីពីពន្ធដារជាធរមាន។

សូមបញ្ជាក់ថា ក្រុមហ៊ុន Facebook និង Netflix បានកើបលុយនៅកម្ពុជា អស់រយៈពេលជាច្រើនឆ្នាំមកហើយ ដោយមិនបានបង់ពន្ធជូនរាជរដ្ឋាភិបាល ខណៈដែលប្រជាពលរដ្ឋខ្មែររាប់លាននាក់កំពុងប្រើប្រព័ន្ធនេះ។ អត្ថបទ៖ ទួន សុផល