ព័ត៌មានជាតិ

ប្រធានមន្ទីរសាធារណការ ខេត្តព្រះវិហារ អំពាវនាវឱ្យប្រជាពលរដ្ឋវេចខ្ចប់និងទុកដាក់សំរាមឱ្យបានត្រឹមត្រូវ កុំបោះចោលតាមទីសាធារណៈ

បានផុស

៦ years មុន

នៅ

ថ្ងៃសុក្រ ១១ ធ្នូ ២០២០

ដោយ

ប្រធានមន្ទីរសាធារណការ និងដឹកជញ្ជូនខេត្តព្រះវិហារ លោក សំ លាងទ្រី បានធ្វើការអំពាវនាវ ឱ្យប្រជាពលរដ្ឋនៅខេត្តព្រះវិហារ ត្រូវមានស្មារតីទទួលខុសត្រូវក្នុងការវេចខ្ចប់ និងទុកដាក់សំរាម ឱ្យបានត្រឹមត្រូវ ចៀសវាងយកទៅបោះចោលតាមទីសាធារណៈផ្សេងៗ ខណៈដែលគំនរសំរាមជា ច្រើនកន្លែង នៅចំណុចស្ពានដងស្ទឹងស្រអែម ស្ថិតក្នុង ឃុំស្រអែម ស្រុកជាំក្សាន្ត ត្រូវបានក្រុមការ ងារថែទាំផ្លូវថ្នល់របស់មន្ទីរធ្វើការសម្អាតរួចរាល់ ក្រោយពីប្រជាពលរដ្ឋយកសំរាមទៅបោះចោលយ៉ាងអាណាធិបតេយ្យនោះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សំ លាងទ្រី បានឱ្យដឹងនៅរសៀលថ្ងៃទី១០ ខែធ្នូ ឆ្នាំ២០២០នេះថា ការចោលសំរាមនៅតាមទីសាធារណៈផ្សេងៗនេះ ក្រៅពីធ្វើឱ្យប៉ះពាល់ដល់សណ្តាប់ធ្នាប់និងធ្វើឱ្យប៉ះពាល់ដល់បរិស្ថានយ៉ាងធ្ងន់ធ្ងរហើយនោះ វាក៏បានធ្វើឱ្យប៉ះពាល់ដល់សុខភាពអ្នកធ្វើដំណើរ ក៏ដូចជាសុខភាពប្រជាពលរដ្ឋដែលរស់នៅក្បែរគំនរសំរាមនោះផងដែរ។

លោក សំ លាងទ្រី បន្តថា ក្នុងស្មារតីចូលរួមសម្អាតអនាម័យ និងបរិស្ថាន ដែលជាភារកិច្ចស្នូល របស់ប្រជាពលរដ្ឋគ្រប់ៗគ្នានោះ ក្រុមការងារថែទាំជួសជុលផ្លូវថ្នល់ នៃមន្ទីរសាធារណការ និងដឹកជញ្ជូនខេត្តព្រះវិហារ ដែលមានភារកិច្ចចម្បង គឺធ្វើការជួសជុលថែទាំផ្លូវនោះ បានស្ម័គ្រចិត្តធ្វើការបោសសម្អាតសំរាម ដែលប្រជាពលរដ្ឋយកទៅបោះចោល អស់រយៈពេលយ៉ាងយូរ នៅចំណុស្ពាន ដងស្ទឹងស្រអែមបានយ៉ាងស្អាត ធ្វើឲ្យបរិស្ថាននៅចំណុចនោះ មានភាពល្អប្រសើរឡើងវិញ។

ប្រធានមន្ទីរសាធារណការ និងដឹកជញ្ជូនខេត្តព្រះវិហារក៏បានអំពាវនាវឱ្យប្រជាពលរដ្ឋ ធ្វើការវេចខ្ចប់ទុកដាក់សំរាមឱ្យបានត្រឹមត្រូវ ពោលគឺកុំបន្តយកសំរាមទៅបោះចោលផ្តេសផ្តាស់ តាមទីសាធារ ណៈ ផ្សេងៗ ហើយលោកសង្ឃឹមថា ក្រោយពីក្រុមការងារបានបោសសម្អាតសំរាម នៅចំណុចស្ពានដងស្ទឹងស្រអែមនេះរួច សូមប្រជាពលរដ្ឋឈប់យកសំរាមទៅបោះចោល នៅទីនោះម្តងទៀត។

ជាមួយគ្នានោះលោក សំ លាងទ្រី ក៏បានថ្លែងនូវការអរគុណដល់ក្រុមការងារថែទាំ និងជួសជុលផ្លូវថ្នល់នៃមន្ទីរសាធារណការ និងដឹកជញ្ជូនខេត្តព្រះវិហារ ប្រចាំផ្លូវជាតិលេខ៦២ ដែលបានរួមគ្នាសម្អាតសំរាម នៅចំណុចខាងលើបានយ៉ាងស្អាត ជូនប្រជាពលរដ្ឋផងដែរ៕

អត្ថបទដោយ ៖ ស្រីរ័ត្ន