ក្រសួងការបរទេស និងអាជ្ញាធរខេត្តព្រះសីហនុ អះអាងថា មិនមានការជួញដូរសរីរាង្គមនុស្សនៅកម្ពុជាទេ

ក្រសួងការបរទេសតាមរយៈអ្នកនាំពាក្យ និងអាជ្ញាធរខេត្តព្រះសីហនុ​ បានអះអាងថា មិនមានការជួញដូរសរីរាង្គមនុស្សនៅក្នុងប្រទេសកម្ពុជានោះទេ។ ការអះអាងធ្វើឡើង បន្ទាប់ពីសារព័ត៌មាន Thai Examiner បានចុះផ្សាយកាលពីថ្ងៃទី១២ ខែមីនា ឆ្នាំ២០២២ថា ថា មានស្រ្តីជនជាតិថៃម្នាក់បានអះអាងថាខ្លួនបានប្រឈមនឹងគ្រោះថា្នក់នៃការជួញដូរសរីរាង្គនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជុំ សន្ទរី អ្នកនាំពាក្យក្រសួងការបរទេសកម្ពុជា បានធ្វើការបំភ្លឺព័ត៌មាននេះថា អាជ្ញាធរមានសមត្ថកិច្ចខេត្តព្រះសីហនុ បានប្រកាសបដិសេធរួចហើយថា នោះ គឺជាការលើកឡើងដោយគ្មានមូលដ្ឋានត្រឹមត្រូវពិតប្រាកដ ។ នេះបើតាមសេចក្តីបំភ្លឺរបស់អ្នកនាំពាក្យក្រសួងការបរទេសកម្ពុជានៅព្រឹកថ្ងៃទី១៣ ខែមីនា ឆ្នាំ២០២២នេះ។

បើតាមលោក ជុំ សន្ទរី ស្ថានទូតកម្ពុជាប្រចាំនៅប្រទេសថៃ ក៏បានទាក់ទងជាមួយអាជ្ញាធរមានសមត្ថកិច្ចថៃ ស្វែងរកការបញ្ជាក់លើព័ត៌មាននេះដែរ។ ប៉ុន្តែ រហូតមកដល់ពេលនេះ (ព្រឹកថ្ងៃទី១៣ ខែមីនា) ពុំទាន់ទទួលបានការបញ្ជាក់ណាមួយថា នេះជាករណីដែលបានកើតមានឡើងនៅកម្ពុជា ដូចព័ត៌មានដែលបានផ្សាយនោះឡើយ ។ ស្ថានទូតកំពុងបន្តទាក់ទងជាមួយអាជ្ញាធរមានសមត្ថកិច្ចថៃរកព័ត៌មានបន្ថែមទៀត៕

ដោយ ៖ វណ្ណ សុគន្ធា