ព័ត៌មានជាតិ

ចុះល្បាតបង្ក្រាប បទល្មើសនេសាទនៅតំបន់បឹងទន្លេសាប ដើម្បីកំណត់មុខសញ្ញា

បានផុស

៤ years មុន

នៅ

ថ្ងៃចន្ទ ២៨ មីនា ២០២២

ដោយ

កម្លាំងសមត្ថកិច្ចអន្តរក្រសួងសហការជាមួយ និងអាជ្ញាធរខេត្តសៀមរាប ធ្វើការចុះល្បាតតំបន់អភិរក្ស ដើម្បីកំណត់ទីតាំងប្រចាំការ និងឈានទៅបង្ក្រាបបទល្មើសនេសាទ នៅតំបន់បឹងទន្លេសាបនៃខេត្តសៀមរាប ឲ្យមានប្រសិទ្ធភាពខ្ពស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះល្បាតនេះដែរ ធ្វើឡើងនៅថ្ងៃទី ២៧ ខែមីនា ឆ្នាំ ២០២២ ស្ថិតនៅភូមិសាស្ត្រតំបន់ចុងឃ្នៀស និងតំបន់មាត់បឹងទន្លេសាបតាមស្រុកដទៃទៀតផងដែរ។ ពាក់ព័ន្ធនឹងករណីនេះដែរ លោកឧត្តមសេនីយ៍ តេង ច័ន្ទណាត ស្នងការនៃស្នងការដ្ឋាននគរបាលខេត្តសៀមរាប បានមានប្រសាសន៍ឲ្យដឹងនៅល្ងាចនោះថា ថ្ងៃនេះក្រុមការងារច្រមុះចុះមើលទីតាំងជាក់ស្ដែង ដែលនៅសៀមរាបយើងនេះ មានតំបន់អភិរក្សហើយក្រុមការងារថ្នាក់ជាតិលោកចុះទៅមើលទីតាំងពីរកន្លែង ដើម្បីដាក់កម្លាំងថ្នាក់ជាតិប្រចាំការនៅទីនោះតែម្តង និងត្រៀមរៀបចំផែនការដើម្បីបោសសំអាតបទល្មើសជលផលនៅលើបឹងទន្លេសាប ជាពិសេសនៅក្នុងខេត្តសៀមរាបតែម្តង ទាំងអស់ម្ដង។ លោកបន្តថា ថ្ងៃនេះយើងមិនបានចុះបង្ក្រាបបទល្មើសអីទេ គ្រាន់តែមើលទីតាំងក្នុងតំបន់អភិរក្សទាំងមូលនៃខេត្តសៀមរាប។

ប្រភពបានឱ្យដឹងថា ការចុះល្បាតនេះមានក្រុមការងារថ្នាក់អន្តរក្រសួង ដែលមានក្រសួងកសិកម្មប្រមាញ់ និងនេសាទ,ក្រសួងបរិស្ថាន,កម្លាំងអគ្គស្នងការនគរបាលជាតិ,កម្លាំងអាវុធហត្ថលើផ្ទៃប្រទេស និងអាជ្ញាធរពាក់ព័ន្ធនៃខេត្តសៀមរាបចូលរួមផងដែរ។

ទោះជាយ៉ាងនេះក្តីមហាជនសាទរទៅនឹងចំណាត់ការរបស់ប្រមុខនៃរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន ដែលបានដាក់បទបញ្ជាឲ្យអាជ្ញាធរពាក់ព័ន្ធបង្កើនការចុះបង្ក្រាបបទល្មើសនេសាទឲ្យមានប្រសិទ្ធភាពខ្ពស់ ព្រោះកន្លងទៅអ្នកប្រព្រឹត្តបទល្មើសនេសាទហាក់នៅមានលួចប្រព្រឹត្តបទល្មើសនេសាទនៅឡើយ៕

អត្ថបទ៖ កុសល