ប្រមុខដឹកនាំប្រទេសកោតសរសើរលោក គង់ វិបុល ពូកែប្រមូលពន្ធលើសផែនការ​រហូតដល់ជាង ២៤ភាគរយ

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានកោតសរសើរ និងវាយតម្លៃខ្ពស់ចំពោះលោក គង់ វិបុល និងក្រុមការងារ នៃអគ្គនាយកដ្ឋានពន្ធដារក្រសួងសេដ្ឋកិច្ច និងហិរញ្ញវត្ថុ ដែលខំប្រឹងប្រែងបំពេញការងារ ក្នុងបេសកម្មប្រមូលពន្ធដារលើសផែនការដែលបានកំណត់សម្រាប់គ្រប់គ្រងឆ្នាំ ២០២១ ចំនួន ១២៤,០២ភាគរយ នៃផែនការប្រចាំឆ្នាំ។ សម្តេចចាត់ទុកថា នេះគឺជាកំណត់ត្រាប្រវត្តិសាស្រ្តនៃការប្រមូលពន្ធ ដែលលើសផែនការរហូតដល់ ២៤,០២ ភាគរយ ស្មើនឹង ៥៣៨,៨៥លានដុល្លារ។

តាមរយៈលិខិតរបស់សម្តេចតេជោ ហ៊ុន សែន នៅថ្ងៃទី ២៤ ខែមីនា ឆ្នាំ ២០២២ បានលើកឡើងទៀតថា សមិទ្ធផលនេះ ផ្តើមចេញពីការប្រកាន់យកជំហរប្រសិទ្ធភាពនៃការដឹកនាំ ប្រកាន់យកគោលការណ៍អភិបាលកិច្ចល្អ ព្រមទាំងការខិតខំប្រឹងប្រែងប្តេជ្ញាចិត្តខ្ពស់ ប្រកបដោយឆន្ទៈមោះមុត និងស្មារតីបុរេសកម្មរបស់លោក គង់ វិបុល ក្នុងនាមជាថ្នាក់ដឹកនាំអគ្គនាយពន្ធដារ។

សម្តេចសង្កត់ធ្ងន់ថា ចំណូលពន្ធដារផ្ទៃក្នុងដែលអគ្គនាយកពន្ធដារ បានប្រមូលលើសផែនការខាងលើ ឆ្លុះបញ្ចាំងពីភាពខ្លាំងក្លានៃសេដ្ឋកិច្ចជាតិ បើទោះជាស្ថិតក្នុងកាលៈទេសៈដ៏លំបាក ដែលកម្ពុជាបាននិងកំពុងជួបប្រទះនូវវិបត្តិនៃការរីករាលដាលជំងឺកូវីដ-១៩ក្តី និងបញ្ជាក់យ៉ាងច្បាស់ពីភាពរឹងមាំ នៃឯករាជ្យភាព និងអធិបតេយ្យភាពជាតិរបស់កម្ពុជា។

តាមរយៈលិខិតដដែលសម្តេច បានថ្លែងដូច្នេះថា«ខ្ញុំសូមគាំទ្រចំពោះវិធានការនានា ដែលអគ្គនាយកពន្ធដារ បានដាក់ចេញ ដើម្បីបង្កើនប្រសិទ្ធភាព និងយតម្លាភាពនៃការប្រមូលចំណូល ពង្រឹងគុណភាពសេវាអ្នកជាប់ពន្ធ និងបន្តធ្វើទំនើបកម្មរដ្ឋបាលសារពើរពន្ធឲ្យកាន់តែមានភាពល្អប្រសើរឡើង៕