លោក ចម ប្រសិទ្ធ ជំរុញអគ្គនាយកដ្ឋានជំនាញ បន្តប្រឹងប្រែងលើការអភិវឌ្ឍអាជីវកម្ម តាមបទដ្ឋានបច្ចេកទេស

លោកបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជំរុញដល់អគ្គនាយកដ្ឋាន និងនាយកដ្ឋានមន្ទីរជំនាញទាំងអស់ បន្តប្រឹងប្រែងលើការអភិវឌ្ឍអាជីវកម្មតាមបទដ្ឋានបច្ចេកទេស ការសន្សំសំចៃថាមពល អនុវត្តឧស្សាហកម្មបៃតង ជាពិសេសការបណ្តុះបណ្តាលពង្រឹងសមត្ថភាពដល់បុគ្គលិក និងនិយោជិក ឲ្យមានចំណេះជំនាញស្របនឹងមុខសញ្ញាការងាររបស់ខ្លួនបន្ថែមទៀត លើកិច្ចការប្រចាំថ្ងៃ។

លោកបណ្ឌិត ចម ប្រសិទ្ធ បានជំរុញបែបនេះ ក្នុងពេលអញ្ជើញជាអធិបតីក្នុងកិច្ចប្រជុំត្រីមាសទី ១ រវាងសមាគម​សហ​គ្រិនស្ត្រីកម្ពុជា និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលសហការរៀបចំដោយក្រុមការងារ របស់អគ្គនាយកដ្ឋានឧស្សាហកម្ម និងអគ្គនាយកដ្ឋានសហគ្រាសធុនតូច និងមធ្យម និងសិប្បកម្ម កាលពីថ្ងៃទី ១៩ ខែមេសា ឆ្នាំ ២០២២។

គោលបំណងនៃកិច្ចប្រជុំ គឺដើម្បីអនុវត្តតាមអនុសាសន៍ណែនាំដ៏ខ្ពង់ខ្ពស់ របស់លោកបណ្ឌិតទេសរដ្ឋមន្រ្តី ចម ប្រសិទ្ធ ដែលបានកំណត់រយៈពេល ៣ខែម្ដង ដើម្បីភាគីទាំងពីរ គឺក្រសួង និងសមាគមពិភា​ក្សាអំពី​បញ្ហាប្រឈម និងសំណើដំណោះស្រាយ របស់សមាគមសហគ្រិនស្ត្រីកម្ពុជា ដែលបានចងក្រងក្នុងសៀវភៅសរបស់ខ្លួន។

លោកទេសរដ្ឋមន្រ្តី ចម ប្រសិទ្ធ បានសម្តែងការស្វាគមន៍ និងកោតសរសើរចំពោះភាពរីកចម្រើន និងធនធានមនុស្សជាស្ត្រី ដែលមានសហគ្រិនភាពដ៏ឆ្នើមនៅក្នុងក្រុមហ៊ុន សហគ្រាសរបស់ខ្លួន ហើយបានចូលរួមយ៉ាងសកម្ម ក្នុងសកម្មភាពអភិវឌ្ឍសេដ្ឋកិច្ចជាតិ។

បន្ទាប់មកអង្គពិធីបានពិភាក្សាផ្តល់អនុសាសន៍ និងផ្តល់ដំណោះស្រាយជាក់ស្តែង ទៅលើបញ្ហាចំនួន ៣ ចំណុច ដែលត្រូវបានធ្វើបទបង្ហាញ មានចែងក្នុងសៀវភៅសទី ២ និងទី ៣ របស់សមាគម។ ចំណុច បញ្ហាទាំង ៣ នោះរួមមាន៖ ទី១-បុគ្គលិកខ្វះជំនាញ និងប្រាក់ឈ្នួលខ្ពស់ ទី២-មានការលំបាកក្នុងការទទួលកម្ចីពីធនាគារ និងទី៣-ផលប៉ះពាល់ដោយជំងឺរាតត្បាតកូវីដ-១៩ លើអាជីវកម្ម។

ឆ្លើយតបនឹងបញ្ហាខាងលើ លោកបណ្ឌិតទេសរដ្ឋមន្រ្តី ចម ប្រសិទ្ធ និងថ្នាក់ដឹកនាំទទួលបន្ទុក បានធ្វើការផ្តល់អនុសាសន៍ និងដំណោះស្រាយជាក់ស្តែងជាច្រើន ដោយសង្កត់ធ្ងន់ទៅលើការអភិវឌ្ឍអាជីវកម្មតាមបទដ្ឋានបច្ចេកទេស ការសន្សំសំចៃថាមពល អនុវត្តឧស្សាហកម្មបៃតង ជាពិសេសការបណ្តុះបណ្តាល ពង្រឹងសមត្ថភាពដល់បុគ្គលិក និង​នយោជិកឲ្យមានចំណេះជំនាញស្របនឹងមុខសញ្ញាការងាររបស់ខ្លួន។ ទាក់ទងនឹងការលំបាកទទួលបានប្រាក់កម្ចីពីធនាគារ ថ្នាក់ដឹកនាំបានលើកឡើងពីការខិតខំ របស់រាជរដ្ឋាភិបាល និងក្រសួង-ស្ថាប័នពាក់ព័ន្ធ បង្កើតឲ្យមានធនាគារ SME ធនាគារអភិវឌ្ឍជនបទជាដើម ដើម្បីសហគ្រាសទទួលបានប្រាក់កម្ចីដែលមានការប្រាក់ទាប។

ចំពោះបញ្ហាផលប៉ះពាល់ដោយជំងឺរាតត្បាតកូវីដ-១៩ លើធុរកិច្ច ថ្នាក់ដឹកនាំក្រសួងជម្រាបថា កន្លងមក ក្រសួងបានទទួលជំនួយបច្ចេកទេសពីស្ថានទូតអូស្ត្រាលី តាមរយៈអង្គការ CAVAC សម្រាប់ រៀបចំវគ្គបណ្តុះបណ្តាល ស្តីពី ការលើកកម្ពស់សមត្ថភាពសហគ្រិនជាស្ត្រី តាមប្រព័ន្ធបច្ចេកវិទ្យាឌីជីថលសម្រាប់អាជីវកម្មទាំង ២៥រាជធានីខេត្ត។ ជាមួយគ្នានេះ ក៏មានការបើកវគ្គបណ្តុះបណ្តាល បច្ចេក​ទេស ដើម្បីជួយស្តារ និងលើកស្ទួយអាជីវកម្មឡើងវិញ ទៅតាមរបត់ថ្មីនៃការរីករាលដាលនៃជំងឺកូវីដ-១៩ ជាច្រើនផងដែរ។

លោកទេសរដ្ឋមន្រ្តី ចម ប្រសិទ្ធ បានសម្រេចឲ្យរៀបចំពិធីសម្ពោធសៀវភៅស ក្បាលទី ២ និងទី ៣  ដែលចងក្រងដោយសមាគម នៅថ្ងៃទី ៦ ខែឧសភា ឆ្នាំ ២០២២ខាងមុខ នៅទីស្តីការក្រសួង។ ទាក់ទងនិងការខ្វះទីតាំង សម្រាប់តាំងបង្ហាញផលិតផលស្នាដៃខ្មែរ លោកបណ្ឌិត អនុញ្ញាតឲ្យសមាគមយកផលិតផលរបស់ខ្លួន មកតាំងនៅទីតាំងទីស្តីការក្រសួង នៅពេលអគារថ្មីកំពស់ ១៨ជាន់ នឹងសាងសង់រួចនាពេលខាងមុខ។ ចំពោះវគ្គបណ្តុះបណ្តាលនានា ត្រូវខិតខំបន្តទៀតទាំងតាមប្រព័ន្ធអនឡាញ និងការចុះដល់រោងចក្រដោយផ្ទាល់៕

អត្ថបទ៖ វិមាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត