កម្ពុជា​អាច​នឹង​ចាយពេល​ ៧ ឆ្នាំ​ លើវិស័យ​ទេសចរណ៍​ ទម្រាំវិល​ទៅ​រកស្ថានភាពដូច​ដើមវិញ​

នៅក្នុង​បរិបទ​ជំងឺកូវីដ១៩​ វិស័យ​ទេសចរណ៍​គឺជាវិស័យ​ដែលរង​ផលប៉ះ​ពាល់ខ្លាំង​ជាង​គេនៅ​ក្នុង​ប្រទេសកម្ពុជា។ អត្រាប្រែប្រួលបានធ្លាក់ចុះយ៉ាងគំហុកបើប្រៀប​ធៀបមុនពេល​សម័យ​កូវីដទាំងទេសចរណ៍អន្តរជាតិ និងទេសចរណ៍ក្នុងស្រុក ខណៈសេវាកម្មជាច្រើនក៏បានបានបិទ្វារ។

លោក ឈុន មករា អគ្គលេខាធិការរង នៃគណៈកម្មការជាតិវាយតម្លៃទីក្រុងភ្នំពេញស្អាត នៃក្រសួង​ទេសចរណ៍ មានប្រសាសន៍នៅថ្ងៃសុក្រទី ២២ ខែមេសានេះថា កម្ពុជារំពឹងថា នឹងបានទេសចរណ៍​ដូចដើមវិញគឺ ៧ លាននាក់ នៅឆ្នាំ ២០២៧ ដែលវិលទៅរកស្ថានភាពដើមវិញដូចឆ្នាំ ២០១៩ មុនពេលវិបត្តិកូវីដ ដោយសារតែសកលលោកទើបតែងើបចេញ​ពីវិបត្តិ​កូវីដ​១៩ ហើយ​បន្តមកដល់នូវ​សង្គ្រាម​រុស្ស៊ី-អ៊ុយក្រែន ដែលធ្វើឱ្យប៉ះពាល់ដល់ចំណែក​ទីផ្សារទេសចណ៍​ពីអឺរ៉ុប និង​អាមេរិកមកកម្ពុជា។

​នៅឆ្នាំ ២០១៩​ មុន​ពេលមានវិបត្តិ​​កូវីដ​ កម្ពុជា​ទទួល​បាន​ទេសចរណ៍​អន្តរជាតិ​ជាង ៦ លាន​នាក់ (៦.៦០០ ០០០) ដែលរំពឹងថា នៅឆ្នាំបន្ទាប់នឹងកើនដល់ ៧ លាន​នាក់ ប៉ុន្តែដោយសារវិបត្តិកូវីដចូលមកដល់ ធ្វើ​ឱ្យ​អត្រា​ភ្ញៀវ​ទេសចរណ៍​អន្តរជាតិ​ និងទេសចរណ៍ផ្ទៃក្នុងមានការ​ប្រែប្រួល​ធ្លាក់​ចុះ​ខ្លាំង​ក្នុង​ឆ្នាំ​ ២០២០ និង​ឆ្នាំ​បន្ត​បន្ទាប់ ដែល​ធ្វើឱ្យ​ចំណូលជាតិ​ធ្លាក់​ចុះផងដែរ​។​

លោក ឈុន មករា បានឱ្យដឹងថា ចក្ខុវវិស័យ របស់ក្រសួងទេសចរណ៍ឆ្នាំ ២០២២-២០៥៥ សម្រាប់ទេសចរណ៍អន្តរជាតិ កម្ពុជារំពឹងថា នឹងទទួលបានចន្លោះពី ៦០-៧០ ម៉ឺននាក់។

លោកថ្លែងថា “ជាពិសេសទីផ្សារដែលងាយស្រួលក្នុងការយក ដូចជាទីផ្សារអឺរ៉ុប និងអាមេរិក​កើត​មានសង្គ្រាមរឿងអ៊ុយក្រែន។ ដែលយើងរំពឹងថា ពីមុនអត់​មានសង្គ្រាមយើង​យកគាត់បាន ព្រោះ​ប្រទេសទាំងអស់នោះគឺជាប្រទេស ដែលបើកមុនគេ ខណៈប្រទេស​តំបន់អាស៊ាននៅជាប់លក្ខខណ្ឌតឹងរឹង”។

​គិតត្រឹមខែកុម្ភៈ​ ឆ្នាំ ២០២២ បានត្រឹមតែ ៩ ម៉ឺន ៥ ពាន់នាក់ រយៈពេល ២ ខែ។ ទេសចរណ៍ផ្ទៃក្នុង ២ លាននាក់។

បច្ចុប្បន្ន​ទីផ្សារទេសចរណ៍ដែលសំខាន់សម្រាប់កម្ពុជា មានវៀតណាម ថៃ ជារួមទីផ្សារ​ក្នុងតំបន់​អាស៊ាន។

លោក ឈុន មករាបានបញ្ជាក់ថា បញ្ហាប្រឈមមានចំនួ ៥ ទី១ បម្រែបម្រួលនិន្នាការនៃទេសចរណ៍​នៅក្នុងតំបន់ ទី២ ការកង្វះខាតហិរញ្ញប្បទាននៃវិស័យទេសចរណ៍ ទី៣ ការធ្លាក់ចុះគុណភាពសេវា ទី៤ របប់នៃបច្ចេកវិទ្យា និងការប្រកួតប្រជែងរឿងតម្លៃ។

លោកថា ដើម្បីស្ដារវិស័យទេសចរណ៍ក្រសួងបានដាក់ចេញផែនទីចង្អុរផ្លូវ១ ផ្ដោតលើការស្ដារ ៣ ដំណាក់កាល គឺទី១ ជំនួយផ្នែកសេដ្ឋកិច្ច ចំពោះវិស័យឯក និងការងារ តាមរយៈគោលនយោ​បាយ​ពន្ធ គោលនយោបាយអាញ្ញាប័ណ្ណផ្សេងៗ។ យុទ្ធសាស្ត្រទី ២ គឺការជំរុញការបើកឡើង​វិញទេសចរណ៍ក្នុងស្រុក និងក្រៅស្រុក សម្រួលការចេញចូលប្រទេសកម្ពុជាឱ្យបានស្រួល។ ចុងក្រោយយន្តការ ការរៀបចំអភិបាលកិច្ចឡើងវិញ បង្កើតយន្តការគ្រប់គ្រង គុណភាពសេវា​ឡើងវិញ៕