រដ្ឋមន្ត្រីការងារជំរុញឱ្យជប៉ុនទទួលកម្មសិក្សាការី និងពលករជំនាញខ្មែរទៅធ្វើការឱ្យបានច្រើនបន្ថែមទៀត

លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ​ បានជំរុញឲ្យខាងភាគីជប៉ុន ទទួលកម្មសិក្សាការី ក៏ដូចជាពលករជំនាញរបស់កម្ពុជា បានទៅធ្វើការនៅប្រទេសជប៉ុនឲ្យកាន់តែច្រើនបន្ថែមទៀតដើម្បីទទួលបានចំណេះ និងជំនាញថ្មីៗយកមកអភិវឌ្ឍន៍ប្រទេសជាតិវិញ។

លោករដ្ឋមន្ត្រីបានជំរុញបែបនេះនៅក្នុងឱកាសអនុញ្ញាតឱ្យលោក Fumiaki Takahashi ប្រធានសមាគមជប៉ុ កម្ពុជា(JC A) និងជាអតីតឯកអគ្គរាជទូតជប៉ុនប្រចាំកម្ពុជា និងលោក KATO Kazunori ជានាយកប្រតិបត្តិសមាគមដឹកនាំប្រតិភូដែលជាអ្នកវិនិយោគមកពីប្រទេសជប៉ុនចូលជួបសម្តែងការគួរសម និងពិភាក្សាការងារជាមួយនៅព្រឹថ្ងៃទី២៦​ ខែមេសា ឆ្នាំ២០២២ នៅទីស្តីការក្រសួងការងារ។

លោកបណ្ឌិត អ៊ិត សំហេង សង្ឃឹមថា ទស្សនកិច្ចរបស់គណៈប្រតិភូដែលជាអ្នកវិនិយោគជប៉ុននៅលើទឹកដីកម្ពុជា​ ពិតជា​នាំមកនូវការពូនជ្រំសាមគ្គីភាព រវាងប្រជាជន និងប្រជាជនរបស់យើងកាន់តែរីកចម្រើនបន្តទៀត។ លោករដ្ឋមន្ត្រី បានជំរុញឲ្យខាងភាគីជប៉ុន ទទួលកម្មសិក្សាការី ក៏ដូចជាពលករជំនាញរបស់កម្ពុជា បានទៅធ្វើការនៅប្រទេសជប៉ុនឲ្យកាន់តែច្រើន ពីព្រោះនៅពេលដែលពួកគេវិលត្រឡប់មកកាន់មាតុភូមិកំណើតវិញទទួលបានចំណេះ ជំនាញ សម្រាប់បង្កើតអាជីវកម្មផ្ទាល់ខ្លួន រឺក៏ក្លាយជាអ្នកគ្រប់គ្រងនៅក្នុងក្រុមហ៊ុន សហគ្រាស របស់ជប៉ុនដែលមានវត្តមាននៅកម្ពុជា។

លោកបណ្ឌិត អ៊ិត សំហេង បានបន្តថា កម្ពុជាមានកិច្ចសហប្រតិបត្តិសម្រាប់កម្មសិក្សាការី និងពលករជំនាញចេញទៅធ្វើការនៅជប៉ុន ដោយសារទីផ្សារនៅជប៉ុន ផ្តល់នូវប្រាក់កម្លាំងពលកម្មខ្ពស់ ដែលអាចទាក់ទាញពលករពីក្រៅប្រទេសនានា។ ម្យ៉ាងទៀត ពលករដែលបានបម្រើការនៅទីនោះ ទទួលបាននូវការអាណិតស្រលាញ់រាប់អានពីអ្នករួម​ការងារ និងថៅកែរបស់ពួកគេផងដែរ។

លោករដ្ឋមន្ត្រី បានកត់សម្គាល់ថា អ្នកវិនិយោគជប៉ុនមកកម្ពុជាមានការកើនឡើងមានច្រើនផ្នែក ដូចជាកសិកម្ម ឧស្សាហកម្ម ធនាគារ សេវាកម្ម សំណង់ អចលនទ្រព្យ ផ្សារទំនើបជាដើម។ លោករដ្ឋមន្ត្រីបានបន្ថែមថា ការវិនិយោគរបស់ជប៉ុនបានរួមចំណែកដល់សេដ្ឋកិច្ចរបស់កម្ពុជា មានប្រព័ន្ធបច្ចេកវិទ្យាទំនើបទាន់សម័យ ខណៈមកដល់បច្ចុប្បន្ន បរិយាកាស និងឱកាសវិនិយោគនៅកម្ពុជាមានភាពល្អប្រសើរដោយសារកម្ពុជាមានសមត្ថភាពអាចគ្រប់គ្រងបាននូវការឆ្លងរាលដាលនៃជំងឺកូវីដ-១៩។

លោករដ្ឋមន្ត្រីក៏បានថ្លែងអំណរគុណដល់រាជរដ្ឋាភិបាលជប៉ុនដែលបានជួយមកកម្ពុជា ក្នុងវិស័យសុខាភិបាល ដោយផ្តល់នូវជំនួយវ៉ាក់សាំងមកដល់ពលរដ្ឋកម្ពុជា ព្រមទាំងវិស័យជាច្រើនទៀតដែលរាជរដ្ឋាភិបាលជប៉ុនបានជួយដល់កម្ពុជានាពេលកន្លងមក។ ជាមួយគ្នានេះដែរ ឯកឧត្តមរដ្ឋមន្ត្រី បានជម្រាបទៅកាន់អ្នកវិនិយោគជប៉ុនថា កម្ពុជាបានរៀបចំនូវច្បាប់វិនិយោគថ្មីដើម្បីជួយសម្រួលដល់បរិយាយកាសវិនិយោគនៅកម្ពុជាផងដែរ។

លោក Fumiaki Takahashi បានមានប្រសាសន៍ថា នៅក្នុងឆ្នាំ២០១៩ ខាងសមាគមរបស់លោកក៏ធ្លាប់បានដឹកនាំអ្នកវិនិយោគជប៉ុនមកសិក្សាស្វែងយល់ពីបរិយាកាសវិនិយោគនៅកម្ពុជាម្តងហើយដែរ ប៉ុន្តែដោយសារតែមានបញ្ហា​កូវីដ-១៩​ ធ្វើឲ្យរំខាននូវដំណើរការចង្វាក់ផលិតកម្ម និងវិនិយោគ ទើបខាងសមាគមខកខានមិនបានមកកាន់កម្ពុជា។

លោកមើលឃើញថា ក្នុងចំណោមប្រទេសក្នុងតំបន់ ប្រទេសកម្ពុជាបានទប់ស្កាត់ការឆ្លងរាលដាលនូវជំងឺកូវីដ-១៩បានយ៉ាងល្អប្រសើរ។ លោករីករាយដែលបានជួបជាមួយលោករដ្ឋមន្ត្រី ក៏ដូចជាថ្នាក់ដឹកនាំរបស់ក្រសួង ដើម្បីទទួលបាននូវព័ត៌មានមួយចំនួនពាក់ព័ន្ធទៅនឹងវិស័យការងារ និងការបណ្តុះបណ្តាលវិជ្ជាជីវៈ ក៏ដូចជាឱកាសវិនិយោគនៅកម្ពុជាផងដែរ។

គួរបញ្ជាក់ថា បច្ចុប្បន្ននេះមានពលករ​ខ្មែរ​ប្រមាណ​១​,​២​២​លាន​នាក់​បាន​ទៅ​ធ្វើការ​នៅ​ប្រទេស​ថៃ​ ​ជាង​ ​៤​៥​,០​០​០​នាក់​ ​នៅ​កូរ៉េ​ខាងត្បូង​ ​២​៣​,​០​២​៧​នាក់​ ​នៅ​ម៉ាឡេស៊ី​ ១​១​,​៤​៥​៣​នាក់​ ​នៅ​ជប៉ុន​៨​២​១​នាក់​ ​នៅ​សិង្ហបុរី​ ​៨​២​១​នាក់​ នៅ​ចិន​ហុងកុង​​២​០​២​នាក់​ ​និង​អា​រ៉ា​ប៊ី​សា​អូ​ឌីត​​៤​៣​នាក់​៕

អត្ថបទ៖ សំអឿន