អាជ្ញាធរ​ខេត្ត​ឱ្យរដ្ឋបាល​ជលផល​ចាប់ដៃ​ជាមួយ​អង្គការ​ដៃគូ ពង្រឹង​ការ​ការពារ​អភិរក្ស​ត្រីមេពូជ​នៅ​រដូវ​បិទ​នេសាទ

ពូជត្រីសំខាន់ៗប្រឈមនឹងការផុតពូជពីកត្តាមនុស្សត្រូវបានអាជ្ញាធរខេត្តណែនាំមន្ត្រីខណ្ឌជលផល សហការជាមួយអង្គការភូមិខ្ញុំ ប្រចាំនៅខេត្តស្ទឹងត្រែង ពង្រឹងសមត្ថភាពបណ្តាញសហគមនន៍នេសាទ ដើម្បីបង្កើនមធ្យោបាយការពារនិងអភិរក្សត្រីមេពូជឲ្យកាន់តែមានប្រសិទ្ធភាពនៅរដូវបិទនេសាទ។

លោក យ៉ង់ សុវឌ្ឍនា អភិបាលរងខេត្តមានប្រសាសន៍ថា៖ នៅក្នុងរដូវបិទនេសាទនេះសមត្ថកិច្ចពាក់ពន្ធ័ ត្រូវសហការជាមួយប្រជាសហគមន៍ចុះល្បាតឱ្យបានញឹកញាប់ ដើម្បីកុំឱ្យជនខិលខូចលួចនេសាទនៅតាមតំបន់អភិរក្សត្រីមេពូជដែលជាកន្លែងហាមឃាត់។

លោកអភិបាលរងមានប្រសាសន៍បន្ថែមថា៖ បច្ចុប្បន្ននេះ យើងមានអង្គការភូមិខ្ញុំជួយគាំទ្រសហគមន៍នេសាទចំនួន​១៨បន្តទៀត ដែលជាយន្តការមួយ បង្កើនការទាក់ទងគ្នា ផ្តល់ព័តមានបានឆាប់រហ័ស ក្រោមកិច្ចសហការជាមួយអាជ្ញាធរមានសកត្ថកិច្ចនិងអង្គការដៃគូ ក្នុងការអភិរក្សធនធានជលផលឱ្យកាន់តែមានប្រសិទ្ធភាពនៅឆ្នាំនេះក៍ដូចជាទៅឆ្នាំខាងមុខទៀត។

លោក ផុន គឹមម៉ាវ សមាជិកក្រុមប្រឹក្សាឃុំអូរម្រះ ស្រុកសៀមបូកបានបញ្ចាក់ថា៖ ក្នុងនាមអាជ្ញាធរឃុំ លោកបានណែនាំប្រជាសហគមន៍ ចុះល្បាតជាប្រចាំគ្រាន់តែនៅពេលជួបបទល្មើស មធ្យោបាយចុះប្រតិបត្តិការនៅមិនទាន់ឆ្លើយតប  ដោយសារតែយើងមានទូកតូច ម៉ាស៊ីន កំលាំងខ្សោយដេញទូកជនសង្ស័យនោះមិនទាន់់តែប៉ុណ្ណោះ។

លោកបន្តថា៖ បទល្មើសនេសាទពិតជាបានបង្កផលប៉ះពាល់ធ្ងន់ធ្ងរទៅដល់ធនធានមច្ឆជាតិ ព្រោះជនសង្ស័យប្រើឧបករណ៏ឆក់ត្រជាក់-ឆក់ក្តៅ-និងប្រើថ្នាំបំពុល និងលួចដាក់មងក្នុងអន្លុងអភិរក្ស ក្នុងរដូវបិទនេសាទ បង្កផលប៉ះពាល់និងធ្វើឲ្យហិនហោចពពួកត្រីកំពុងរងគ្រោះទៅនិងការផុតពូជ។

លោកប៉ោណារិទ្ធនាយកប្រតិបត្តិអង្គការភូមិខ្ញុំនៅខេត្តស្ទឹងត្រែងបានទទួលស្គាល់ថា៖ផ្អែកតាមរបាយការណ៍របស់​សហគមន៍​បទល្មើសប្រភេទនេះពិតជាជនសង្ស័យនៅលួចលាក់ធ្វើសកម្មភាពនៅតាមតំបន់ឆ្ងាយៗដែលបង្កឡើងឱ្យមានភាពស្មុគ្រស្មាញក្នុងពេលដែលកម្លាំងសហគមន៍ចុះធ្វើល្បាត។

លោកបញ្ជាក់ថា៖ទោះបីក្នុងរូបភាពណាក៍ដោយឆ្នាំនេះកំលាំងបណ្តាញយើងត្រូវរួមគ្នាបង្កើនកិច្ចការងារបង្ក្រាបដើម្បីការពារផលប្រយោជន៍ទាំងអស់គ្នា ហើយអង្គការភូមិខ្ញុំនៅបន្តគាំទ្រផ្នែកថវិកាសម្រាប់ធ្វើសកម្មភាពល្បាតនេះទៅតាមផែនការរបស់សហគមន៍ទាំង១៨ចាប់ពី១៥០០ដូល្លាទៅ២០០០ដូល្លាក្នុងមួយឆ្នាំ។

សូមបញ្ជាក់ថា៖សហគមន៍នេសាទដែលអង្គការភូមិខ្ញុំបន្តគាំទ្រនេះមាននៅក្នុងស្រុកសេសានចំនួន៥ឃុំស្រុកសៀម​បូក​៣ឃុំ ស្រុកសៀមប៉ាង២ឃុំ និងស្រុកថាឡាបរិវ៉ាត់១ឃុំ ដើម្បីផ្តល់លទ្ធភាព ឱ្យប្រជាសហគមន៍បង្កើនភាពទំនាក់ទំនងជាមួយអាជ្ញាធរមានសមត្ថកិច្ចក្នុងការអភិរក្សធនធានជលផល៕

អត្ថបទ៖ ងិនលីម