រាជរដ្ឋាភិបាល​កាត់ឆ្វៀលដី​ពីក្រុមហ៊ុនមួយ​នៅខេត្តរតនគិរី​ ធ្វើប័ណ្ណកម្មសិទ្ធិ​ជូនពលរដ្ឋ​ជាង ១ ពាន់គ្រួសារ

ប្រជាពលរដ្ឋ​ជាង ១ ពាន់គ្រួសារ (១ ២១១) រស់នៅសង្កាត់កាចាញ ក្រុងបានលុង ខេត្តរតនគិរី ទទួលបានប័ណ្ណកម្មសិទ្ធិដីអាស្រ័យផលស្របច្បាប់ពីរាជរដ្ឋាភិបាលកម្ពុជា ដែលបានចេញអនុក្រឹត្យ​កាត់ដីកៅស៊ូរដ្ឋ​ឡាបានសៀក។​​

​អភិបាលរងខេត្តរតនគិរី​លោក ញ៉ែម សំអឿន មានប្រសាសន៍នៅថ្ងៃទី ១២ ខែឧសភានេះថា ក្បាល​ដី​ដែលប្រជាពលរដ្ឋ​បានចុះបញ្ជី​នៅក្នុង​សៀវភៅគោលបញ្ជីដីធ្លី​ និងទទួលបានប័ណ្ណកម្មសិទ្ធិនេះ ​គឺ​បាន​បំពេញ​លក្ខខណ្ឌគ្រឹះដ៏រឹងមាំ ដែលធានាដោយរដ្ឋ និងការពារដោយច្បាប់ ហើយក៏ជា​លក្ខណ្ឌ​សំខាន់ សម្រាប់ការប្រើប្រាស់ប័ណ្ណដីជាប្រយោជន៍របស់ប្រជាពលរដ្ឋ។

ដូច្នេះការចុះបញ្ជី គឺជាការពង្រឹងសុវត្ថិភាព នៃការកាន់កាប់ដីធ្លី ដែលនឹងជំរុញការប្រើប្រាស់​ដីធ្លីឲ្យ​អស់សក្ដានុពល ហើយកត្តានេះ ពិតជាបានបញ្ចប់ជម្លោះ និងវិវាទដីធ្លី ជាពិសេសការកាត់​បន្ថយ​ភាពក្រីក្រ ដែលជាគោលនយោបាយជំរុញការចុះបញ្ជីដីធ្លីរបស់រាជរដ្ឋាភិបាល។

​សូមបញ្ជាក់ថា​ ការចែកវិញ្ញាបនប័ត្រ​ សម្គាល់ម្ចាស់អចលនវត្ថុ ​នៅសង្កាត់កាចាញ​នាពេលនេះ​មាន​ចំនួន​៤ភូមិគឺទី១​ដល់​ទី ៤ មានប្រជាពលរដ្ឋចំនួន១,២៤៥គ្រួសារលើផ្ទែដីដែលបានកាត់ទំហំ ២២៥ ហិកតា ៣៥ អា និង៤០ សង់ទីអា។ ហើយគ្រួសារដែលត្រូវទទួលបានប័ណ្ណមានចំនួន ១,២៤៩ គ្រួសារ ស្មើរនិង១,២១១ ប័ណ្ឌ៕

អត្ថបទ៖ វុទ្ធឦសាន