សម្ដេចតេជោ ហ៊ុន សែន ៖ ប្រធានាធិបតីអាមេរិក ថានឹងផ្ដល់ជំនួយវ៉ាក់សាំងមកកម្ពុជាបន្ថែមទៀត

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា ប្រធានាធិបតីអាមេរិក បានអះអាងនៅចំពោះមុខសម្ដេចថា នឹងបន្តផ្ដល់ជំនួយវ៉ាក់សាំងបង្ការជំងឺកូវីដ-១៩ ដល់ប្រទេសកម្ពុជាបន្ថែមទៀត។

សម្ដេចតេជោនាយករដ្ឋមន្ត្រី បានថ្លែងនៅក្នុងពិធីជួបសំណេះសំណាល ជាមួយក្រុមគ្រូពេទ្យសម្តេចតេជោប្រឆាំងកូវីដ​-១៩ នៅថ្ងៃទី ១៧ ខែឧសភានេះថា នៅក្នុងកិច្ចប្រជុំកំពូលពិសេសអាស៊ាន-អាមេរិក កាលពីពេលថ្មីៗនេះ សម្ដេចថ្លែងអំណរគុណចំពោះលោក ចូ បៃឌិន ប្រធានាធិបតីអាមេរិក ដែលបានផ្ដល់ជំនួយវ៉ាក់សាំងជូនដល់ប្រទេសកម្ពុជា។ ជាការឆ្លើយតបលោក ចូ បៃឌិន បានបញ្ជាក់ថា នឹងបន្តផ្ដល់ជំនួយវ៉ាក់សាំងដល់កម្ពុជាបន្ថែមទៀត។

សម្ដេចតេជោ ហ៊ុន សែន បានថ្លែងបន្តទៀតថា «ពិតហើយ ខ្ញុំបាននិយាយប្រាប់ប្រធានាធិបតី ចូ បៃឌិន នៅពេលដែលអង្គុយទល់មុខគ្នា គាត់អានសុរន្ទកថាមួយ ខ្ញុំអានសុរន្ទកថាមួយ ឥណ្ឌូនេស៊ីអានសុរន្ទកថាមួយ ហើយខ្ញុំក៏អរគុណគាត់ពេលហ្នឹង អរគុណដែលឯកឧត្ដមបានជួយវ៉ាក់សាំង គាត់ថា នៅមានទៀត»៕

អត្ថបទ៖ ឃួន សុភ័ក្រ