ព័ត៌មានជាតិ
មន្ត្រីជាន់ខ្ពស់ក្រសួងបរិស្ថាន ឲ្យពលរដ្ឋរាយការណ៍មកក្រសួង បើរកឃើញបទល្មើសធនធានធម្មជាតិធំៗ
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា បានថ្លែងប្រាប់ប្រជាពលរដ្ឋ ដែលរកឃើញបទល្មើសធនធានធម្មជាតិធំៗ អាចរាយការណ៍ទៅសមត្ថកិច្ច ឬរាយការណ៍មកក្រសួងបរិស្ថាន ដើម្បីបញ្ចៀសការលើកឡើងថា សំណាញ់ច្បាប់កម្ពុជាចាប់បានតែត្រីល្អិតៗ។
ថ្លែងក្នុងសន្និសីទសារព័ត៌មាន ស្ដីពី ការផ្សព្វផ្សាយយុទ្ធនាការអន្ទាក់សូន្យនៅខេត្តព្រះវិហារ កាលពីពេលថ្មីៗនេះ លោក នេត្រ ភក្ត្រា បញ្ជាក់ថា ការប្រកាន់យកវិធានការច្បាប់តែមួយមុខ គឺមិនអាចទប់ស្កាត់ និងបង្ក្រាបបទល្មើសធនធានធម្មជាតិ បាននោះទេ។ លោកបន្តថា ការផ្ដល់ជម្រើសថ្មី ជូនប្រជាពលរដ្ឋ តាមរយៈការបង្កើតការងារ និងមុខរបរថ្មី ដែលផ្សេងពីមុខរបរប្រពៃណី ដូចជាការចូលព្រៃដើម្បីកាប់ឈើ ឬដើម្បីបរបាញ់សត្វ គឺជារឿងសំខាន់ និងមានប្រសិទ្ធភាពបំផុត។ ដោយឡែកទាក់ទងនឹងប្រសិទ្ធភាព នៃការអនុវត្តច្បាប់ខាងក្រសួងបរិស្ថាន នឹងពិនិត្យមើលអំពីភាពចន្លោះប្រហោងបន្ថែមទៀត។
នេត្រ ភក្ត្រា បញ្ជាក់ដូច្នេះ «យើងហ្នឹងធ្វើកិច្ចការងារនេះ (ការបង្រ្កាបបទល្មើសធនធានធម្មជាតិ) បន្តទៅទៀត ការអនុវត្តច្បាប់យើងធ្វើ ក៏ប៉ុន្តែថាតើប្រសិទ្ធភាព នៃការអភិរក្សរបស់យើងពឹងផ្អែកទៅលើការអនុវត្តច្បាប់តែមួយឬ? នោះគឺអត់ទេ គឺវាដើរទន្ទឹមគ្នាជាមួយការអភិវឌ្ឍមូលដ្ឋាន»។
ជុំវិញបញ្ហានេះលោក អូត ឡាទីន អ្នកសម្របសម្រួលគម្រោង នៃសមាគមបណ្ដាញយុវជនកម្ពុជា (CYN) បានឲ្យដឹងថា ការលើកឡើងរបស់លោក នេត្រ ភក្ត្រា ហាក់មិនឆ្លើយតបក្នុងការដោះស្រាយបញ្ហាបទល្មើសធនធានធម្មជាតិ នៅក្នុងប្រទេសកម្ពុជានោះទេ។ លោកថា នៅពេលដែលក្រុមសកម្មជនបរិស្ថានចេញរបាយការណ៍ ស្ដីពីការបាត់បង់ធនធានបរិស្ថានម្ដងៗ ក្រសួងតែងតែបដិសេធ។
លោកបញ្ជាក់ថា «ចាប់ពីឆ្នាំ ២០១៩មក មានការរឹតត្បិត មិនឲ្យសហគមន៍មូលដ្ឋាន ចូលរួមនៅក្នុងកិច្ចការពារធនធានធម្មជាតិ នៅក្នុងតំបន់ព្រៃឡង់ និងព្រៃព្រះរកា អញ្ជឹងបើសិនជាគាត់ចង់ឲ្យធនធានធម្មជាតិ មាននិរន្តរភាពពិតមែន មិនចាំបាច់ឲ្យពួកយើងសិក្សាស្រាវជ្រាវ ថាតើអនុវត្តបានតែអ្នកតូច ហើយអ្នកធំមិនអនុវត្តបាននោះទេ»។
ទោះជាយ៉ាងនេះក្ដី អ្នកនាំពាក្យក្រសួងបរិស្ថានអះអាងថា កម្ពុជាមានច្បាប់ ស្ដីពី កិច្ចការពារបរិស្ថាន និងការគ្រប់គ្រងធនធានធម្មជាតិ និងឯកសារគតិយុត្តជាច្រើនផ្សេងទៀត ហើយក្រសួងបាននិងកំពុងអនុវត្ត។ ដោយឡែក ការចង់បានការអនុវត្តច្បាប់មួយ ដែលល្អឥតខ្ចោះនោះ ក្រសួងមិនអាចធ្វើបានទេ។
លោករដ្ឋលេខាធិការ បញ្ជាក់បន្ថែមថា ការលើកឡើងមួយចំនួន ដែលថាច្បាប់របស់កម្ពុជាចាប់បានតែត្រីតូចៗ ឬបង្ក្រាបបានតែបទល្មើសតូចតាចនោះ វាមិនមែនជាការពិតឡើយ។ លោកជំរុញឲ្យប្រជាពលរដ្ឋរាយការណ៍ទៅកាន់សមត្ថកិច្ច ឬមកក្រសួងបរិស្ថាន ដើម្បីអនុវត្ត និងទប់ស្កាត់បទល្មើសទាន់ពេលវេលា។
លោកបញ្ជាក់ដូច្នេះថា «ហើយអ្វីដែលលើកឡើងថា ច្បាប់ចាប់បានតែត្រីតូចអត់ត្រីធំ ឥឡូវបង្ហាញមកថាត្រីធំនៅកន្លែង ណា ហើយមានភស្តុតាងដែរអត់ បញ្ជូនមកយើងនឹងអនុវត្ត»៕
អត្ថបទ៖ លន់ សេនី
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២១ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង