អភិបាលខេត្តព្រះសីហនុ ប្រកាសចាត់វិធានការដោយគ្មានការលើកលែង ចំពោះអ្នកជួញ​ដូរ​ និងប្រើប្រាស់​អាវុធខុសច្បាប់

អភិបាលខេត្តព្រះសីហនុ បានប្រកាសចាត់វិធានការដោយគ្មានការលើកលែង ចំពោះអ្នកចរាចរណ៍​ ជួញ​ដូរ​ ប្រើប្រាស់​ និងផ្តល់អាវុធដោយខុសច្បាប់​ ហើយត្រូវស្រាវជ្រាវឲ្យដល់ឫសគល់​ ដើម្បីឈានទៅបង្ក្រាបបានទាន់ពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសរបស់លោក គួច ចំរើន អភិបាលនៃគណៈអភិបាលខេត្តព្រះសីហនុ និងជាប្រធានគណៈបញ្ជាការឯកភាពរដ្ឋបាលខេត្តព្រះសីហនុ បានធ្វើឡើងក្នុងកិច្ចប្រជុំគណៈបញ្ជាការឯកភាពរដ្ឋបាល​ខេត្ត ដើម្បីពង្រឹងសន្តិសុខ សុវត្ថិភាពជូនបងប្អូនប្រជាពលរដ្ឋ ភ្ញៀវទេសចរ និងអ្នកវិនិយោគនៅខេត្តព្រះសីហនុ កាលពីរសៀលថ្ងៃទី ១៦ ខែមិថុនា ឆ្នាំ ២០២២។

លោក ​ឃាង ភារម្យ​ អ្នកនាំពាក្យ​សាលាខេត្ត​ព្រះសីហនុ បានឲ្យដឹងថា ក្នុងកិច្ចប្រជុំនោះលោក គួច ចំរើន មានប្រសាសន៍ថា កិច្ចប្រជុំនាពេលនេះ គឺដោយផ្អែកតាមសភាពការណ៍ក្រោយការបោះឆ្នោត មានករណីបទល្មើសប្រើប្រាស់អាវុធខុសច្បាប់ ការបង្ករបួសស្នាម និងក្មេងទំនើង នៅក្នុងក្រុងព្រះសីហនុ រហូតដល់សមត្ថកិច្ច បានទទួលរងរបួសស្នាមក្នុងពេលកំពុងប្រតិបត្តិការបង្រ្កាប។ លោកថា សភាពការណ៍មានការប្រែប្រួលបែបនេះ ហើយទើបតម្រូវឲ្យមានកិច្ចប្រជុំបន្ទាន់ ដើម្បីដាក់ចេញវិធានការគ្រប់គ្រងសភាពការណ៍ឡើងវិញ។

លោក គួច ចំរើន បានបញ្ជាក់ថា ការធ្វើចរាចរណ៍ លក់ដូរ និងបញ្ចេញអាវុធដោយខុសច្បាប់ ទាមទារការស្រាវជ្រាវរកប្រភពដើម ដើម្បីឈានទៅបង្ក្រាបបានទាន់ពេលវេលា។ លោកអភិបាលខេត្ត ក៏បានបញ្ជាក់ជំហរយ៉ាងម៉ឺងម៉ាត់ថា «យើងគ្មានការលើកលែងជាដាច់ខាត​ ចំពោះអ្នកចរាចរណ៍​ ជួញដូរ​ ប្រើប្រាស់​ និងផ្តល់អាវុធដោយខុសច្បាប់​ ហើយត្រូវស្រាវជ្រាវឲ្យដល់ឫសគល់​ និងចាត់វិធានការតាមផ្លូវច្បាប់»។

នៅក្នុងកិច្ចប្រជុំខាងលើនេះ លោក គួច ចំរើន ក្នុងនាមគណៈបញ្ជាការឯកភាពរដ្ឋបាលខេត្ត បានដាក់ចេញនូវបទបញ្ជា និងវិធានការចំនួន ៤ចំណុច ដូចខាងក្រោម៖  

ទី១-គណៈបញ្ជាការក្រុងស្រុក ត្រូវរៀបចំគោលដៅបង្កើនត្រួតពិនិត្យអាវុធ ចល័តគោលដៅ និងពេលវេលា ដើម្បីទប់ស្កាត់ការនាំចូលអាវុធពីខាងក្រៅ (មិនឲ្យដាក់ប៉ុស្តិ៍ជាដាច់ខាត)។

២-ស្នងការដ្ឋាននគរបាលខេត្ត និងកងរាជអាវុធហត្ថខេត្ត បន្តការត្រួតពិនិត្យអាវុធជាតិផ្ទុះ នៅក្រុងព្រះសីហនុ និងល្បាតជាប្រចាំ ដោយពាក់អាវការពារខ្លួនជៀសវាងគ្រោះថ្នាក់។

៣-ពង្រឹងការត្រួតពិនិត្យអាវុធ បើជួបករណីអាវុធដែលមិនមានលិខិតស្នាមគ្រប់គ្រាន់ តាមគោលការណ៍នៃការគ្រប់គ្រងអាវុធ គឺត្រូវយកមកសួរនាំឲ្យបានច្បាស់លាស់។

៤-បន្តអនុវត្តចំពោះទីតាំងណា ដែលកើតមានការប្រើប្រាស់អាវុធ ហើយសមត្ថកិច្ចបង្រ្កាបបាន នៅទីតាំងនោះ គឺត្រូវអនុវត្តវិធានការរដ្ឋបាលឆែកឆេរ និងត្រួតពិនិត្យទីតាំងនោះទាំងអស់៕

អត្ថបទ៖ ឃួន សុភ័ក្រ