លោកជំទាវ ម៉ែន សំអន អបអរសាទរខួបអនុស្សាវរីយ៍លើកទី ៥៥ឆ្នាំ នៃថ្ងៃបង្កើតទំនាក់ទំនងការទូតកម្ពុជា-វៀតណាម

លោកជំទាវ ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច បានសម្ដែងនូវការអបអរសាទរខួបអនុស្សាវរីយ៍លើកទី ៥៥ឆ្នាំ នៃថ្ងៃបង្កើតទំនាក់ទំនងការទូតកម្ពុជា-វៀតណាម។ ការអបអរសាទរនេះ ធ្វើឡើងខណៈពេលលោកជំទាវ ដឹកនាំប្រតិភូជាន់ខ្ពស់រាជរដ្ឋាភិបាលកម្ពុជា ដឹកនាំបានចាកចេញពីប្រទេសកម្ពុជា កាលពីល្ងាចថ្ងៃទី ២៣ ខែមិថុនា ឆ្នាំ ២០២២ ដើម្បីអញ្ជើញចូលរួមពិធីមីទ្ទិញ អបអរសាទរខួបអនុស្សាវរីយ៍លើកទី ៥៥ នៃថ្ងៃបង្កើតទំនាក់ទំនងការទូត កម្ពុជា-វៀតណាម ដែលនឹងប្រព្រឹត្តទៅនៅទីក្រុងហាណូយ នៃសាធារណៈរដ្ឋសង្គមនិយមវៀតណាម។

លោក ណុប ចាន់ណារិន្ទ អ្នកនាំពាក្យ និងជារដ្ឋលេខាធិការ ក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានឲ្យដឹងថា ដំណើរទស្សនកិច្ចរបស់លោកជំទាវ ម៉ែន សំអន និងប្រតិភូទៅកាន់ប្រទេសវៀតណាម នាពេលនេះ បានធ្វើឡើងឆ្លើយតបតាមការអញ្ជើញ របស់ថ្នាក់ដឹកនាំរដ្ឋាភិបាលវៀតណាម តាមរយៈក្រសួងការបរទេសកម្ពុជា ពិសេសតាមចំណារដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

លោក ណុប ចាន់ណារិន្ទ បានឲ្យដឹងទៀតថា បើតាមកម្មវិធី នៃដំណើរទស្សនកិច្ចនេះ មានរយៈពេល ៣ថ្ងៃ ចាប់ពីថ្ងៃទី ២៣ ដល់ថ្ងៃទី ២៥ ខែមិថុនា ឆ្នាំ ២០២២។ ប៉ុន្តែសម្រាប់ថ្ងៃទី ២៤ ខែមិថុនា គឺថ្ងៃមីទ្ទិញអបអរសាទរ រំលឹកខួបអនុស្សាវរីយ៍លើកទី ៥៥ ថ្ងៃបង្កើតទំនាក់ទំនងការទូតរវាងកម្ពុជា-វៀតណាម ( ២២ មិថុនា ១៩៦៧-២២ មិថុនា ២០២២ )។  នៅក្នុងពិធីមីទ្ទិញនេះ លោកជំទាវ ម៉ែន សំអន ឧប​នាយករដ្ឋមន្ត្រី នឹងមានថ្លែងសុន្ទរកថាគន្លឹះ ព្រមទាំងមានការជួបពិភាក្សាការងារ ជាមួយថ្នាក់ដឹកនាំនៃប្រទេសវៀតណាមមួយចំនួនទៀត ទៅតាមពិធីការនៃការទូតផងដែរ៕

អត្ថបទ៖ វិមាន