កម្ពុជាគ្រោងបំពាក់ឧបករណ៍ការពាររន្ទះនៅតំបន់ប្រឈម ទប់ស្កាត់មនុស្សរបួស និងស្លាប់​

គណៈកម្មាធិការជាតិគ្រប់គ្រងគ្រោះមហន្តរាយ គ្រោង​នឹង​រៀបចំ​ឧបករណ៍​ការពារ​រន្ទះ នៅតាមតំបន់ប្រឈមមួយចំនួនដែលតែងតែកើតមាននូវបាតុភូតរន្ទះញាក់ញាប់ដើម្បីទប់ស្កាត់កុំឱ្យមនុស្សសត្វរងរបួសស្លាប់ជាបន្តទៀត។

ថ្លែងក្នុងវេទិការជាតិស្តីពី ការកាត់បន្ថយហានិភ័យគ្រោះមហន្តរាយ លើកទី ២៩ នៅថ្ងៃទី ១៣ ​កក្កដានេះ លោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ មានប្រសាសន៍ថា គ្រោះថ្នាក់ដោយធម្មជាតិតែងតែកើត​មាន​ជា​រៀងរាល់ឆ្នាំនៅកម្ពុជាដោយបានបំផ្លិតបំផ្លាញទ្រព្យសម្បត្តិ អាយុជីវិត ក្នុងនោះមានទឹកជំនន់ ខ្យល់កន្ត្រាក់ រន្ទះបាញ់ រាំងស្ងួត បាក់ច្រាំងទន្លេ និងជំងឺរាតត្បាតជាដើម។ ប៉ុន្តែក្នុងចំណោមគ្រោះធម្មជាតិទាំងនោះយើងមិនបានគិតចំពោះបញ្ហារន្ទះបាញ់ ដែលបង្កគ្រោះថ្នាក់ដល់អាយុជីវិតពលរដ្ឋជាច្រើន ជារៀងរាល់ឆ្នាំ។

លោកទេសរដ្ឋមន្ត្រីបានបន្តថា៖ “ដូចនេះ​លេខាធិការដ្ឋាន​តាមបណ្ដារាជធានីខេត្ត ត្រូវមើលតំបន់ណាខ្លះដែលតែងកើតមានបាតុភូតុរន្ទះ ហើយ​នៅ​ឆ្នាំ​នេះយើងនឹងគ្រោងគិតថវិកាជាតិ និងស្នើសុំទៅក្រសួងសេដ្ឋកិច្ច និងហិរញ្ញវត្ថុជួយ​ពិនិត្យ​លទ្ធភាព​ដោះ​ស្រាយបញ្ហានេះ”។

លោក សុទ្ធ គឹមកុលមុនី អ្នកនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា នៅក្នុងខែមិថុនា ឆ្នាំ ២០២២ នេះ គ្រោះធម្មជាតិបានបណ្តាលឱ្យមនុស្សស្លាប់ និងរបួសចំនួន ២៣ នាក់ ក្នុងនោះស្លាប់ដោយរន្ទះបាញ់ចំនួន ១០ នាក់ និងរបួស ៩ នាក់ និងស្លាប់ដោយគ្រោះអគ្គិភ័យ ១ នាក់ រងរបួស ៣ នាក់៕

អត្ថបទ៖ សំអឿន