​ទេសរដ្ឋមន្រ្តី​ លី ធុជ​ ចូលរួម​ពិគ្រោះយោបល់​គោលនយោបាយ​​សេដ្ឋកិច្ច ​និងសង្គមនៅក្នុងតំបន់អាស៊ី និងប៉ាស៊ីហ្វិក

​ព្រឹកថ្ងៃទី២៨ ខែកក្កដា ឆ្នាំ២០២២ ​ក្នុងនាមរាជរដ្ឋាភិបាលកម្ពុជា​ លោកទេសរដ្ឋមន្រ្តី លី ធុជ​ ប្រធានគណៈកម្មាធិការជាតិអេស្កាប់​ បានអញ្ជើញជាអធិបតីក្នុងកម្មវិធីបើក​ កិច្ចពិគ្រោះយោបល់​គោលនយោបាយអំពីរបាយការណ៍សេដ្ឋកិច្ច និងសង្គមនៅក្នុងតំបន់អាស៊ី និងប៉ាស៊ីហ្វិកឆ្នាំ២០២២ ដែលសហការរៀបចំដោយគណៈកម្មាធិការជាតិអេស្កាប់ និងគណៈកម្មការសេដ្ឋកិច្ច និងសង្គមកិច្ច​សម្រាប់អាស៊ី និងប៉ាស៊ីហិ្វករបស់អង្គការសហប្រជាជាតិ (UN ESCAP) នៅសណ្ឋាគារហ៊ីម៉ាវ៉ារី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ក្នុងកិច្ចពិគ្រោះយោបល់​នេះលោកទេសរដ្ឋមន្ត្រី លី ធុជ បានថ្លែងថា​ ក្នុងអំឡុងពេលពីរឆ្នាំ​ចុង​ក្រោយនេះ ជំងឺរាតត្បាតកូវីដ-១៩ បានប៉ះពាល់យ៉ាងធ្ងន់ធ្ងរដល់ដំណើរការអភិវឌ្ឍន៍សង្គម-សេដ្ឋកិច្ច ទាំងក្នុងតំបន់ និងពិភពលោកទាំងមូល ក្នុងនោះក៏មានប្រទេសកម្ពុជាផងដែរ ព្រមទាំង​បានធ្វើឲ្យអត្រាភាពក្រីក្រមានការកើនឡើង ប៉ះពាល់ដល់វិស័យអប់រំ សុខាភិបាល និងកម្រិត​ជីវ​ភាពរស់នៅរបស់ប្រជាពលរដ្ឋមានការធ្លាក់ចុះ។

ដើម្បីដោះស្រាយការរីករាលជំងឺកូវីដ-១៩ រាជរដ្ឋា​ភិបាលកម្ពុជា បានចំណាយថវិកា​ជាតិយ៉ាង​ច្រើន​សន្ធឹកសន្ធាប់ឧបត្ថម្ភដល់គ្រួសារ​ទទួលរងផលប៉ះពាល់ដោយជំងឺឆ្លងនេះជារៀងរាល់ខែ ជាពិសេស​ការស្តារឡើងវិញ និងធ្វើឲ្យប្រសើរឡើងនូវសេដ្ឋកិច្ច-សង្គមនៅកម្ពុជា។

លោកទេសរដ្ឋមន្រ្តីបន្តទៀតថា ជាមួយនឹងបញ្ហាកូវីដ-១៩ពិភពលោក​កំពុងប្រឈម​នឹងបញ្ហា​ជាច្រើនផ្សេងទៀតដែលក្នុងនោះរួមមាន ការប្រកួតប្រជែងភូមិសាស្ត្រនយោបាយយោធា សង្រ្គាម​ពាណិជ្ជកម្មនិងបច្ចេកវិទ្យា ការប្រែប្រួលអាកាសធាតុ និងការរឹតបន្តឹងគោលនយោបាយរូបិយវត្ថុ និងបញ្ហាជាច្រើនផ្សេងទៀត ដែលបញ្ហាទាំងនេះបានធ្វើឱ្យ​មានការផ្លាស់ប្តូរ​ទៅលើរចនា​សម្ព័ន្ធ​សេដ្ឋកិច្ចពិភពលោក និងរំខានដល់និន្នាការពិភពលោកដែលធ្វើមានការថយចុះនៃខ្សែច្រវាក់តម្លៃ និងផលិតភាពពិភពលោក។

លោកទេសរដ្ឋមន្ត្រី លី ធុជ ក៏បានបន្ថែមផងដែរថា ក្នុងស្ថានភាពនេះ សម្តេចតេជោ​នាយករដ្ឋមន្ត្រី និងជាប្រធានអាស៊ាន បានជំរុញឱ្យតំបន់ ក៏ដូចជាពិភពលោកទាំងមូល ត្រូវរក្សាស្មារតីបើកទូលាយ និងគាំទ្រដល់ប្រព័ន្ធពាណិជ្ជកម្មពហុភាគីក៏ដូចជាពង្រឹងពហុភាគីនិយមជាពិសេសជំរុញ​ការបើក​ទូលាយសម្រាប់ពាណិជ្ជកម្មអន្តរជាតិ និងការកាត់បន្ថយរបាំងពាណិជ្ជកម្ម ជាពិសេលទៅលើទំនិញ​យុទ្ធសាស្ត្ររួមមាន អាហារ ថ្នាំពេទ្យ និងថាមពល ដើម្បីជំរុញកំណើនសេដ្ឋកិច្ចប្រកបដោយចីរភាព និងបង្កើនភាពធន់នៃខ្សែច្រវាក់តម្លៃក្នុងតំបន់និងពិភពលោក។

នាឱកាសនេះដែរ លោកទេសរដ្ឋមន្ត្រី លី ធុជ បានលើកឡើងអំពីស្ថានភាពជំងឺកូវីដ-១៩ និងស្ថានភាពអភិវឌ្ឍន៍សេដ្ឋកិច្ចរបស់កម្ពុជា។ លោកបានថ្លែងថាក្រោមការដឹកនាំដ៏មុតមាំនិងឈ្លាសវៃរបស់ សម្តេចតេជោនាយករដ្ឋមន្ត្រី កម្ពុជា គិតត្រឹមថ្ងៃទី ២៥ ខែកក្កដានេះ បានសម្រេចបានអត្រាអ្នកចាក់វ៉ាក់សាំងការងារជំងឺកូវីដ-១៩ ដ៏ខ្ពស់ ពោលគឺលើស ៩៤% នៃប្រជាជនសរុប ១៦ លាននាក់។

ពាក់ព័ន្ធនឹងស្ថានភាពសង្គម-សេដ្ឋកិច្ច រាជរដ្ឋាភិបាលកម្ពុជាបានដាក់ចេញនូវវិធានការគោលនយោបាយដើម្បីទាក់ទាញការវិនិយោគបន្ថែមពីបរទេស ដោយបន្តកសាងហេដ្ឋារចនាសម្ព័ន្ធ និងធ្វើឱ្យប្រសើរឡើងនូវប្រព័ន្ធដឹកជញ្ជូន ជំរុញការសម្របសម្រួលពាណិជ្ជកម្ម អភិវឌ្ឍធនធានមនុស្ស ជំរុញការប្រើប្រាស់ប្រព័ន្ធ ឌីជីថល និងបច្ចេកវិទ្យា ព្រមទាំងអភិវឌ្ឍវិស័យហិរញ្ញវត្ថុ។

បន្ថែមលើនេះ រាជរដ្ឋាភិបាលបានពង្រីកទីផ្សារនាំចេញ​តាមរយៈការចុះ​កិច្ចព្រមព្រៀង​ពាណិជ្ជកម្ម​សេរីនានា រួមមាន (១)កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (២)កិច្ចព្រម​ព្រៀងពាណិជ្ជកម្មសេរីរវាងកម្ពុជា និងចិន ព្រមទាំង (៣)កិច្ចព្រមព្រៀងពាណិជ្ជកម្មសេរីរវាងកម្ពុជា និងកូរ៉េ។

ជាលទ្ធផល កម្ពុជាបានក្លាយជាទីតាំងដ៏មានសក្តានុពលសម្រាប់ផលិតកម្ម អាជីវកម្ម និងវិនិយោគក្នុងតំបន់ ដែលមានទីផ្សារនាំចេញមានភាពប្រកួត​ប្រជែងខ្ពស់សម្រាប់​អ្នកវិនិយោគ​ទូទាំងពិភពលោក៕