ព្រឹទ្ធសភា កំណត់យកថ្ងៃ ៥ សីហា ដើម្បីពិនិត្យ និងឲ្យយោបល់លើសេចក្ដីព្រាងច្បាប់ធម្មនុញ្ញ

គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃសុក្រ ទី ៥ ខែសីហា ឆ្នាំ ២០២២ ដើម្បីបើកសម័យប្រជុំលើកទី ៩ ព្រឹទ្ធសភា ដើម្បីពិនិត្យ និងឲ្យយោបល់លើសេចក្ដីព្រាងច្បាប់ធម្មនុញ្ញ ស្ដីពី វិ​សោធនកម្មមាត្រា ១៩ថ្មី (មួយ) មាត្រា ៨៩ មាត្រា ៩៨ មាត្រា ១០២ថ្មី មាត្រា ១១៩ថ្មី (មួយ) និងមាត្រា ១២៥ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងមាត្រា ៣ថ្មី និងមាត្រា ៤ថ្មី នៃច្បាប់ធម្មនុញ្ញ​បន្ថែម សំដៅធានានូវដំណើរការជាប្រក្រតី នៃស្ថាប័នជាតិ។

ការកំណត់យ៉ាងដូច្នេះ បន្ទាប់ពីគណៈកម្មាធិការអចិន្ត្រៃយ៍ព្រឹទ្ធសភា បានបើកកិច្ចប្រជុំក្រោមអធិបតីភាព សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា នៅព្រឹកថ្ងៃទី ៤ ខែសីហា ឆ្នាំ ២០២២។ ក្រៅពីពិនិត្យ និងឲ្យយោបល់លើសេចក្ដីព្រាងច្បាប់ធម្មនុញ្ញ ស្ដីពី វិ​សោធនកម្មមាត្រាមួយចំនួន នៃរដ្ឋធម្មនុញ្ញហើយនោះ កិច្ចប្រជុំពេញអង្គព្រឹទ្ធសភា ក៏បានលើកយករបៀបវារៈមួយចំនួនទៀតមកពិនិត្យ និងឲ្យយោបល់ផងដែរ៕