កិច្ចការ​ចាក់វ៉ាក់សាំង​កូវីដ​ពលរដ្ឋ​នៅ​រាជធានីភ្នំពេញ ធ្លាក់​បាន​ត្រឹម​ ៣០០០ ​នាក់​ក្នុង​មួយថ្ងៃ​

លោក ងី មានហេង ប្រធានមន្ទីរសុខាភិបាលរាជធានីភ្នំពេញមានប្រសាសន៍លើកឡើងថា កាលពីមុនពោលគឺខណៈជម្ងឺកូវីដ-១៩ កំពុងផ្ទុះខ្លាំង នៅរាជធានីភ្នំពេញដំណើរការ​ចាក់វ៉ាក់សាំងជូនប្រជាពលរដ្ឋក្នុង១ថ្ងៃៗបានចំនួនពី ១ ម៉ឺន ទៅ ១៤ ០០០ នាក់ លើទីតាំងចំនួន៤១ទីតាំង។

តែសម្រាប់ពេលនេះក្នុងមួយថ្ងៃៗ មិនបាន ៣០០០នាក់ផងទេ បើទោះបីមានការផ្សព្វផ្សាយនិងរហូតដល់ក្រុមការងារស្ពាយវ៉ាក់សាំងទៅចាក់ដល់ខ្នងផ្ទះពួកគាត់ក៏ដោយ។

លោក ងី មានហេង បានបញ្ជាក់ទៀតថា ប្រើពេល១០ថ្ងៃដើម្បីចុះផ្សព្វផ្សាយ និងនាំយកវ៉ាក់សាំងទៅចាក់នៅតំបន់ងាយរងគ្រោះ នៅក្នុងរាជធានីភ្នំពេញ ១ វគ្គតំបូង ចាក់បាន ១ ម៉ឺននាក់ តែវគ្គក្រោយនេះថយចុះច្រើន។ ប៉ុន្តែទោះបីជាយ៉ាងណាក្តី សម្រាប់ដុសទី៣ ចាក់បានជិត ១០០ភាគរយហើយ។

ការលើកឡើងបែបនេះ បានធ្វើឡើងនាព្រឹកថ្ងៃទី១១ សីហា ឆ្នាំ២០២២នេះ ក្នុងកិច្ចប្រជុំសាមញ្ញលើកទី៣៩ របស់ក្រុមប្រឹក្សារាជធានីភ្នំពេញ អាណត្តិទី៣ ក្រោមអធិបតីភាព លោកម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក មាន ចាន់យ៉ាដា អភិបាលរងរាជធានីភ្នំពេញ និងជាតំណាងលោកឃួង ស្រេង អភិបាលនៃគណៈអភិបាលរាជធានីភ្នំពេញ នៅសាលារាជធានីភ្នំពេញ ក្រោយពីក្រុមប្រឹក្សារាជធានីភ្នំពេញ។

តាមការពិនិត្យការចាក់វ៉ាក់សាំងអាយុ ១៨ឆ្នាំឡើង ក្នុងខែកក្កដា បានចំនួន ៩៥.៩៦៩នាក់ ប្រៀបខែមិថុនា មានការកើនឡើង ៧៣.៨៨៣នាក់ តែបើប្រៀបនឹងដូសទី៤ ដែលត្រៀមបន្តចាក់មានចំនួន១០១៦.៤២៦នាក់៕

អត្ថបទ៖ ស្រីរ័ត្ន