សម្ដេចតេជោ ហ៊ុន សែន ៖ មានអ្នកជំងឺកូវីដ-១៩ ចំនួន ៥៦នាក់ប៉ុណ្ណោះ កំពុងសម្រាកព្យាបាលនៅតាមមន្ទីរពេទ្យ

សម្ដេចតេជោ​ ហ៊ុន សែន នាយករដ្ឋមន្ត្រីនៃកម្ពុជា បានឲ្យដឹងថា មានអ្នកជំងឺចំនួនតែ ៥៦នាក់ប៉ុណ្ណោះ កំពុងសម្រាកព្យាបាលជំងឺកូវីដ-១៩ នៅតាមមន្ទីរពេទ្យនានា។

សម្ដេចតេជោ ហ៊ុន សែន បានថ្លែងក្នុងពិធីប្រគល់សញ្ញាបត្រ ជូននិស្សិតជ័យលាភីរបស់សាកលវិទ្យាល័យអាស៊ី-អឺរ៉ុប ប្រមាណ ៣,០៧៥នាក់ នៅព្រឹកថ្ងៃទី ២៣ ខែសីហានេះថា គិតត្រឹមថ្ងៃនេះ នៅតាមមន្ទីរនានានៅទូទាំងប្រទេស មានអ្នកជំងឺកូវីដ-១៩ ចំនួនតែ ៥៦នាក់ប៉ុណ្ណោះ បាននិងកំពុងសម្រាកព្យាបាល ហើយក្នុងចំណោមអ្នកទាំងនោះ មិនមែនឈឺធ្ងន់ទាំងអស់នោះឡើយ។

សម្ដេចតេជោនាយករដ្ឋមន្ត្រី បានមានប្រសាសន៍ថា «អ្នកទាំង ៥៦នាក់នេះ មិនប្រាកដថា មានជំងឺធ្ងន់ធ្ងរពេកទេ មានខ្លះក៏អាចថាធ្ងន់គួរសម ប៉ុន្តែដោយសារផ្ទះគ្នាតូចពេក ចឹងតម្រូវឲ្យមានការសម្រាកព្យាបាលនៅតាមមន្ទីរពេទ្យ»។

សម្ដេចតេជោ ហ៊ុន សែន បានលើកឡើងថា អ្នកកើតជំងឺកូវីដ-១៩ ភាគច្រើន បានសម្រាកព្យាបាលជំងឺនេះនៅតាមផ្ទះរបស់ពួកគេ ដោយជំងឺនេះបានក្លាយទៅជាជំងឺធម្មតាទៅហើយនោះ៕

អត្ថបទ៖ ឃួន សុភ័ក្រ