ធនាគារជាតិ​ចេញការថ្កោលទោស​ការផ្សព្វផ្សាយ​ និងផ្តល់​កម្ចីក្រៅផ្លូវការ​

​ធនាគារជាតិ​ នៃកម្ពុជានៅថ្ងៃទី ២៥ ខែសីហា ២០២២នេះ បានស្នើ​ឱ្យប្រជាពលរដ្ឋ​ប្រុងប្រយ័ត្ន​ចំពោះការផ្ដល់កម្ចីក្រៅផ្លូវការខុស​ច្បាប់​ និងថ្កោលទោស​ចំពោះការផ្សព្វផ្សាយគ្រប់រូបភាព។

ការប្រកាសបែបនេះ គឺបានធ្វើឡើង បន្ទាប់ពីធនាគារជាតិកម្ពុជា សង្កេតឃើញថា មានជនខិលខូចមួយចំនួន បានផ្សព្វផ្សាយយ៉ាងបើកចំហ និងផ្ដល់ឥណទានដល់ប្រជាពលរដ្ឋតាមរូបភាពផ្សេងៗ ដូចជាប្រព័ន្ធអនឡាញ បណ្ដាញសង្គម ការផ្សព្វផ្សាយតាមខិតបណ្ណ និងការបិតផ្សាយតាមទីសាធារណៈជាដើម។

សេចក្ដីប្រកាសព័ត៌មានរបស់ធនាគារជាតិ ចេញផ្សាយនៅថ្ងៃនេះ បញ្ជាក់ថា គ្រឹះស្ថានធនាគារ និងហិរញ្ញវត្ថុ ដែលទទួលបានអាជ្ញាបណ្ណប្រកបអាជីវកម្ម ពីធនាគារជាតិកម្ពុជា រួមមានធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុទទួលប្រាក់បញ្ញើក្រុមហ៊ុនភតិសន្យា និងមួយចំនួនទៀត ស្ថិតក្រោមការត្រួតពិនិត្យរបស់ធនាគារជាតិ ខណៈអតិថិជនទាំងអស់ត្រូវការពារដោយច្បាប់។

ធនាគារជាតិចាត់ទុកថា ការផ្ដល់ឥណទានដោយក្រុមហ៊ុន ឬបុគ្គលដែលគ្មានអាជ្ញាបណ្ណទាំងនេះ គឺជាសកម្មភាពល្មើសនឹងច្បាប់ជាធរមាន ជាពិសេសច្បាប់ស្ដីពីគ្រឹះស្ថានធនាគារ និងហិរញ្ញវត្ថុ។

តាមធនាគារជាតិដើម្បីចៀសវាងពីការបោកប្រាស់ក្រោមរូបភាពណាមួយ ឬផលវិបាកផ្សេងៗពីការទទួលបានឥណទានក្រៅផ្លូវការសូមឱ្យសាធារណជនប្រុងប្រយ័ត្នខ្ពស់ និងលើកទឹកចិត្តឱ្យប្រើសេវាគ្រឹះស្ថានផ្លូវការតែប៉ុណ្ណោះ៕

សេចក្ដីប្រកាសព័ត៌មានខាងក្រោម៖