តោះ! មកដឹងពីប្រវត្តិការសិក្សា និងបទពិសោធការងាររបស់លោកស្រី ជ្រឹង បុទុមរង្សី មុនក្លាយ​ជាទូតកម្ពុជាប្រចាំនៅកូរ៉េខាងត្បូង

លោកស្រី ជ្រឹង បុទុមរង្សី ជាឥស្សរជនស្ត្រីដែលត្រូវបានតែងតាំងមុខដំណែងជាឯកអគ្គរាជទូតកម្ពុជាប្រចាំនៅកូរ៉េខាងត្បូង កាលពីថ្ងៃទី០១ ខែមិថុនា ឆ្នាំ២០២១ ជំនួសលោក ឡុង​ ឌីម៉ង់ ដែលបានចប់អាណត្តិការងារ។ ទន្ទឹមគ្នានេះ បើក្រឡេកមកមើលប្រវត្តិនៃការសិក្សា និងបទពិសោធការងារ មុននឹងក្លាយជាឯកអគ្គរាជទូតនេះ គឺលោកស្រី ធ្លាប់បម្រើការងារជាច្រើនឆ្នាំនៅក្នុងវិស័យឯកជន និងក្រោយមកបម្រើការងារជាមន្ត្រីក្នុងជួររាជរដ្ឋាភិបាលកម្ពុជា។

តើលោកស្រីឯកអគ្គរាជទូតវ័យ ៣៩ឆ្នាំរូបនេះ មានប្រវត្តិការសិក្សា និងធ្លាប់កាន់កិច្ចការងារអ្វីខ្លះ? នៅថ្ងៃនេះ «កម្ពុជាថ្មី» នឹងលម្អិតប្រវត្តិសិក្សា និងការងាររបស់លោកស្រី ដូចខាងក្រោម ៖

លោកស្រី ជ្រឹង បុទុមរង្សី កើតនៅថ្ងៃទី០២ ខែធ្នូ ឆ្នាំ១៩៨៣ នៅខេត្តកំពង់ធំ។ លោកស្រីបានបញ្ចប់ការសិក្សាកម្រិត វិទ្យាល័យនៅទីក្រុងស៊ីដនី ប្រទេសអូស្រ្តាលី គឺវិទ្យាល័យ SIR JOSEPH BANKS កាលពីឆ្នាំ២០០១។ សម្រាប់កម្រិតឧត្តមសិក្សា លោកស្រីបញ្ចប់សញ្ញាបត្រថ្នាក់បរិញ្ញាបត្រផ្នែកសេដ្ឋកិច្ច និងហិរញ្ញវត្ថុ នៅសាកលវិទ្យាល័យ Western Sydney ប្រទេសអូស្រ្តាលី និងនៅឆ្នាំ២០០៨ ទទួលបានសញ្ញាបត្រថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងធុរកិច្ច នៅសាកលវិទ្យាល័យ Westminster ទីក្រុងឡុងដ៍ ចក្រភពអង់គ្លេស។

បើនិយាយអំពីបទពិសោធការងារវិញ លោកស្រី ជ្រឹង បុទុមរង្សី ធ្លាប់ធ្វើជាទីប្រឹក្សារបស់កម្មវិធីអង្គការសហប្រជាជាតិស្តី ពីជំងឺអេដស៍ នៅឆ្នាំ២០០៦-២០០៧ និងនៅឆ្នាំ២០០៩ លោកស្រីបំពេញការងារនៅក្រុមហ៊ុនឯកជនមួយ ក្នុងតួនាទីជាប្រធានផ្នែកទីផ្សារ និងអ្នកគ្រប់គ្រងទូទៅ។ រហូតដល់ឆ្នាំ២០១២ លោកស្រី បានចាប់ផ្ដើមចូលរួមបំពេញការងារជាមួយរាជរដ្ឋាភិបាល តាមរយៈ​តួនាទីជា​អ្នក​សម្របសម្រួល​ប្រចាំ​នៅ​ខេត្តកំពតសម្រាប់បេសកកម្មនៃការអនុវត្តសកម្មភាពវាស់វែងដីជូនពលរដ្ឋ ក្រោមគោលនយោបាយចាស់សកម្មភាពថ្មីលើវិស័យដីធ្លី ដែលដឹកនាំដោយសម្ដេចតេជោនាយករដ្ឋមន្ត្រី ហ៊ុន សែន  ដើម្បី​ផ្ដល់​កម្មសិទ្ធិកាន់កាប់​ដីធ្លី​ដល់​​ប្រជាពលរដ្ឋ​​រស់នៅ​ជនបទ និង​ទី​ដាច់ស្រយាល​។

ក្រោយបញ្ចប់បេសកកម្មការងារនេះ គឺនៅឆ្នាំ២០១៣ លោកស្រីត្រូវបានតែងតាំងមុខតំណែងជាអនុរដ្ឋលេខាធិការក្រសួងប្រៃសណីយ៍ និងទូរគមនាគមន៍។ លុះរហូតដល់ឆ្នាំ២០១៨ លោកស្រី ត្រូវបានផ្ទេរក្របខណ្ឌមកបម្រើការងារនៅក្រសួងការបរទេស ដែលកាន់តំណែងជាអនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងនៅចុងឆ្នាំ ២០២០ ព្រះមហាក្សត្រនៃកម្ពុជា ត្រាស់បង្គាប់តែងតាំង និងតម្លើងឋានៈលោកស្រី ជារដ្ឋលេខាធិការក្រសួងការបរទេស មុនពេលលោកស្រី ក្លាយជាឯកអគ្គរាជទូតវិសាមញ្ញ និងពេញសមត្ថភាពរបស់កម្ពុជាប្រចាំនៅកូរ៉េខាងត្បូង តាមព្រះរាជក្រឹត្យរបស់ព្រះមហាក្សត្រចុះថ្ងៃទី០១ ខែមិថុនា ឆ្នាំ២០២១ និងបានចាប់ផ្ដើមបំពេញការងារនៅទឹកដីកូរ៉េនេះនៅថ្ងៃទី១០ ខែកញ្ញា។ ជាមួយគ្នានេះ ក្នុងតួនាទីជាឯកអគ្គរាជទូត​កម្ពុ​ជាប្រចាំ​​កូរ៉េខាងត្បូង ​ លោកស្រី ជ្រឹង បុទុមរង្សី ក៏ទទួលបានពានរង្វាន់ «អគ្គរាជទូត​ឆ្នើម​ប្រចាំឆ្នាំ​២០២២» ពី​ស្ថាប័ន​ Korea Consumer Global Council ផងដែរ កាលពីថ្ងៃទី១០ ខែឧសភា ឆ្នាំ២០២២ កន្លងទៅនេះ គឺបន្ទាប់ពីលោកស្រីបានបំពេញការងារមិនទាន់បានមួយឆ្នាំផងនោះ៕

ដោយ ៖ ធឿន វ៉ាន់សុង