​រដ្ឋបាលខេត្តកែបកំពុងពិនិត្យការស្នើសុំវិនិយោគកោះត្បាល់របស់ក្រុមហ៊ុនទ្រីភាពគ្រុប

ក្រុមហ៊ុន TRY PHEAP KOS TUNSAY RESORT CO.,LTD បានស្នើសុំរាជរដ្ឋាភិបាល ដើម្បីអភិវឌ្ឍន៍​កោះត្បាល់ ស្ថិតក្នុងខេត្តកែប។

ក្រោយមានការស្នើសុំរបស់ក្រុមហ៊ុនទ្រីភាព រដ្ឋមបាលខេត្តកែប និងមន្រ្តីពាក់ព័ន្ធ រួមមាន ក្រុមប្រឹក្សាអភិវឌ្ឍន៍កម្ពុជា និងមន្រ្តីមន្ទីរខេត្ត បានចុះត្រួតពិនិត្យនាពេលថ្មីៗនេះ។

លោក អ៊ឹង វុទ្ធី នាយករដ្ឋបាលខេត្តកែប បានប្រាប់កម្ពុជាថ្មីថា គណៈប្រិតិភូនៃក្រុមប្រឹក្សាអភិវឌ្ឍន៍កម្ពុជា បានចុះត្រួត​ពិនិត្យទីតាំងជាក់ស្តែងរួចហើយ  តែការសិក្សាមិនទាន់ចេញជាលទ្ធផលនៅឡើយទេ។ លោកបន្តដូច្នេះថា« ការងារចំពោះមុខ គឺគ្រាន់តែចុះពិនិត្យមើលទីតាំងជាក់ស្តែងថាតើមានប្រជាពលរដ្ឋអាស្រ័យផល នៅលើកោះនេះ ឬអត់? ប៉ុន្តែជាក់ស្តែងនៅលើកោះ ពុំមានប្រជាពលរដ្ឋរស់នៅទេ»។

ជាមួយគ្នានេះ លោក សោម ពិសិដ្ឋ អភិបាលខេត្តកែប បានគូសបញ្ជាក់ថា រដ្ឋបាលខេត្ត ស្វាគមន៍ចំពោះដៃគូអភិវឌ្ឍ ដែលមានគម្រោងស្នើសុំវិនិយោគតំបន់នានាក្នុងមូលដ្ឋានខេត្តកែប។ ទោះយ៉ាណា លោកអភិបាលខេត្តសង្កត់ធ្ងន់ថា ការអភិវឌ្ឍតែងតែមានមុខពីរ គឺមានវិជ្ជមាន និងអវិជ្ជមាន។ ប៉ុន្តែជាទូទៅ រាជរដ្ឋាភិបាល តែងតែគិតគូអំពីភាពវិជ្ជមាន ដូច្នេះការអភិវឌ្ឍឆ្នេរកោះ និងទីតាំងមួយចំនួន គឺមានការពិចារណាខ្ពស់ មិនឱ្យប៉ះពាល់ដល់ផលប្រយោជន៍​ប្រជាពលរដ្ឋឡើយ។

លើសពីនេះទៀត លោក អ៊ឹង វុទ្ធី នាយករដ្ឋបាលខេត្តកែប បានបន្ថែមថា ការអភិវឌ្ឍមានគោលបំណងគឺដើម្បី​សក្តានុពល ក៏ដូចជាលើកកម្ពស់សេដ្ឋកិច្ចជាតិ តាមរយៈចំណូលពន្ធ ដូចជាការជួលទីតាំងផ្សេងៗ និងបានផ្តល់​ការងារដល់ពលរដ្ឋក្នុងតំបន់ ជាដើម។

សូមបញ្ជាក់ថា ក្រុមហ៊ុនទ្រី ភាព គ្រុប បានទទួលសិទ្ធិសម្បទានពីរាជរដ្ឋាភិបាល ដើម្បីអភិវឌ្ឍន៍កោះទន្សាយ ជារមណីយដ្ឋានលំហែរកាយ លំដាប់ផ្កាយ៥រួចហើយ ខណៈដែលបច្ចុប្បន្នក្រុមហ៊ុននេះបាននិងកំពុង​សាងសង់ហេដ្ឋារចនាសម្ព័ន្ឋសំខាន់ៗមួយចំនួន ដើម្បីអភិវឌ្ឍន៍លើផ្ទៃដីមួយចំនួនលើកោះនេះផងដែរ។

ចំណែកកោះត្បាល់ គឺជាកោះធម្មជាតិមួយ ដែលស្ថិតនៅប្រជុំកោះពោធិ៍ និងមានចម្ងាយប្រមាណ ១.៥គីឡូម៉ែត្រ ពីកោះទន្សាយ។ កោះនេះ មានទេសភាពស្រស់ស្អាត បរិយាកាសស្ងប់ស្ងាត់ អមដោយខ្យល់អាកាសបរិសុទ្ធ និងមានទឹកសមុទ្រថ្លាឈ្វេង លាយឡំជាមួយព្រៃឈើពណ៌ខៀវស្រងាត់ សាកសមសម្រាប់អ្នកចង់លំហែកាយ​លក្ខណៈបែបស្ងប់ស្ងាត់ គេចចេញពីភាពស្មុគស្មាញទាំងឡាយ។

ភ្ញៀវទេសចរ អាចធ្វើដំណើរពីក្រុងកែប ដោយត្រូវចំណាយពេលប្រមាណ ៣៥-៤៥ នាទី តាមរយៈទូក ឬកាណូត​ទេសចរណ៍ សំដៅទៅកោះត្បាល់ ដែលជាកោះមួយក្នុងចំណោមកោះដ៏ស្រស់ស្អាតដទៃទៀតរបស់ខេត្តកែប៕