ឧកញ៉ា សួរ វីរៈ៖ ត្រូវធ្វើអ្វីដែលល្អស៊ី កុំធ្វើអ្វីដែលល្អមើល

លោកឧកញ៉ា សួរ វីរៈ គឺជាអគ្គនាយកក្រុមហ៊ុន វីរៈប៊ុនថាំ អេចប្រេស ដែលជាក្រុមហ៊ុនដឹកជញ្ជូនអ្នកដំណើរ និង​បញ្ញើរអីវ៉ាន់ឈានមុខគេមួយ នៅក្នុងប្រទេសកម្ពុជា។

លោកឧកញ៉ា ទទួលបានជោគជ័យខ្លាំងលើវិស័យដឹកជញ្ជូន។ ជាមួយនឹងការជោគជ័យនេះ លោកឧកញ៉ា បានផ្តល់ទស្សនជាសាធារណៈថា «បើចង់ជោគជ័យ ត្រូវចំណាយពេលវេលា ហើយគួរធ្វើអ្វីដែលអ្នកចេះ អ្នកចូលចិត្ត និងចាប់ផ្តើមពីចំនុចតូច ដើរសន្សឹមៗ ដើម្បីរង់ចាំឱកាសមកដល់ ព្រោះគ្រប់អាជីវកម្មតែងតែទុកចន្លោះនៃភាពជោគជ័យ ដែលអ្នកប្រាថ្នាចង់ទទួលបាន ត្រូវចាំថា ធ្វើអ្វីដែលល្អស៊ី កុំធ្វើអ្វីដែលល្អតែមើល»។

បច្ចុប្បន្ននេះលោកឧកញ៉ា សួរ វីរៈ គឺជាអគ្គនាយកក្រុមហ៊ុន វីរៈប៊ុនថាំ អេចប្រេស ហើយក៏បានមុខជំនួញផ្សេង​ទៀតដែរ ដែល​លោកចូលចិត្ត គឺមុខជំនាញពាក់ព័ន្ធនឹងដីធ្លី និងការសាងសង Resort។ កាលពីពេលថ្មីៗ នេះ លោកក៏បានបង្កើតផ្សារអេឡិចត្រូនិច VTENH ដែលជាផ្សារលក់ទំនិញតាម Onlineទំនើបផងដែរ។ លោកឧកញ៉ា សួរ វីរៈ បាន​កត់​សម្គាល់ឃើញថា យុវជនជំនាន់ក្រោយភាគច្រើន មានផ្នត់គំនិតចង់បង្កើតអាជីវកម្ម តែពួកគេមានការ​រារែក​។ រារែកក៏​ព្រោះ​តែពួកគេ មិនច្បាស់អំពីខ្លួនឯង ហើយម្យ៉ាងទៀត គឺពាក់ព័ន្ធនឹងបញ្ហាធនធានថវិកា និងបទ​ពិសោ​ធន៍​។

លោកឧកញ៉ា សួរ វីរៈ បានសង្កត់ធ្ងន់ថា« យើងត្រូវហ៊ានប្រថុយប្រថាន តែប្រថុយប្រថានជាមួយគោលដៅច្បាស់​លាស់ ហើយកុំប្រថុយដោយអំនួត»។ លោកបញ្ជាក់ថា កន្លងមក មានអ្នកប្រថុយ ដោយអំនួតបានបរាជ័យ ក្នុងអាជីវកម្មរបស់ខ្លួន។ ទោះយ៉ាងណា លោកឧកញ៉ា សួរ វីរៈ មើលឃើញ​យុវជនមួយចំនួន ទទួលបានជោគជ័យក្នុងអាជីវកម្ម ដែលយុវជនទាំងនោះ ជាយុវជន​ឆ្លាត ដោយបានសិក្សាអំពីបទពិសោធន៍អ្នកចាប់ផ្ដើមុន និងហ៊ានសួរថា ហេតុ​អ្វីបានជារាមច្បងបរាជ័យត្រង់​ចំណុច​នេះ និងហេតុអ្វីបានជារាមច្បង ចាប់ផ្ដើមខុសត្រង់ចំណុចនោះ? ហើយនៅពេលទទួលបានបទពិសោធន៍ និងការ​ណែ​នាំ​ពីរាមច្បង យុវជនដែលឆ្លាតនោះ នឹងខិតខំកែតម្រូវ ព្រមទាំងមិនដើរផ្លូវខុសឡើយ ព្រោះ​គេទទួល​បាន​ការបំភ្លឺផ្លូវ ពី​រាម​ច្បងរួចទៅហើយ៕