​រដ្ឋបាលរាជធានីភ្នំពេញ​បង្កើតមន្ដ្រីទទួលបន្ទុកព័ត៌មានតែងតាំងលោក កើត ឆែ ជាប្រធាន ​

រដ្ឋបាលរាជធានីភ្នំពេញបានសម្រេចបង្កើតមន្ដ្រីទទួលបន្ទុកព័ត៌មានដែលលោក កើត ឆែ អភិបាលរងរាជធានីភ្នំពេញ ជាប្រធាន និងមានសមាជិក៣រូបទៀត។

ការបង្កើតមន្ដ្រីទទួលបន្ទុកព័ត៌មាននេះ ដើម្បីធានាឲ្យមានការទទួលផ្សព្វផ្សាយ និងកែតម្រូវព័ត៌មានជាសាធារណៈឲ្យបានកាន់តែទូលំទូលាយមានតម្លាភាព និងមានប្រសិទ្ធភាពព្រមទាំងការផ្តល់ព័ត៌មាននានាជូនអ្នកសារព័ត៌មានសម្រាប់ការផ្សព្វផ្សាយ រួមទាំងការងារទទួលបន្ទុកជាច្រើនផ្សេងទៀតផងដែរ។ នេះបើតាមសេចក្តីសម្រេចរបស់រដ្ឋបាលរាជធានីភ្នំពេញដែលព័ត៌មានយើងទទួលបាននៅថ្ងៃទី១៦ ខែកញ្ញា ឆ្នាំ២០២២នេះ។

សេចក្តីសម្រេចបានបញ្ជាក់ថា៖ មន្ដ្រីទទួលបន្ទុកព័ត៌មានរបស់រដ្ឋបាលរាជធានីភ្នំពេញគឺជាអ្នកនាំពាក្យរបស់រដ្ឋបាលរាជធានីភ្នំពេញដែលត្រូវជួយក្រុមប្រក្សាក្នុងការធានាឲ្យមានការទទួលផ្សព្វផ្សាយ និងកែតម្រូវព័ត៌មានជាសាធារណៈឲ្យបានកាន់តែទូលំទូលាយមានតម្លាភាព និងមានប្រសិទ្ធភាពព្រមទាំងការផ្តល់ព័ត៌មាននានាជូនអ្នកសារព័ត៌មានសម្រាប់ការផ្សព្វផ្សាយ រួមទាំងការងារទទួលបន្ទុកជាច្រើនផ្សេងទៀតផងដែរ។

បើតាមសេចក្ដីសម្រេចលោក កើត ឆែ អភិបាលរងរាជធានីភ្នំពេញជាប្រធាន និងសមាជិក ៣ រូបទៀតគឺលោក ម៉េត មាសភក្ដី នាយកទីចាត់ការផែនការ និងវិនិយោគ លោកស្រី ដោ សម្ផស្ស នាយិកាទីចាត់ការររដ្ឋបាល និងលោក ឈាង ប៊ុនថា អនុប្រធានមន្ទីរព័ត៌មានរាជធានីភ្នំពេញ។

មន្ត្រីទទួលបន្ទុកព័ត៌មានរបស់រដ្ឋបាលរាជធានីភ្នំពេញមានភារកិច្ចដូចខាងក្រោម៖

ទទួល និងផ្តល់ព័ត៌មានរបស់រដ្ឋបាលរាជធានីភ្នំពេញ ជូនប្រជាពលរដ្ឋ សាធារណជន អ្នកសារព័ត៌មាននិងអ្នកពាក់ព័ន្ធនានា។ រៀបចំសន្និសីទសារព័ត៌មាន នៅថ្នាក់រាជធានីភ្នំពេញផ្តល់សេចក្តីសង្ខេបព័ត៌មាន​ដោយផ្ទាល់មាត់ ឬរាយការណ៍តាមទូរស័ព្ទ ឬជាលាយល័ក្ខអក្សរជូនប្រព័ន្ធផ្សព្វផ្សាយព័ត៌មាននានាក្នុងនាមរដ្ឋបាលរាជធានីភ្នំពេញ។

ធ្វើការសិក្សាស្រាវជ្រាវ ដើម្បីផ្តល់យោបល់ជូនក្រុមប្រឹក្សាគណៈអភិបាលរាជធានី អំពីការរៀបចំយុទ្ធសាស្ត្រ ផ្សព្វផ្សាយព័ត៌មាន និងការស្វះស្វែងរកមធ្យោបាយផ្សព្វផ្សាយព័ត៌មាននានាជូនសាធារណជន និងអ្នកស្នើសុំព័ត៌មាននៅក្នុងដែនសមត្ថកិច្ចរបស់ខ្លួន។

រៀបចំឲ្យមានក្ដារព័ត៌មានជាសាធារណៈនៅសាលារាជធានីភ្នំពេញ និងនៅតាមទីកន្លែងនានាក្នុងដែនសមត្ថកិច្ចរបស់ក្រុមប្រឹក្សាតាមការចាំបាច់ ហើយដែលទីកន្លែងទាំងនោះមានភាពស្រួលសម្រាប់ប្រជាពលរដ្ឋទទួលបានព័ត៌មានជាសាធារណៈ។

រៀបចំឲ្យមានមធ្យោបាយផ្សព្វផ្សាយព័ត៌មានផ្សេងៗទៀត តាមរយៈគេហទំព័រព្រឹត្តប័ត្រព័ត៌មានទស្សនាវដ្ដីរបស់រដ្ឋបាលរាជធានី និងតាមរយៈប្រព័ន្ធឧឃោសនស័ព្ទ វិទ្យុ ទូរទស្សន៍ជាដើម ធ្វើបច្ចុប្បន្នភាពជាប្រចាំនូវព័ត៌មាន ដែលបានផ្សព្វផ្សាយនៅលើក្តារព័ត៌មាន និងតាមប្រព័ន្ធផ្សព្វផ្សាយផ្សេងៗទៀតអនុវត្តតួនាទីផ្សេងទៀតតាមការស្នើសុំរបស់ក្រុមប្រឹក្សាគណៈអភិបាលរាជធានីភ្នំពេញរៀបចំប្រមូលព័ត៌មានពីប្រជាជនពីបណ្ដាមន្ទីរដើម្បីធ្វើការបូកសរុប និងរាយការណ៍ជូនក្រុមប្រឹក្សារាជធានីធ្វើការកែតម្រូវរាល់ព័ត៌មានដែលមិនត្រឹមត្រូវ៕

អត្ថបទ៖ ស្រីរ័ត្ន