លោក សុខ ទូច ធ្វើជាមន្ត្រីរដ្ឋជាង ១៦ឆ្នាំ ទម្រាំក្លាយជាប្រធានរាជបណ្ឌិត្យសភាកម្ពុជា

លោក សុខ ទូច បានចូលកាន់តំណែង​ជាប្រធាន​រាជបណ្ឌិត្យ​សភា​កម្ពុជា កាលពីថ្ងៃទី១១ ខែសីហា ឆ្នាំ២០១៧។ លោក​កើត​នៅ​​​ឆ្នាំ​១៩៦៥ ស្ថិតនៅ​​ភូមិ​តា​កយ​ ឃុំ​ព្រែក​ដំបូក ស្រុក​ស្រីសន្ធរ ​​ខេត្ត​កំពង់​ចាម។ ​​​​គ្រួសារ​របស់​លោក​ មាន​ស្ថានភាព​មធ្យម​​ ដែល​ឪពុក​ធ្វើ​ជា​មន្ត្រី​រាជការ​ ​​ម្ដាយ​ជា​មេ​ផ្ទះ​ និង​មាន​បង​ប្អូន​ ៥​នាក់​ ស្រី​​ ២​នាក់​ និង​ប្រុស​ ៣​នាក់​។

ក្រោយពី​ប្រឡង​ជាប់​ថ្នាក់​បឋម​ នៅក្នុង​​ឆ្នាំ​១៩៨៤ លោក​ សុខ ទូច បានឡើង​មក​​រៀន​បន្ត​​​ថ្នាក់​មធ្យម​សិក្សា​កម្រិត​មួយ​នៅ​ក្រុង​ភ្នំ​ពេញ​ គឺ​នៅ​​​សាលា​ចតុមុខ​​។ ​រៀន​បានរយៈពេល​ ៣​ឆ្នាំ​​ លោក​ បាន​ប្រឡង​ជាប់​​​ថ្នាក់​មធ្យម​សិក្សា​កម្រិត​មួយ ហើយ​បាន​បន្តរៀនថ្នាក់​មធ្យម​សិក្សា​កម្រិត​ពីរ​ នៅ​សាលា​ដដែល​។ ក្រោយ​មក ​លោក​បាន​ប្រឡង​ជាប់​នៅ​មធ្យមសិក្សា​កម្រិត​ពីរ ហើយបាន​បន្ត​ចូល​រៀន​ថ្នាក់​វិទ្យាល័យ​​ នៅ​សាលា​ភ្នំ​ដូន​ពេញ​​ (​បច្ចុប្បន្ន​សាលា​ស៊ីសុវត្ថិ) ដោយបញ្ចប់សញ្ញាបត្របាក់ឌុបនៅឆ្នាំ១៩៨៩។ ​​​

បន្ទាប់ពីជាប់សញ្ញាបត្របាក់ឌុបដោយជោគជ័យ លោក សុខ ទូច ក៏ទទួលបានអាហារូបករណ៍ទៅសិក្សានៅក្រៅប្រទេស គឺនៅប្រទេសរុស្ស៊ី។ សិក្សានៅរុស្ស៊ីនេះ លោក ទទួលបានសញ្ញាបត្របរិញ្ញាបត្រ និងសញ្ញាបត្របរិញ្ញាបត្រជាន់ខ្ពស់ផ្នែកវិទ្យាសាស្ដ្រនយោបាយ ក្នុងឆ្នាំ១៩៩៥-១៩៩៦ និងនៅក្នុងឆ្នាំ១៩៩៩ បានបញ្ចប់សញ្ញាបត្របណ្ឌិត ផ្នែកប្រវត្ដិសាស្ដ្រ-នយោបាយ។ លោក សុខ ទូច ចេះភាសាបរទេសចំនួនពីរ គឺភាសាអង់គ្លេស និងរុស្ស៊ី។

សម្រាប់ប្រវត្តិការងារវិញ គឺនៅឆ្នាំ២០០១ លោក សុខ ទូច ផ្ដើមធ្វើជាមន្ត្រីគ្រប់គ្រងរដ្ឋបាលនៅវិទ្យាស្ថានមនុស្សសាស្ដ្រ និងវិទ្យាសាស្ដ្រសង្គម នៃរាជបណ្ឌិត្យសភាកម្ពុជា។ ក្នុងនាមជាមន្ត្រីនៅរាជបណ្ឌិត្យសភាកម្ពុជា លោក សុខ ទូច ទទួលបានតួនាទីជាបន្តបន្ទាប់ ដូចជា ឆ្នាំ២០០៣ ជាប្រធានផ្នែកប្រវត្ដិសាស្ដ្រ និងវិទ្យាសាស្ដ្រនយោបាយ ឆ្នាំ២០០៥ ជាអនុប្រធានវិទ្យាស្ថានទំនាក់ទំនងអន្ដរជាតិ នៅឆ្នាំ២០១១ ជាប្រធានគណៈកម្មការវិទ្យាសាស្ត្រនយោបាយ នៃក្រុមប្រឹក្សាជាតិភាសាខ្មែរ នៅឆ្នាំ២០១២-២០១៣ ជាទីប្រឹក្សាអមទីស្តីការគណៈរដ្ឋមន្ត្រី ឆ្នាំ២០១៥ ជាប្រធានវិទ្យាស្ថានទំនាក់ទំនងអន្ដរជាតិកម្ពុជា និងនៅឆ្នាំ២០១៦ លោក កាន់មុខតំណែងជាអនុប្រធានរាជបណ្ឌិត្យសភាកម្ពុជា។ រហូតដល់ឆ្នាំ២០១៧  លោក ក៏ត្រូវបានប្រកាសតែងតាំងជាប្រធានរាជបណ្ឌិត្យសភាកម្ពុជា ហើយជាសមាជិកក្រុមប្រឹក្សាជាតិភាសាខ្មែរ ដល់បច្ចុប្បន្ននេះ។

ជាមួយគ្នានេះដែរ លោក សុខ ទូច ក៏បានបន្សល់ស្នាដៃបោះពុម្ពផ្សាយជាច្រើនផងដែរ រួមមាន ចលនាភូមិមួយផលិត ផលមួយ តួនាទីអង្គការសហប្រជាជាតិ ទ្រឹស្តីទំនាក់ទំនងអន្តរជាតិ ទំនាក់ទំនងរវាងកម្ពុជាជាមួយសហរដ្ឋអាមេរិក ចិន និងវៀតណាម ឆ្នាំ២០០៧ ទំនាក់ទំនងអន្តរជាតិ ៖ កម្ពុជាក្រោមក្រសែភ្នែកមហាអំណាច ទំនាស់ព្រំដែនរវាងប្រទេសថៃ និងប្រទេសជិតខាង នយោបាយការបរទេស៖ ម្សិលមិញ ថ្ងៃនេះ និងថ្ងៃស្អែក និងសៀវភៅអាស៊ាន-រុស្ស៊ី ក្នុងបរិបទពិភពលោកថ្មីជាដើម៕

ដោយ៖ ធឿន វ៉ាន់សុង