ព័ត៌មានជាតិ

ជំនន់ទឹកភ្លៀងជន់លិចផ្ទះសម្បែងជាង ៤០០ ខ្នង និងដំណាំកសិកម្មជាង ៣៤០០ ហិកតា នៅខេត្តព្រះវិហារ

បានផុស

៤ years មុន

នៅ

ថ្ងៃព្រហស្បតិ៍ ៦ តុលា ២០២២

ដោយ

យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយខេត្តព្រះវិហារ បានឲ្យដឹងថា គិតត្រឹមថ្ងៃទី ០៤ ខែតុលា ឆ្នាំ ២០២២ នេះ ជំនន់ទឹកភ្លៀងបានបណ្តាលឲ្យជន់លិចផ្ទះសម្បែងចំនួន ៤២៦ ខ្នងផ្ទះ ស្មើនឹង ១,៩១៥ គ្រួសារ និងដំណាំកសិកម្ម បានរងផលប៉ះពាល់ដល់ស្រូវរដូវវស្សាជាង ៣,៤២១ ហិកតា ស្មើនឹង ១,៦៨៧ គ្រួសារ ក្នុងនោះផ្ទៃដីខូចខាតចំនួន ៥១៤ ហិកតា, ដំណាំឧស្សាហកម្ម រងផលប៉ះពាល់ចំនួន ៦៣៩ ហិកតា ស្មើនឹង ៣០៥ គ្រួសារ ក្នុងនោះខូចខាត ១៨២ ហិកតា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះដែរ ជំនន់ទឹកភ្លៀង បណ្ដាលឲ្យលិចផ្លូវជាតិ និងផ្លូវខេត្ត ប្រវែង ៦៣០ ម៉ែត្រ ផ្លូវលំជនបទប្រវែង ១០,៦២៤ ម៉ែត្រ ក្នុងនោះខូចខាត ៤៥០ ម៉ែត្រ និងស្ពាន ០២ កន្លែង រងការជន់លិច។

លោក គីម រិទ្ធី អភិបាលខេត្តព្រះវិហារ បានចូលរួមសោកស្ដាយយ៉ាងក្រៃលែងជាមួយបងប្អូនប្រជាពលរដ្ឋទទួលរងគ្រោះដោយទឹកជំនន់ដែលជាគ្រោះធម្មជាតិបង្កឡើងដោយការប្រែប្រួលអាកាសធាតុ ធ្វើឲ្យមានការលិចលង់ដល់ផលដំណាំ ផ្ទះសម្បែង និងបាត់បង់នូវទ្រព្យសម្បត្តិ បង្កឲ្យរងផលប៉ះពាល់ដល់ជីវភាព និងការរស់នៅប្រកបរបរចិញ្ចឹមជីវិតប្រចាំថ្ងៃ។

ក្នុងឱកាសចុះពិនិត្យសិក្សាពីស្ថានភាពទឹកជំនន់ ក្រោយពីទឹកស្ទឹងសែនបន្ដហក់ឡើងយ៉ាងគំហុក និងនាំយកអំណោយផ្ដល់ជូនពលរដ្ឋរងការលិចលង់ផ្ទះសម្បែងនៅចំណុចអូរបាក់ ក្នុងសង្កាត់ប៉ាលហាល ក្រុងព្រះវិហារ ខេត្តព្រះវិហារ កាលពីថ្ងៃទី ០៥ តុលា លោក គីម វីរៈ អគ្គលេខាធិការ នៃគណៈកម្មាធិការជាតិគ្រប់គ្រងគ្រោះមហន្តរាយ បានផ្ដាំផ្ញើឲ្យប្រជាពលរដ្ឋត្រូវគិតគូរ និងយកចិត្តទុកដាក់ថែទាំសុខភាពឲ្យបានល្អ ព្រោះសុខភាពជាកត្តាចម្បងសម្រាប់យើងគ្រប់គ្នា លើសពីនេះ ត្រូវប្រុងប្រយ័ត្នឲ្យបានខ្ពស់ចំពោះសត្វអាសិរពិស និងកុំឲ្យមានការធ្វេសប្រហែសចំពោះកូនចៅតូចៗ ដើម្បីបង្ការគ្រោះថ្នាក់ដោយយថាហេតុ។ បន្ថែមពីនេះនៅពេលមានហេតុការណ៍អាក្រក់ណាមួយកើតឡើង ត្រូវប្រញាប់រាយការណ៍ទៅអាជ្ញាធរមានសមត្ថកិច្ច ដើម្បីជួយអន្តរាគមន៍សង្គ្រោះឲ្យបានទាន់ពេលវេលា៕

អត្ថបទ ៖ សំអឿន