អ្នកនាំពាក្យ ៖ ដើម្បីឲ្យមានការជឿទុកចិត្តកាន់តែខ្លាំងលើតុលាការ ក៏ត្រូវទាមទារឲ្យពលរដ្ឋមានចំណេះដឹងផ្នែកច្បាប់ដែរ

មន្ត្រីជាន់ខ្ពស់ក្រសួងយុត្តិធម៌ បានលើកឡើងថា ដើម្បីឲ្យមានការជឿទុកចិត្ត កាន់តែខ្លាំងលើប្រព័ន្ធតុលាការនោះ គឺត្រូវកែទម្រង់ប្រព័ន្ធតុលាការផង និងត្រូវឲ្យប្រជាពលរដ្ឋមានចំណេះដឹងផ្នែកច្បាប់ និងដំណើរការនីតិវិធីរបស់តុលាការ ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបនឹងសំណួរអ្នកសារព័ត៌មាន នៅក្នុងសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លង​មក របស់ក្រសួងយុត្តិធម៌” នាព្រឹកថ្ងៃទី ៧ ខែតុលានេះ លោក ជិន ម៉ាលីន រដ្ឋលេខា​ធិការ និងជាអ្នកនាំពាក្យក្រសួងយុត្តិធម៌ បានមានប្រសាសន៍ថា ការកែទម្រង់ច្បាប់ និងប្រព័ន្ធយុត្តិធម៌ គឺមានគោលដៅចង់ឲ្យមានប្រជាពលរដ្ឋ មានជំនឿទុកចិត្តកាន់តែខ្លាំងលើប្រព័ន្ធតុលាការ តាមរយៈការពង្រឹងគុណភាពសេវាយុត្តិធម៌។ ប៉ុន្តែការពង្រឹងនូវជំនឿទុកចិត្តលើប្រព័ន្ធតុលាការនោះ គឺត្រូវធ្វើទាំងកំណែទម្រង់តុលាការផង និងត្រូវពន្យល់ឲ្យប្រជាពលរដ្ឋ មានចំណេះដឹងផ្នែកច្បាប់ផង។

លោក ជិន ម៉ាលីន បានថ្លែងយ៉ាងដូច្នេះថា «ក៏ប៉ុន្តែពង្រឹងជំនឿទុកចិត្តហ្នឹង វាទាល់តែទៅទាំងពីរ ទីមួយ. យើងកែទម្រង់ជាមួយនឹងតុលាការផង ទីពីរ. គឺយើងធ្វើជាមួយប្រជាពលរដ្ឋ សាធារណជនដែរ ប្រសិ​នបើយើងកែតែតុលាការ ក៏ប៉ុន្តែប្រជាពលរដ្ឋអត់មានចំណេះដឹងផ្នែកច្បាប់ ការផ្សព្វផ្សាយច្បាប់របស់យើងអត់គ្រប់ជ្រុងជ្រោយ ប្រជាពលរដ្ឋគាត់អត់យល់ គាត់អត់ដឹងថា ធ្វើអាហ្នឹងទៅវាខុសច្បាប់ គាត់អត់យល់ដំណើរការនីតិវិធីរបស់តុលាការ អញ្ចឹងទេគាត់នៅតែមិនទុកចិត្ត ដោយសារតែគាត់មិនយល់»។

អ្នកនាំពាក្យក្រសួងយុត្តិធម៌ បានលើកឡើងជាឧទាហរណ៍ថា «នៅពេលប៉ូលីសចាប់នរណាម្នាក់បានហើយ ក្នុងទស្សនៈការគិតរបស់ប្រជាពលរដ្ឋ គាត់គិតថា អាហ្នឹងគឺថា ជាជនល្មើស គាត់មិនមែនគិតថា ជាជនសង្ស័យទេ ​ហើយបញ្ជូនដល់តុលាការ…តុលាការរកទៅថា អត់មានភស្ដុតាង អត់មានបទល្មើស​ ផ្អែកតាមការស្រាវជ្រាវគេដោះលែងចេញវិញ យើងច្បាស់ជាចោទតុលាការថា ពុករលួយ មានភាពមិនប្រក្រតី ហើយពេលខ្លះតុលាការដោះលែងឲ្យនៅក្រៅឃុំ គាត់អត់យល់ថា អាហ្នឹងជាការនៅក្រៅឃុំបណ្ដោះអាសន្ន ក៏ប៉ុន្តែ​មិនមែនបានន័យថា ឲ្យរួចខ្លួន​ទេ ស្ថិតនៅក្នុងដំណើរការនីតិវិធីតុលាការដដែល គាត់អត់យល់ គាត់ថា តុលាការហ្នឹង គាត់ពុករលួយ​ហើយ ហេតុអីក៏អានេះជាប់ឃុំ ហេតុអីក៏អានោះដោះ »។

ជាមួយគ្នានេះ លោក ជិន ម៉ាលីន បានលើកឡើងបន្ថែមថា ការជឿទុកចិត្តលើប្រព័ន្ធតុលាការ ក៏ត្រូវទាមទារនូវការយល់ដឹងផ្នែកច្បាប់ និងដំណើរការនីតិវិធីរបស់តុលាការ ពីសំណាក់ប្រជាពលរដ្ឋ និងសាធារណជនដែរ ដោយមិនអាចកែទម្រង់តែតុលាការមួយ អាចជោគជ័យនោះឡើយ៕

អត្ថបទ៖ ឃួន សុភ័ក្រ