កម្លាំងចម្រុះបន្តបង្ក្រាបបទល្មើសនេសាទ១០ កន្លែងក្នុងស្រុកជល់គីរី

សមត្ថកិច្ចចម្រុះរួមមានខណ្ឌរដ្ឋបាលជលផល និងផ្នែករដ្ឋបាលជលផលកំពង់ប្រសាទ សមត្ថកិច្ចនគរបាល និងសហគមន៍នេសាទនៅព្រឹកថ្ងៃទី០៩ ខែតុលា ឆ្នាំ២០២២ បានចុះបង្ក្រាបបទល្មើសនេសាទនៅក្នុងភូមិសាស្ត្រឃុំជលសារ និងឃុំព្រៃគ្រី ក្នុងស្រុកជលគីរី ដោយបានបំផ្លាញរបាំងសាច់អួនខុសច្បាប់ចំនួន១០កន្លែងមានប្រ វែង៥០០ម៉ែត្រ ។

លោក លី ឡា នាយខណ្ឌរដ្ឋបាលជលផលកំពង់ឆ្នាំង បានឲ្យដឹងថា នៅក្នុងកិច្ចប្រតិបត្តិការខាងលើនេះ បានប្រើប្រាស់កម្លាំងសរុបចំនួន០៩នាក់ មធ្យោបាយមានកាណូតបាឡាស្មាច់ចំនួន០២គ្រឿង ចុះល្បាត និងបង្ក្រាបបទល្មើសនេសាទ នៅចំនុចក្រោយភូមិកំពង់បាស្រូវ ឃុំជលសារ និងភូមិកោះធំ ឃុំព្រៃគ្រី ស្រុកជលគីរី ។

លទ្ធផលបានរុះរេីបំផ្លាញរបាំងស្បៃមុងចំនួន១០កន្លែង មានប្រវែង៥០០ម លបលូចំនួន១១គ្រឿង បង្គោល១៥០ដេីម និង ចាក់លែងកូនត្រីចម្រុះទៅក្នុងបឹងធម្មជាតិវិញចំនួន៤០គីឡូ ។

លោកនាយខណ្ឌរដ្ឋបាលជលផលកំពង់ឆ្នាំងបានបញ្ជាក់ថា អនុវត្តតាមបទបញ្ជា និងអនុសាសន៍ដ៏ខ្ពង់ខ្ពស់របស់សម្ដេចតេជោ នាយករដ្ឋមន្ត្រី ទីបញ្ជាការស្រាលចំនួន៥កន្លែងនៅក្នុងខេត្តកំពង់ឆ្នាំង នឹងបន្តបង្រាបបទល្មើសនេសាទនៅ ក្នុងភូមិសាស្ត្រខេត្តកំពង់ឆ្នាំងជារៀងរាល់ថ្ងៃដូចភ្លៀងរលឹម ដោយមិនអនុញ្ញាតឱ្យមានបទល្មើសនេសាទកើតមានយ៉ាងអាណាធិបតេយ្យនោះឡើយ៕

អត្ថបទ៖ ឈៀងថារិទ្ធ