លោកបណ្ឌិត សុខ ទូច ឱ្យសេណារីយ៉ូ ៣ ដើម្បីបញ្ចប់សង្គ្រាមឈ្លានពានរបស់រុស្ស៊ីនៅអ៊ុយក្រែន

ដើម្បីបញ្ចប់សង្គ្រាមឈ្លានពានរបស់រុស្ស៊ី នៅអ៊ុយក្រែន លោកបណ្ឌិត សុខ ទូច បានឱ្យសេណារីយ៉ូ ៣ ចំណុច ទី១ គឺពាក់ព័ន្ធនឹងអ្នកដុតសង្គ្រាមនេះឱ្យឆាបឆេះឡើង ទី២ គឺឆន្ទៈរបស់មេដឹកនាំរុស្ស៊ី និងអ៊ុយក្រែន ទី៣ គឺដំឡើងកម្លាំងឱ្យស្មើគ្នា។ លោកបណ្ឌិតបានលើកឡើងបែបនេះ នៅក្នុងកិច្ចពិភាក្សាតុមូល ស្តីពី សណ្ដាប់ធ្នាប់ពិភពលោកថ្មី និងភាពគ្រោះថ្នាក់នៃសង្គ្រាមនុយក្លេអ៊ែរ ដែលរៀបចំឡើងដោយរាជបណ្ឌិត្យសភា នាព្រឹកមិញនេះ។

ចំណុចទី១ “អ្នកណាអ្នកដុត អ្នកហ្នឹងត្រូវពន្លត់”។ បើតាមលោកបណ្ឌិត សុខ ទូច អ្នកដុតភ្លើងសង្គ្រាម មិនមែនរុស្ស៊ី និងអ៊ុយក្រែន នោះទេ គឺសហរដ្ឋអាមេរិក ដែលជាអ្នកដុតភ្លើងសង្គ្រាម និងផ្តល់ជំនួយដ៏ច្រើនសន្ធឹកសន្ធាប់ដល់អ៊ុយក្រែន ត្រូវបញ្ចប់សកម្មភាព។ លោកបន្តថា ជារឿងងាយស្រួលសម្រាប់អាមេរិក ក្នុងការបញ្ចប់សង្គ្រាមនេះ ដោយគ្រាន់តែប្រកាសថា មិនឱ្យភាគីអ៊ុយក្រែន ចូលជាសមាជិកណាតូ មិនពង្រីកខែលមីសុីល នោះសង្គ្រាមនឹងចប់ឯង។

រីឯចំណុចទី២ គឺឆន្ទៈរវាងរុស្សុី និងអ៊ុយក្រែន លោកបណ្ឌិតថា ភាគីទាំងពីរ ត្រូវតែនិយាយគ្នាពីការរក្សាសុខសន្តិភាពខ្លួន ទាំងសងខាង ដោយបញ្ឈប់គំនិត “យើងជាវីរៈជន” ត្រូវអាណិតប្រជាជន ហើយងាកមកធ្វើឱ្យប្រជាជនមានសេចក្តីសុខរួមគ្នាវិញ។

ចំណុចទី៣ គឺការដំឡើងកម្លាំងយោធា និងសព្វាវុធឱ្យស្មើគ្នា ដើម្បីកុំឱ្យប្រទេសមួយៗអួតអាងជាបន្តទៀត។​

អត្ថបទដោយ ៖ សុធាវី