លោក យឹម ឆៃលី៖ អត្រាស្គមស្គាំងកុមារ​អាយុក្រោម ៥ឆ្នាំ ជាបញ្ហាត្រូវដោះស្រាយ

វិស័យសន្តិសុខស្បៀង និងអាហារូបត្ថម្ភ បានដើរតួនាទីយ៉ាងសំខាន់ក្នុងការរួម​ចំណែក​អភិវឌ្ឍ​ន៍មូលធនមនុស្ស បង្កើនប្រសិទ្ធភាពការងារ ជំរុញកំណើន​សេដ្ឋកិច្ច និងវឌ្ឍនភាពសង្គម។

ជាក់ស្តែង បើប្រៀបធៀបកាលពី ២០ឆ្នាំមុន ពីប្រទេស​មានបញ្ហាអសន្តិសុខស្បៀង ឥឡូវបានក្លាយជាប្រទេស​នាំស្បៀងចេញ  ហើយពិន្ទុសន្ទទស្សន៍នៃភាពអត់ឃ្លាន​សកល​បានធ្លាក់ចុះពី ៤៣.៥%នៅឆ្នាំ២០០​០ មកត្រឹម ២០.៦% នៅឆ្នាំ២០២០, បញ្ហាក្រិសក្រិនកុមារអាយុក្រោម ៥ឆ្នាំ បានធ្លាក់ចុះពី ៥០% នៅឆ្នាំ២០០០ មកត្រឹម ២២% នៅឆ្នាំ២០២២, អត្រាមិនគ្រប់ទម្ងន់បានធ្លាក់ចុះពី២៤% មកត្រឹម ១៦% ប៉ុន្តែអត្រាស្គមស្គាំងកុមារអាយុក្រោម ៥ឆ្នាំ មានតួលេខដដែលគឺ ៩.៨% ចាប់ពីឆ្នាំ២០១៤ មកដល់ឆ្នាំ២០២១។ នេះជាការលើកឡើងរបស់លោក យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ។

ថ្លែងនៅក្នុងសិក្ខាសាលាស្តីពី “ការធ្វើការរួមគ្នាបំពេញកង្វះខាតផែនការសកម្មភាពសកលដើម្បីឆ្លើយតបចំពោះ​បញ្ហាស្គមស្គាំងរបស់កុមារ” នៅព្រឹកថ្ងៃទី ១៨ ខែ តុលា លោក យឹម ឆៃលី បានលើកឡើងថា ការអភិវឌ្ឍ ទីក្រុង ការធ្វើចំណាកស្រុក ការប្រែប្រួលអាកាសធាតុ ការបំរែបំរួលប្រជាសាស្រ្ត និង​ការរីកចម្រើនផ្នែកសេដ្ឋកិច្ច​ និងសង្គម បានធ្វើឲ្យប្រជាជន​កម្ពុជា​ផ្លាស់​ប្តូរ​របៀបរស់នៅ និងការហូបចុក។ ការ​ផ្លាស់ប្តូរ​ និងបម្រែបម្រួលទម្លាប់បុគ្គល និងសង្គមនេះ មាន​ឥទ្ធិពល​​លើ​ស្ថានភាពសន្តិសុខ​ស្បៀង និង​អាហារូបត្ថម្ភ ដែលតម្រូវឲ្យមានការយក​ចិត្តទុកដាក់​បន្ថែមទៀត លើការប្រយុទ្ធនឹងបញ្ហាកង្វះអាហារូបត្ថម្ភគ្រប់ទម្រង់ ហើយបញ្ហានេះបានធ្វើឲ្យប្រជាជនប្រឈម​នឹងបញ្ហាថ្មីៗ ដែលបង្កការគំរាមកំហែងដល់សុខភាព និងសក្ដានុពល​នៃកំណើនសេដ្ឋកិច្ច។

លោកបន្តថា ប្រសិនបើគ្មាន​ការយកចិត្តទុកដាក់លើសុខភាព សន្តិសុខ​ស្បៀង និងអាហារូបត្ថម្ភនោះទេ ផលលាភដែល​បានមកពីការអភិវឌ្ឍសេដ្ឋកិច្ច​នឹងត្រូវធ្លាក់ចុះ​ ដោយសារ​ការ​ខាតបង់​ដែលមិនអាច​មើលរំលងពី​បញ្ហាកង្វះ​អាហារូបត្ថម្ភ និង​បន្ទុក​​ចំណាយលើការថែទាំ និងព្យាបាលជំងឺមិនឆ្លងនានា ដូចជាជំងឺទឹកនោមផ្អែម ជំងឺដាច់សរសៃឈាមខួរក្បាល និងជំងឺបេះដូង ជាដើម។

បើតាមលោក យឹម ឆៃលី រយៈពេល ២០ឆ្នាំ​កន្លងទៅនេះ ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្នុងនាមជាប្រធាន ក្រុមការងារ​បច្ចេកទេសចម្រុះលើវិស័យសន្តិសុខស្បៀងនិងអាហារូបត្ថម្ភ បាន​សហការ​​យ៉ាងជិតស្និទ្ធ​ជាមួយ​ក្រសួង‑ស្ថាប័នពាក់ព័ន្ធនៅថ្នាក់ជាតិ និងថ្នាក់ក្រោមជាតិ អង្គការដៃគូអភិវឌ្ឍន៍ សង្គមស៊ីវិល និង​វិស័យឯកជន​ ធ្វើការ​​សម្របសម្រួល និងអនុវត្តគោលនយោបាយ​ និងយុទ្ធសាស្រ្ត​ជាអាទិភាព​នានា លើ​វិស័យ​សន្តិសុខស្បៀងនិង​អាហារូបត្ថម្ភ ។

រាជរដ្ឋាភិបាល តាមរយៈលោក យឹម ឆៃលី បានអំពាវនាវគ្រប់​ក្រសួង   ស្ថាប័នពាក់ព័ន្ធ រដ្ឋបាល​ថ្នាក់ក្រោមជាតិ អង្គការដៃគូអភិវឌ្ឍន៍ សង្គមស៊ីវិល វិស័យឯកជន សូមចូលរួមសហការជាមួយនឹងក្រុមប្រឹក្សាស្តារ​អភិវឌ្ឍន៍​វិស័យ​កសិក​ម្ម និង​ជនបទ បង្កើនការខិតខំប្រឹងប្រែងរួមគ្នា កៀរគរធនធានពីប្រភពនានា ដើម្បី​​អនុវត្តផែនការសកម្មភាពអាទិភាព​នៅក្នុងផែនទីបង្ហាញផ្លូវ ស្តីពីផែនការសកម្មភាព​សកល ឆ្លើយតបចំពោះបញ្ហាស្គមស្គាំងរបស់កុមារ, យុទ្ធសាស្ត្រជាតិ​ស្ដីពី​សន្តិសុខស្បៀង​និងអាហារូបត្ថម្ភ លើកទី២ ឆ្នាំ២០១៩ -២០២៣ និងឯកសារគតិយុត្តិនានា៕