ក្រសួង​លក់​លេខរថយន្តពិសេស​ជាង​ ២២ ​ម៉ឺន​លេខ រក​ចំណូល​​បាន​ជាង ៨២ លានដុល្លារ

នៅក្នុងរយៈពេល ៦ ឆ្នាំចាប់ពី​ខែកញ្ញា ឆ្នាំ២០១៦ ដល់ខែកញ្ញា ឆ្នាំ២០២២ ក្រសួងសាធារណការនិងដឹកជញ្ជួនបានចុះ​លេខ​បញ្ជីរថយន្តពិសេស និងលេខចុះបញ្ជីពិសេសផ្ទាល់ខ្លួនបានប្រមាណជាង ២២ ម៉ឺនលេខដោយទទួលបានប្រាក់ចំណូលជាង ៨២ លានដុល្លារអាមេរិក។

យោងតាមរបាយការណ៍របស់គណៈកម្មការអន្តរក្រសួង គិតចាប់តាំងពីខែកញ្ញា ឆ្នាំ២០១៦ ដល់ខែកញ្ញា ឆ្នាំ២០ ២២​នេះ លេខចុះបញ្ជីរថយន្ត (លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន) លក់បានចំនួន ២២៥ ១៧១ លេខ ទទួលបានចំណូលសរុប ចំនួន ៣២៩ ៦៧២ ៤៩៩ ០០០ រៀល ស្មើនឹង ៨២ ៤១៨ ១២៥ ដុល្លារអាមេរិក។ ដោយឡែកចំណូលពីការលក់លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន គិតត្រឹមខែកញ្ញា ឆ្នាំ២០២២ ទទួល​បានចំណូលថវិកាសរុបចំនួន ៦៤ ៦៣៨ ៩៧០ ៤០០ រៀល កើនឡើងប្រមាណ ៣០% ធៀបនឹងរយៈពេលដូចគ្នាក្នុងឆ្នាំ២០២១។

នៅក្នុង​កិច្ចប្រជុំ​ពិភាក្សា​ប្រចាំ​ខែកញ្ញា ឆ្នាំ​២០២២ ស្ដីពី​វឌ្ឍនភាព​នៃ​ការលក់​លេខ​ចុះបញ្ជី​រថយន្តកាលដើមសប្តាហ៍នេះ លោកស្រី កុយ សុដានី រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈកម្មការអន្តរក្រសួងគ្រប់គ្រងការលក់លេខចុះបញ្ជីរថយន្ត បានមានប្រសាសន៍ថាចំណូលពីការលក់លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួន ត្រូវបានចាក់បញ្ចូលក្នុងថវិកាជាតិ។

លោកស្រីបានបន្តថា ក្រសួងតែងតែជំរុញការលក់លេខចុះបញ្ជីរថយន្តឱ្យកាន់តែមានប្រសិទ្ធភាព សំដៅប្រមូលចំណូលជាតិ​ឱ្យបានច្រើនថែមទៀត ដោយក្នុងនោះការសិក្សាតម្លៃរក្សាលេខចុះបញ្ជីរថយន្ត ការស្ទង់មតិប្រជាពលរដ្ឋក្នុងការ​ទិញ​លេខ​ចុះបញ្ជីរថយន្ត ការផ្ដល់មតិយោបល់លើការរៀបចំពិព័រណ៍ខួប៣ឆ្នាំ ឆ្នាំ២០២០-២០២៣ ដើម្បីផ្សព្វផ្សាយឱ្យកាន់​តែទូលំទូលាយទៅកាន់ក្រុមហ៊ុន សហគ្រាស ក៏ដូចជាប្រជាពលរដ្ឋ ឱ្យបានយល់ដឹងកាន់តែច្បាស់អំពីការចុះបញ្ជីលេខពិសេស និងចុះបញ្ជីលេខពិសេសផ្ទាល់ខ្លួន និងការជំរុញលើកទឹកចិត្តមន្ត្រីជំនាញបច្ចេកវិទ្យាពង្រឹងសមត្ថភាពរបស់ខ្លួនឱ្យកាន់តែប្រសើរសំដៅផ្ដល់នូវការវិវឌ្ឍន៍ថ្មីៗទាក់ទងនឹងសង្គមឌីជីថល។

ការចុះបញ្ជីលេខពិសេស ត្រូវបានបែងចែកជាពីរ គឺលេខពិសេស  រាជធានី-ខេត្ត និងលេខពិសេសផ្ទាល់ខ្លួន ដែលបានអក្សរ”កម្ពុជា”។ ផ្លាកលេខពិសេសផ្ទាល់ខ្លួន ត្រូវបានបង្កើតឡើងសម្រាប់រថយន្តគ្រួសារ ដោយមានអក្សរ «កម្ពុជា» នៅផ្នែកខាងលើ និងការរួមបញ្ចូលគ្នានៃលេខឡាតាំង ឬអក្សរ ចាប់ពី១ ដល់៨ខ្ទង់នៅផ្នែកកណ្តាល ព្រមទាំងមាន QR Code នៅផ្នែកខាងស្តាំនៃផ្លាកលេខ ហើយផ្លាកលេខពិសេសនេះ ក៏អាចរក្សាទុកបាននៅពេលដែលមានការផ្ទេរកម្មសិទ្ធិរថយន្តផងដែរ៕

អត្ថបទ៖ សំអឿន

​