សម្ដេចតេជោ ហ៊ុន សែន បញ្ជាក់យ៉ាងច្បាស់ៗថា មិនលើកលែងទោសឲ្យលោក សម រង្ស៊ី ទៀតឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់យ៉ាងច្បាស់ៗថា សម្ដេច នឹងមិនលើកលែងទោសឲ្យលោក សម រង្ស៊ី ដែលជាទណ្ឌិតទៀតឡើយ ដោយសារបុគ្គលនេះមិនព្រមកែប្រែ ហើយនៅបន្តបំផ្លិចបំផ្លាញកម្ពុជា បន្តទៀត។

បន្ទាប់ពីប្តូរព័ត៌មានថ្ងៃខែឆ្នាំកំណើត ក្នុងបញ្ជីឈ្មោះបោះឆ្នោត នាព្រឹកថ្ងៃទី ២០ ខែតុលានេះរួចមក សម្ដេចតេជោ ហ៊ុន សែន បានថ្លែងថា គ្មានផ្លូវនោះទេដែលសម្ដេច នឹងលើកលែងទោសឲ្យលោក សម រង្ស៊ី ដែលជាទណ្ឌិតរត់គេចខ្លួននៅក្រៅប្រទេសទៀតនោះ ពីព្រោះបុគ្គលនេះមិនព្រមរាងចាល ហើយនៅបន្តបំផ្លិចបំផ្លាញកម្ពុជា ថែមទៀត។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «No,Way អត់មានផ្លូវទេ ខ្ញុំធ្លាប់បានអនុគ្រោះឲ្យជនក្បត់ជាតិនេះ ២ដងរួចស្រេចទៅហើយ តែជនក្បត់ជាតិនេះ មិនត្រឹមតែមិនធ្វើការកែប្រែ ក៏ប៉ុន្តែពួកគេនៅបន្តការបំផ្លិចបំផ្លាញកម្ពុជា ដូច្នេះខ្ញុំមិនត្រឹមមិនលើកលែង លើកដៃលើកលែង ចុះហត្ថលេខាលើកលែងទោសឲ្យជនក្បត់នេះតែប៉ុណ្ណោះទេ ប៉ុន្តែខ្ញុំកំពុងតែបំផុសចលនា ដើម្បីនឹងកំចាត់ចោលនូវមនោគមន៍វិជ្ជាជ្រុលនិយម នៃជនក្បត់ ៣ជំនាន់»។

សម្ដេចតេជោ ហ៊ុន សែន បានថ្លែងបន្តថា ក្នុងរយៈពេលប៉ុន្មានថ្ងៃកន្លងមកនេះ មានការគាំទ្រយ៉ាងផុលផុស ក្នុងចលនាកំចាត់ចោលនូវមនោគមន៍វិជ្ជាជ្រុលនិយម នៃជនក្បត់ ៣ជំនាន់​នេះ។ សម្ដេចតេជោ ហ៊ុន សែន បានថ្លែងទៀតថា «ប៉ុន្មានថ្ងៃនេះ មានការគាំទ្រយ៉ាងសស្រាក់​សស្រាំ ទាំងសម្ដេចព្រះសង្ឃ​រាជ បួរ គ្រី ក៏ព្រះអង្គបានគាំទ្រ​នូវដំណើរការ ព្រោះយើង ប្រទេសរបស់យើង ដើម្បីធានានូវសន្តិភាពបាន ចាំបាច់ណាស់ត្រូវកំចាត់ចោលនូវនយោបាយជ្រុលនិយម»។

សម្ដេចតេជោ ហ៊ុន សែន បានគូសបញ្ជាក់ទៀតថា ប្រទេសកម្ពុជា ដើម្បីធានាសន្តិភាព និងស្ថិរភាពយូរអង្វែង ចាំបាច់ត្រូវបំផ្លាញចោលនូវមនោគមន៍វិជ្ជាជ្រុលនិយម ដោយត្រូវកំចាត់ចោលតែម្ដង។ សម្ដេចតេជោ ហ៊ុន សែន បានបញ្ជាក់ទៀតថា «ចឹងខ្ញុំអាចសន្មត់បានថា មនុស្សនេះចោលឆ្អឹងក្រៅស្រុក សូមកុំសង្ឃឹម»៕

អត្ថបទ៖ ឃួន សុភ័ក្រ