រដ្ឋបាលខេត្តតាកែវ គ្រោងរៀបចំព្រះរាជពិធីបុណ្យអុំទូក នៅទន្លេបាទី រយៈពេល ២ថ្ងៃ

រដ្ឋបាលសាលាខេត្តឱ្យដឹងថា ខេត្តតាកែវនឹងរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅទន្លេបាទី រយៈពេល ២ថ្ងៃ ចាប់ពីថ្ងៃទី៦ ទី៧ ខែវិច្ឆិកា ឆ្នាំ២០២២ខាងមុខនេះ។

នៅថ្ងទី២០ ខែតុលានេះ ក្រោមអធិបតីភាព លោក អ៊ូច ភា អភិបាល នៃគណៈអភិបាលខេត្តតាកែវ និងមានការចូលរួមដោយមន្ត្រីចំណុះរដ្ឋបាលសាលាខេត្ត អភិបាលរងខេត្តជាច្រើនរូប ប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងប្រដាប់អាវុធទាំង ៣ប្រភេទ អភិបាល អភិបាលរងក្រុងស្រុក និងមន្ត្រីជំនាញពាក់ព័ន្ធ ក្នុងកិច្ចប្រជុំ ស្តីពីការត្រៀមរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅទន្លេបាទី ស្រុកបាទី។

លោកអភិបាលខេត្ត បានធ្វើការណែនាំបន្ថែមដល់អស់ លោក លោកស្រី និងអ្នកពាក់ព័ន្ធនៅក្នុងគណៈកម្មការ និងអនុគណៈកម្មការខេត្តរៀបចំព្រះរាជពិធីបុណ្យអុំទូកនេះ សូមចូលរួមសហការគ្នាឱ្យបានល្អ ធ្វើយ៉ាងណាឱ្យដំណើរការនៃការរៀបចំព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុកនេះ ប្រព្រឹត្តទៅដោយរលូន ពិសេសសូមអាជ្ញាធរក្រុងស្រុក ក្នុងនាមគណៈបញ្ជាការឯកភាពរដ្ឋបាលក្រុងស្រុក និងកងកម្លាំងប្រដាប់អាវុធទាំង ៣ប្រភេទ ត្រូវតែពង្រឹងសន្តិសុខឱ្យបានល្អរឹងមាំ ដើម្បីធានាបាននូវសុខសុវត្ថិភាពជូនប្រជាពលរដ្ឋ ដែលពួកគាត់នឹងអញ្ជើញមកទស្សនាពិធីបុណ្យអុំទូកនេះ ពិសេសត្រូវត្រៀមក្រុមគ្រូពេទ្យប្រចាំការ៕

អត្ថបទ៖ វីរៈ