បុរសដែលបើករថយន្តរេចុះរេឡើងពេញផ្លូវល្បឿនលឿន ត្រូវសមត្ថកិច្ចកោះហៅទៅផាកពិន័យហើយ

ក្រសួងសាធារណការ និងដឹកជញ្ជូន បានឲ្យដឹងថា ម្ចាស់រថយន្ត ដែលបើករេចុះរេឡើងពេញផ្លូវល្បឿន​លឿន ត្រូវបានសមត្ថកិច្ចកោះហៅមកធ្វើការផាកពិន័យ ដកពិន្ទុ អប់រំណែនាំ និងចុះកិច្ចសន្យាហើយ។

យោងតាមសេចក្តីរាយការណ៍ របស់កងកម្លាំងសមត្ថកិច្ច នៃក្រុមប្រតិបត្តិការនគរបាលចរា​ចរណ៍ ផ្លូវល្បឿនលឿនភ្នំពេញ -ក្រុងព្រះសីហនុ បានឲ្យដឹងថា ករណីម្ចាស់រថយន្តម៉ាក Toyota Prius ដែលបានបើកបរប្តូរគន្លងទៅមក រេចុះរេឡើងពេញផ្លូវ (កៀរ) កាលពីថ្ងៃទី ២៧ ខែតុលា ឆ្នាំ ២០២២កន្លងទៅ ត្រូវបានកំណត់អត្តសញ្ញាណ និងកោះ ហៅមកធ្វើការផាកពិន័យ ដកពិន្ទុពីបណ្ណបើកបរ អប់រំណែនាំ និងចុះកិច្ចសន្យារួចរាល់ហើយ។ នេះបើយោងតាម ទំព័រហ្វេសប៊ុករបស់ក្រសួងសាធារណការ និងដឹកជញ្ជូន ដែលបានផ្សព្វផ្សាយឲ្យដឹងនៅថ្ងៃទី ៣១ ខែតុលានេះ។

បើតាមក្រសួងសាធារណការ និងដឹកជញ្ជូន បុរសជាអ្នកបើកបរផ្ទុយពីសេចក្តីណែនាំ និងច្បាប់ចរា​ចរណ៍រូបនោះ ត្រូវបានផាកពិន័យ និងដកពិន្ទុពីបណ្ណបើកបរចំនួន ៤ពិន្ទុ លើ ២ករណី រួមមាន៖ ១. បើកបរប្តូរគន្លងទៅមក រេចុះរេឡើងពេញផ្លូវ, ២. បណ្ណបើកបរផុតសុពលភាព។

ក្រសួងសាធារណការ និងដឹកជញ្ជូន បានក្រើនរំលឹកជាថ្មីម្តងទៀត ចំពោះអ្នកបើកបរយានយន្តគ្រប់រូប មិនថាលើផ្លូវល្បឿនលឿន ឬផ្លូវប្រភេទណាឡើយ ត្រូវតែគោរពច្បាប់ចរាចរណ៍ផ្លូវគោក និងគោលការណ៍សុវត្ថិភាពក្នុងការបើកបរ ឲ្យបានម៉ឺងម៉ាត់ជាទីបំផុត ដើម្បីជៀសវាងគ្រោះថ្នាក់ចរាចរណ៍ និងទទួលបានសុវត្ថិភាព ក្នុងការធ្វើដំណើរទាំងអស់គ្នា៕