បើកបរលើផ្លូវល្បឿនលឿន យានយន្តត្រូវភ្ជាប់ជាមួយនូវឯកសារសំខាន់ៗទាំងនេះ

ការបើកបរលើផ្លូវល្បឿនលឿនភ្នំពេញ-ព្រះសីហនុ នឹងចាប់ផ្តើមគិតថ្លៃសេវាពីថ្ងៃទី០១ វិច្ឆិកា ឆ្នាំ២០២២ នេះទៅហើយ។ បើតាមការផ្សព្វផ្សាយរបស់ក្រសួងសាធារណការ និងដឹកជញ្ជូន រាល់យានយន្តចូលប្រេីប្រាស់ផ្លូវល្បឿនលឿន ត្រូវមានផ្លាកលេខសម្គាល់យានយន្ត ត្រួតពិនិត្យលក្ខណៈបច្ចេកទេស (ឆៀក) មានសុពលភាព និងកាតព្វកិច្ចផ្សេងៗទៅតាមផ្លូវច្បាប់ដែលបានកំណត់។

លើសពីនេះទៀតចំណុចសំខាន់ៗ ដែលបើកបរយានយន្តត្រូវដឹង មុនពេលបើកបរលើផ្លូវល្បឿនលឿន ភ្នំពេញ-ក្រុងព្រះសីហនុ គឺត្រូវពិនិត្យមើលយានយន្តរបស់ខ្លួន ជាជំហានដំបូងបង្អស់ ដោយត្រូវ​ពិនិត្យ​លើប្រព័ន្ធសុវត្ថិភាពរថយន្ត រួមមាន កង់​រថយន្ត​ ​ភ្លើង​សញ្ញា​ប្ដូរ​ទិស​ដី​ ​ភ្លើង​ហ្វ្រាំ​ង​ភ្លើង​ហ្វា​-​កូត​ ​និង​ខ្សែ​ក្រ​វ៉ាត់​សុវត្ថិភាព​ ​ព្រម​ទាំង​ត្រូវ​មាន​បំពង់​ពន្លត់​ អគ្គិភ័យ​ជាដើម។ អ្នកបើកបរយានយន្តទាំងអស់ ត្រូវប្រាកដថា ឆៀកនៅមានសុពលភាព សំបកកង់មិនមាន ស្នាមប្រេះ ប៉ោង និងមានក្រឡាល្អ សម្ពាធខ្យល់ក្នុងកង់មិនតឹង ឬធូរពេក។ មួយវិញទៀត ត្រូវត្រួតពិនិត្យកម្រិតទឹក ប្រេងម៉ាស៊ីន និងប្រេងឥន្ធនៈ (ប្រាកដថាគ្រប់គ្រាន់) និងត្រូវពាក់ខ្សែក្រវាត់សុវត្ថិភាពទាំងអ្នកបើកបរ និងអ្នករួមដំណើរ។

ក្រសួងសាធារណៈការ និងដឹកជញ្ជូន ណែនាំឱ្យអ្នកបើកបរលើផ្លូវល្បឿនលឿនទាំងអស់ ត្រូវដឹងពីលក្ខខណ្ឌ នៃការកំណត់ល្បឿន ដោយល្បឿនទាបបំផុតអប្បរមា (យឺតបំផុត) ល្បឿន ៦០-១២០គីឡូម៉ែត្រ/ម៉ោង។ តាមការបញ្ជាក់ សម្រាប់រថយន្តគ្រួសារ​ អាចបើកបរក្នុងល្បឿនលឿនបំផុត ១២០គីឡូម៉ែត្រ/ម៉ោង ខណៈល្បឿនទាបបំផុត ៦០គីឡូម៉ែត្រ/ម៉ោង។ ដោយឡែកសម្រាប់រថយន្តកុងតឺន័រមានសណ្តោង អាចបើកបរក្នុងល្បឿនត្រឹមតែ ៨០គីឡូម៉ែត្រ/ម៉ោង និងសម្រាប់រថយន្តធំអត់មានសណ្តោង អាចបើកបរក្នុងល្បឿន ១០០គីឡូម៉ែត្រ/ម៉ោង។

ផ្លូវល្បឿនលឿន​ ភ្នំពេញ-ក្រុងព្រះសីហនុ​ ចាប់ផ្តេីមគិតកម្រៃ​សេវា ដោយបញ្ចុះតម្លៃសេវាចំនួន ២០% រយៈពេល ១ឆ្នាំពេញ គិតចាប់ថ្ងៃទី០១ ខែវិច្ឆិកា ឆ្នាំ២០២២ ដល់ថ្ងៃទី៣១ ខែតុលា ឆ្នាំ២០២៣ ហើយការបង់ប្រាក់នឹងត្រូវធ្វេីឡេីង​តាមចម្ងាយជាក់ស្តែង​ និងទៅតាមប្រភេទយានយន្ត៕