អភិបាលខេត្តព្រៃវែង ផ្ទេរតួនាទីអភិបាលស្រុកមួយចំនួន​ដើម្បីពង្រឹងការងារអភិវឌ្ឍស្រុក

ព្រៃវែង ៖ នៅថ្ងៃទី ២ ខែវិច្ឆិកា ឆ្នាំ២០២២ លោក ជា សុមេធី អភិបាលខេត្តព្រៃវែង បានអញ្ជើញជាអធិបតី ប្រកាសផ្ទេភារកិច្ច មុខតំណែងអភិបាលស្រុកថ្មី គឺស្រុក ពាមជរ និងស្រុកពារាំង ដើម្បីផ្លាស់ប្តូរបទពិសោធ៍ការងារ ដល់មន្ត្រីរដ្ឋបាលស្រុក នៃខេត្តព្រៃវែង។

ដោយយោងតាមសេចក្តីប្រកាសរបស់នាយកទីចាត់ការគ្រប់គ្រងធនធានមនុស្សសាលាខេត្តព្រៃវែង បានសម្រេច​តែងតាំងលោក វ៉ា ធីម អភិបាលរងស្រុកពាមរក៍ ជាអភិបាលនៃគណៈអភិបាលស្រុកពាមជរ ជំនួសលោក សេង ធា អភិបាលស្រុកពាមជរ ដែលត្រូវទៅបំពេញតួនាទីថ្មីនៅសាលាខេត្តព្រៃវែង និងតែងតាំងលោក ចេម ប្រា ជាអភិបាលស្រុកពារាំង ជំនួសលោក ហ៊ី ធួក អភិបាលស្រុកដែលត្រូវតែងតាំងជាអភិបាលរងខេត្តព្រៃវែង។

ថ្លែងនៅក្នុងឱកាសនោះ លោក ជា សុមេធី អភិបាលខេត្តព្រៃវែង បានណែនាំដល់លោកអភិបាលស្រុក ដែលទទូល​បានដំណែងថ្មី ត្រូវមានទំនាក់ទំនងល្អជាមួយអាជ្ញាធរមូលដ្ឋាន និងក្នុងអង្គភាពរបស់ខ្លួន   ព្រមទាំងត្រូវ​បែងចែកតួនាទីគ្នាធ្វើការឲ្យបានច្បាស់លាស់  និងត្រូវពង្រឹងបន្ថែមទៀត លើការងារបង្ក្រាបបទល្មើសផ្សេងៗ ជាពិសេសបទល្មើសគ្រឿងញៀន និងល្បែងស៊ីសងគ្រប់ប្រភេទ ដែលជាដើមចម បង្កើតឱ្យមានបញ្ហា​ជាច្រើននៅ​ក្នុងមូលដ្ឋាន។

ក្រៅពីការងារបង្ក្រាបបទល្មើសនេះ លោកអភិបាលខេត្ត ក៏បានផ្តាំផ្ញើដល់អាជ្ញាធរគ្រប់ស្រុកទាំងអស់ ត្រូវសិក្សា​ឱ្យដឹងពីតម្រូវការរបស់ប្រជាពលរដ្ឋនៅក្នុងមូលដ្ឋានរបស់ខ្លួន ហើយដោះស្រាយជូន​ពលរដ្ឋឱ្យបាន​ទាន់ពេលវេលា ជាពិសេសបងប្អូនប្រជាពលរដ្ឋដែលរស់នៅតាមដីកោះ ដោយប្រើប្រាស់ទូកដរជាមធ្យោបាយឆ្លងកាត់ គឺត្រូវបង្កើន​ឧបករណ៍ការពារសុវត្ថិភាពឱ្យបានខ្ពស់ថែមទៀត ជៀសវាងកុំឱ្យមានគ្រោះ ដូចករណីលិច​ទូកដរនៅ​ស្រុកលើកដែក ខេត្តកណ្តាល ដែលបណ្តាលឱ្យក្មេងៗសិស្សសាលា ជួបគ្រោះអកុសល ស្លាប់បាត់បង់​ជីវិតជាច្រើននាក់នោះ៕ អត្ថបទ៖ សៅគ្រី