សម្ដេចតេជោ បង្ហាញនាឡិកាដៃផ្គុំឡើងដោយអ្នកបច្ចេកទេសខ្មែរ សម្រាប់ជូនប្រធានគណៈប្រតិភូចូលរួមកិច្ចប្រជុំកំពូលអាស៊ាន

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ និងជាប្រធានអាស៊ានឆ្នាំ ២០២២ បានបង្ហាញនូវនាឡិកាដៃ ដែលផ្គុំឡើងដោយអ្នកបច្ចេកទេសខ្មែរ សម្រាប់ធ្វើជាវត្ថុអនុស្សាវរីយ៍ ជូនប្រធានគណៈប្រតិភូចូលរួមកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំពាក់ព័ន្ធ ចាប់ពីថ្ងៃទី ១០ ដល់ថ្ងៃទី ១៣ ខែ វិច្ឆិកា ឆ្នាំ ២០២២ នៅរាជធានីភ្នំពេញ។

សម្ដេចតេជោ ហ៊ុន សែន បានបង្ហោះសារនៅលើទំព័រហ្វេសប៊ុក កាលពីថ្ងៃទី ៣ ខែវិច្ឆិកាថា «មុននេះខ្ញុំបាននិយាយថា កម្ពុជាបានផលិតនាឡិកាដៃចំនួន ២៥គ្រឿង សម្រាប់ជាវត្ថុអនុស្សាវរីយ៍ជូនប្រធានគណៈប្រតិភូដែលអញ្ជើញមក ចូលរួមប្រជុំកំពូលអាស៊ាននៅកម្ពុជាឆ្នាំ ២០២២»។

សម្ដេចតេជោ ហ៊ុន សែន បានសរសេរឲ្យដឹងទៀតថា «នាឡិកានេះ ត្រូវបានរៀបចំផ្គុំឡើងដោយអ្នកបច្ចេកទេសខ្មែរសុទ្ធសាធ ដែលជាផ្នែកមួយនៃការរីកចម្រើនខាងវិទ្យាសាស្រ្ត និងបច្ចេកទេសរបស់កម្ពុជា (ខ្មែរធ្វើបាន)។ ជូនភ្ជាប់រូបភាពនាឡិកាដើម្បីស្គាល់ជាមុន»។

កាលពីថ្ងៃទី ១១ ខែតុលាកន្លងទៅនេះ សម្តេចតេជោ ហ៊ុន សែន បានប្រកាសឲ្យដឹងថា ប្រទេសកម្ពុជា បានផលិតតនាឡិកាចំនួន ២៥គ្រឿង សម្រាប់ជូនមេដឹកនាំកំពូលអាស៊ាន និងថ្នាក់ដឹកនាំស្ថាប័នអន្តរជាតិសំខាន់ៗមួយចំនួនទៀត។

បើតាមសម្ដេចតេជោ ហ៊ុន សែន នាឡិកាទាំង ២៥គ្រឿងនោះ គឺម៉ាកអាស៊ាន ​តែត្រូវបានដាក់ថា Made in Cambodia ដើម្បីឲ្យគេបា​នដឹងថា បច្ចុប្បន្ននេះកូនខ្មែរអាចផលិតនាឡិកាបាន ហើយនៅថ្ងៃប្រជុំកំពូលអាស៊ាន សម្ដេចនឹងពាក់នាឡិកាម៉ាកអាស៊ាន នោះតែម្តង៕