៧ ​បទ​ប្បញ្ញត្តិ​ បេក្ខជន​ត្រូវ​អនុវត្ត​ បើមិនចង់មានបញ្ហាធំ ពេល​ប្រឡង​បាក់ឌុប

ដំណើរការ​សំណេរ​​នៃ​ការ​ប្រឡង​សញ្ញាបត្រ​មធ្យម​សិក្សា​ទុតិយភូមិ ឬការប្រឡងបាក់ឌុប មានរយៈពេល ២ថ្ងៃ នឹងចាប់ផ្ដើមពីថ្ងៃទី៥ ខែធ្នូ ឆ្នាំ២០២២នេះ។ ដើម្បី​ឱ្យការប្រឡងសញ្ញាបត្រមធ្យមសិក្សាទុតិយភូមិរបស់ខ្លួនប្រព្រឹត្តិទៅដោយរលូន និងមិនមានបញ្ហាអ្វីនោះ បេក្ខជនទាំងអស់ គប្បី​អនុវត្ត និងគោរពបទប្បញ្ញត្តិ ចំនួន ៧ ចំណុច តាមការកំណត់របស់ក្រសួងអប់រំ យុវជន និងកីឡា ដូចជា៖

១. ត្រូវមកដល់មណ្ឌលប្រឡងឱ្យបានមុនដំណើរការប្រឡង និងត្រូវមកដល់ មណ្ឌលប្រឡងឱ្យបានមុនបេក្ខជនទូទៅ ចំពោះបេក្ខជនដែលបានប៉ះពាល់ផ្ទាល់ ជាមួយអ្នកវិជ្ជមានកូវីដ-១៩ និងបេក្ខជនដែលមានកម្ដៅលើសពី ៣៧,៥អង្សាសេ ឬមានរោគសញ្ញាដូចជាក្អក ហៀរសំបោរ ឈឺបំពង់ក ពិបាកដកដង្ហើម… ដើម្បី ទទួលការស្ទង់កំដៅ និងឆែកឆេរសំណៅឯកសារមុនគេ និងដាច់ដោយឡែកពីគេ។

២. ត្រូវស្លៀកពាក់ឯកសណ្ឋានសិស្ស ដោយប្រើអាវពណ៌ស និងខោ ឬសំពត់ ពណ៌ខៀវ ដាក់ក្នុងខោ ឬសំពត់ឱ្យបានត្រឹមត្រូវ។

៣. ត្រូវយកមកនូវប័ណ្ណសម្គាល់ខ្លួនថ្នាក់ទី១២ មានបិទរូបថតថ្មី និងមានចុះ ហត្ថលេខានាយក នាយិកាសាលាត្រឹមត្រូវច្បាស់លាស់។ ចំពោះបេក្ខជនស្វៃរិន ចំណេះទូទៅ និងបំពេញវិជ្ជា ត្រូវយកមកនូវសលាកបត្រឯកត្តជន ឬប័ណ្ណសម្គាល់ខ្លួនជាសិស្ស ដែលចេញដោយមន្ទីរអប់រំ យុវជន និងកីឡារាជធានី-ខេត្ត។

៥. ត្រូវយកចូលក្នុងបន្ទប់ប្រឡងនូវសម្ភារៈប្រើប្រាស់ដែលក្រសួងអប់រំ យុវជន និងកីឡា អនុញ្ញាត់ឱ្យប្រើ៖ ប៊ិកពណ៌ខៀវ ខ្មៅដៃ បន្ទាត់ ដែកឈាន រ៉ាបព័រទ័រ ម៉ាស់ ជែលលាងដៃ ឬអាល់កុល។

៥. ត្រូវអនុវត្តតាមការណែនាំរបស់គណៈមេប្រយោគ និងអ្នកមានសមត្ថកិច្ចថែរក្សា សណ្ដាប់ធ្នាប់ ក្នុងការដកហូតសំណៅឯកសារ សម្ភារៈផ្សេងៗ ដែលក្រសួងមិន អនុញ្ញាតឱ្យយកចូលក្នុង​មណ្ឌលប្រឡង ឬបន្ទប់ប្រឡង។

៦. ត្រូវគោរពតាមការណែនាំរបស់អនុរក្ស ដូចជាអង្គុយចំលេខតុ ដែលអនុរក្សបានបង្ហាញ បំពេញលើក្បាលសន្លឹកកិច្ចការដែលអនុរក្សបានចែកឱ្យ ប្រគល់សន្លឹកកិច្ចការជូនអនុរក្សវិញ នៅពេលដល់ម៉ោង ទោះបីកិច្ចការនោះបានធ្វើ ឬពុំបានធ្វើក៏ដោយ។

៧. ត្រូវរក្សាសណ្ដាប់ធ្នាប់ របៀបរៀបរយនៃការប្រឡង និងត្រូវគោរពឱ្យបានត្រឹមត្រូវ​នូវ​បទប្បញ្ញត្តិនៃការប្រឡង។

គួរបញ្ជាក់ថា បេក្ខជនប្រឡងបាក់ឌុបសរុបមានចំនួន ១២៨ ១៣៦ នាក់ ស្រី ៦៨ ៧៧៣ នាក់ ក្នុងនោះថ្នាក់វិទ្យាសាស្រ្ត ៤២ ៩៣៦ នាក់ ស្រី ២៥ ៤៤៥ ថ្នាក់វិទ្យាសាស្រ្តសង្គម ៨៥ ២០០ នាក់ ស្រី ៤៣ ៣២៨ នាក់ ចែកជា ២២១ មណ្ឌល កើន១៧ មណ្ឌល និងមានបន្ទប់ ៥ ១៧៤​ បន្ទប់ កើនឡើង ៥៥៩ បន្ទប់។ ក្នុងនោះថ្នាក់វិទ្យាសាស្រ្ត កើន៣ មណ្ឌលនិងថ្នាក់វិទ្យសាស្រ្តសង្គម កើន១៤ មណ្ឌលដោយថ្នាក់វិទ្យាសាស្រ្តមាន ៧៦មណ្ឌល ស្មើនឹង ១ ៧៤៣ បន្ទប់ និងថ្នាក់វិទ្យាសាស្រ្តសង្គមមាន ១៤៥ មណ្ឌល ស្មើនឹង ៣ ៤៣១ បន្ទប់៕