ព័ត៌មានជាតិ

មើលតែសំបកក្រៅលក់ទឹកក្រូចធម្មតា តែចំណូលវិញហួសពីការស្មាន

បានផុស

២ សប្តាហ៍ មុន

នៅ

ថ្ងៃពុធ ២៣ វិច្ឆិកា ២០២២

ដោយ

ការរកស៊ីខ្លះ មិនអាចមើលតែសំបកក្រៅបានទេ។ ដូចអ្នកលក់ទឹកក្រូចច្របាច់ស្រស់ មួយខែអាចរកចំណូលប្រមាណជិត ៥០០ដុល្លារអាមេរិក តាមរយៈរបរហាលវាលហាលក្តៅនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកស្រី ហួន ជឿន មានវ័យជាង ៤០ ដែលមានស្រុកកំណើតនៅខេត្តកំពង់ធំបានឱ្យ «កម្ពុជាថ្មី» ដឹងថា អ្នកស្រីបានមករស់នៅរាជធានីភ្នំពេញតាំងពីកំឡុងឆ្នាំ២០០០ រហូតមកដល់ពេលបច្ចុប្បន្នជាង ២០ ឆ្នាំមកហើយ។ អ្នកស្រីនិងស្វាមី បានចាប់យកមុខរបរជាអ្នកលក់ទឹកក្រូចច្របាច់តាំងពីឆ្នាំ ២០១៥ មក។

មានប្រវត្តិធ្លាប់ធ្វើការក្នុងក្រុមហ៊ុនមួយ ជាអ្នកលក់កាហ្វេធម្មជាតិ នាំចូលមកពីខេត្តមណ្ឌលគិរីផ្ទាល់ ដោយកិនចេញជាគ្រាប់សុទ្ធ ប៉ុន្តែដោយសារព្រួយបារម្ភអំពីសុខភាព ទើបអ្នកស្រី ហួន ជឿន សម្រេចចិត្តមកធ្វើជាអ្នកលក់ទឹកក្រូចច្របាច់ស្រស់វិញ។

អ្នកស្រី ហួន ជឿន បានប្រាប់ពីមូលហេតុការចាប់យកមុខរបរមកធ្វើជាអ្នកលក់ទឹកក្រូចស្រស់ ដោយយល់ឃើញថា មនុស្សនាពេលបច្ចុប្បន្ននេះ កំពុងព្យាយាមកាត់បន្ថយគ្រឿងកំប៉ុងផ្សេងៗដែលនាំឱ្យប៉ះពាល់ដល់សុខភាព។

ក្នុងមួយថ្ងៃអ្នកស្រី ជឿន អាចលក់បានចន្លោះពី ៥០ ទៅ ៦០ដប មិនទៀងទាត់អាស្រ័យទៅលើស្ថានភាពអាកាសធាតុ ហើយទឹកក្រូចស្រស់មួយដបអ្នកស្រីលក់ក្នុងតម្លៃ ៦ ពាន់រៀល។ ១ ខែស្រ្តីរូបនេះអាចរកចំណូល ៤០០ដុល្លារអាមេរិក ទៅ ៥០០ដុល្លារ ដែលអាចយកមកផ្គត់ផ្គង់ជីវភាពនៅក្នុងគ្រួសារនិងតម្រូវការផ្សេងៗ។

ពាក់ព័ន្ធមុខរបរនេះ អ្នកស្រី ហួន ជឿន ចង់ឱ្យមនុស្សមួយចំនួនតូចបានយល់ពីរបស់ធម្មជាតិ ជួយគាំទ្ររបស់ដែលធ្វើចេញភ្លាមៗ និងឱ្យតម្លៃដល់អ្នកដែលប្រកបរបរជាអ្នកលក់នៅតាមផ្លូវគ្រប់គ្នា។

នៅថ្ងៃខាងមុខប្រសិនបើសល់ចំណូលច្រើនគ្រប់គ្រាន់ ស្រ្តីអ្នកលក់ទឹកក្រូចស្រស់នេះចង់ទៅរស់នៅទីជនបទ ដោយបង្កើតការរកស៊ីជាអ្នកទិញស្រូវ បន្លែ ត្រី សាច់ផ្សេងៗ ដាំដោយធម្មជាតិរបស់ប្រជាកសិករ ហើយប្រមូលទិញដើម្បីជួយលើកកម្ពស់ផលិតផលខ្មែរ និងជួយឱ្យកសិករមានជីវភាពល្អប្រសើរជាងមុន៕

ដោយ៖ ថារី

Related Topics:អាជីវកម្ម