ឧត្តមសេនីយ៍ឯក ឌី វិជ្ជា៖ មេដាយ​ពី​ក្រសួង​សន្តិ​សុខ​ចិន មានការរួមចំណែកពីកងកម្លាំងទាំងអស់

ឯកឧត្តមឧត្តមសេនីយ៍ឯក ឌី វិជ្ជា ស្ថិត​នៅ​ក្នុង​ចំណោម​ឧត្តម​មន្រ្តី​កម្ពុជា ៣ រូប ដែល​ទទួល​បាន​គ្រឿង​ឥស្សរិយយស​ពី​ក្រសួង​សន្តិសុខ​សាធារណៈនៃសាធារណរដ្ឋប្រជាមានិតចិន។

ក្នុង​​សន្និសីទលើកទី១ របស់វេទិកាសហប្រតិបត្តិការសន្តិសុខសាធារណៈសកល (Lianyungang) តាមរយៈប្រព័ន្ធវីដេអូពីចម្ងាយ ក្រោមប្រធានបទ “កិច្ចសហការសន្តិសុខដើម្បីវិបុលភាពរួម” ក្រសួង​សន្តិសុខ​សាធារណៈនៃសាធារណរដ្ឋប្រជាមានិតចិន បាន​ផ្តល់​មេដាយអនុស្សាវរីយ៍មហាកំពែង​​ដល់​មន្រ្តី​ជាន់ខ្ពស់​កម្ពុជា​ ៣ រូប ដែលបាន​រួមចំណែក​ដល់កិច្ចសហប្រតិបត្តិការអនុវត្តច្បាប់អន្តរជាតិ សន្តិភាព និងស្ថិរភាពពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ ក្រោយ​​ទទួល​បាន​គ្រឿង​ឥស្សរយស​មេដាយប្រាក់ពីក្រសួង​សន្តិសុខសាធារណៈ​របស់ចិនមាន​ប្រសាសន៍​​​ថា ​ពិតណាស់ជាកិត្តិយសនិង​មោទកភាព​ដ៏ធំធេងសម្រាប់ខ្លួនខ្ញុំ ក៏ប៉ុន្តែមេដាយនេះបានមកក៏ដោយសារ​មានការរួមចំណែកមិន​អាច​កាត់ថ្លៃបាន ពីសំណាក់កងកម្លាំងនិងមន្ត្រីជំនាញពាក់ព័ន្ធ​ទាំងអស់។

ឯកឧត្តមឧត្តមសេនីយ៍ឯក ឌី វិជ្ជា ក៏ថ្លែងអំណរគុណដល់កងកម្លាំងនគរបាលជាតិ និងមន្ត្រីជំនាញពាក់ព័ន្ធដែល​បាន​ខិតខំ​បំពេញការងារ និង​ការ​ធ្វើ​​កិច្ច​សហប្រតិបត្តិការអនុវត្ត​ច្បាប់រវាងប្រទេសកម្ពុជា និងប្រទេសចិនសម្រេច​បានលទ្ធផល​ដ៏​ត្រចះត្រចង់​នាពេលកន្លងមកនេះ។

ជាមោទកភាពសម្រាប់រាជរដ្ឋាភិបាលកម្ពុជា ជាពិសេស​ក្រសួងមហាផ្ទៃ ដែលជាស្ថាប័នទទួលខុសត្រូវថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ ការទទួលបានមេដាយកិត្តិយសដ៏ថ្លៃថ្លានេះ ក៏​ការលើកទឹកចិត្តដ៏ខ្លាំងក្លាមួយបន្ថែមទៀត ដល់​សមត្ថកិច្ចអនុវត្តច្បាប់របស់កម្ពុជាទាំងមូល ក្នុងកិច្ចខិតខំអនុវត្តការងាររបស់ខ្លួនដើម្បីបម្រើដល់បុព្វហេតុជាតិនិងប្រជាជន។

ជាមួយគ្នា​នោះ​ដែរ ថ្នាក់​ដឹកនាំសន្តិសុខ​ជាតិ​កម្ពុជា​ពីរ​រូបទៀតក៏ទទួលបាន​មេដាយ​ពី​ក្រសួង​សន្តិសុខសាធារណៈនៃសាធារណរដ្ឋប្រជាមានិតចិន ក្នុង​នោះ​​សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង​ឯកឧត្ដម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ទទួលបាន “មេដាយមាសអនុស្សាវរីយ៍មហាកំពែង” (The Great Wall Commemorative Medal) ពីក្រសួងសន្តិសុខសាធារណៈនៃសាធារណរដ្ឋប្រជាមានិតចិន ។

មេដាយអនុស្សាវរីយ៍មហាកំពែងដែលផ្តល់ពី​ក្រសួង​សន្តិសុខសាធារណៈនៃសាធារណរដ្ឋប្រជាមានិតចិន គឺជាមេដាយកិត្តិយសថ្នាក់ខ្ពស់បំផុត សម្រាប់ផ្ដល់ជូនថ្នាក់ដឹកនាំបរទេសឈានមុខលំដាប់ពិភពលោក ដែលបានរួមចំណែកដល់កិច្ចសហប្រតិបត្តិការអនុវត្តច្បាប់អន្តរជាតិ សន្តិភាព និងស្ថិរភាពពិភពលោក៕