ព័ត៌មានជាតិ

សៀវភៅបច្ចេកទេសបណ្តាញទឹក បញ្ចូលគន្លឹះណែនាំអនុវត្តតាមស្តង់ដាត្រឹមត្រូវ

បានផុស

៣ years មុន

នៅ

ថ្ងៃអង្គារ ១៣ ធ្នូ ២០២២

ដោយ

ដោយមើលឃើញកង្វះខាតឯកសារ គួបផ្សំចង់ចែករំលែកចំណេះដឹងបន្ថែម គ្រូបច្ចេកទេសមួយរូបបានចងក្រងសៀវភៅបច្ចេកទេសបណ្តាញទឹក ដែលបានមកពីការសិក្សាស្រាវជ្រាវទុកជាប្រយោជន៍សម្រាប់ក្រុមជាងសំណង់និងជាប្រភពឯកសារយោងសម្រាប់សិស្សនិស្សិតស្វែងយល់បន្ថែម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហាំ គឹមហេង គ្រូបច្ចេកទេសនៅមជ្ឈមណ្ឌលបណ្ដុះបណ្ដាលការងារនិងសហគ្រិនភាព SOS សៀមរាបអង្គរ បានឲ្យកម្ពុជាថ្មីដឹងថា ការចងក្រងសៀវភៅនេះឡើង ដំបូងគ្រាន់តែដើម្បីបម្រើគោលដៅបណ្ដុះបណ្ដាលវិជ្ជាជីវៈដល់សិស្សដែលសិក្សានៅក្នុងមជ្ឈមណ្ឌលតែប៉ុណ្ណោះ។ តែដោយលោកធ្លាប់ធ្វើការមានបទពិសោធន៍ ហើយមើលឃើញពីបញ្ហាកើតឡើងច្រើន ដូច្នេះក៏រៀបចំចងក្រងសៀវភៅស្តង់ដាបច្ចេកទេសបណ្ដាញទឹក សម្រាប់ជាប្រយោជន៍ទុកជាចំណេះដឹងនិងសិក្សាស្វែងយល់បន្ថែម។

លោកបញ្ជាក់ថា ក្នុងសៀវភៅមានបង្ហាញពីបច្ចេកទេសតបណ្តាញទឹកតាមសំណង់អគារ និងលំនៅដ្ឋាន ក៏ដូចជាការជ្រើសរើសសម្ភារៈតាមខ្នាតរង្វាស់ត្រឹមត្រូវ។

«មានបញ្ចូលបន្ថែមដូចជាការគូរប្លង់ ការគិតសម្ភារៈ ការគណនាទំហំប្រើប្រាស់សម្ភារៈដូចជាទុយោទឹកស្អាត ទឹកក្តៅទឹកត្រជាក់ ទុយោទឹកភ្លៀង ទុយោបង្ហូរចោល រកមុខកាត់សមស្របតាមបរិក្ខារ ការគណនាអាងស្តុកទឹក ផ្ទះហ្នឹងគួរប្រើម៉ានអីម៉ាន និងផ្សេងៗទៀត»។

លោកបន្តថា តាមរយៈសៀវភៅនេះនឹងផ្ដល់ចំណេះដឹងមិនថាសម្រាប់ក្រុមជាងសំណង់ ក៏ដូចជាសិស្សានុសិស្សសម្រាប់ជាប្រយោជន៍ប្រើប្រាស់ផ្សេងៗ។

យ៉ាងណាមិញ គ្រូបច្ចេកទេសដែលមានបទពិសោធន៍បង្រៀន ៥ ឆ្នាំរូបនេះ ក៏មើលឃើញចំណុចខ្វះខាតសៀវភៅនេះក៏មិនទាន់ល្អឥតខ្ចោះនោះដែរ។ ជាមួយគ្នានេះ លោកក៏មិនបារម្ភថាការចែករំលែកចងក្រងសៀវភៅនេះឡើងអាចប៉ះពាល់ដល់អ្នកប្រកបមុខរបរឬក្រុមជាងសំណង់ផ្សេងៗ។ អ្វីជាគោលដៅលោកគ្រាន់តែចង់ចែករំលែកចំណេះដឹងបានមកពីបទពិសោធន៍និងការស្រាវជ្រាវឲ្យបានទូលំទូលាយថែមទៀតប៉ុណ្ណោះ៕