លោកស្រី ឱ វណ្ណឌីន បានស្នើឱ្យបងប្អូនប្រជាពលរដ្ឋ ពិសេសស្ត្រី មុននឹងសម្រេចចិត្តកែសម្ផស្សដោយវិធីណាក៏ដោយ គប្បីជ្រើសរើសសេវាកម្ម ឬផលិតផល ដែលមានទទួលស្គាល់ត្រឹមត្រូវ ចៀសវាងប៉ះពាល់ដល់សុខភាព និងបំផ្លាញសម្ផស្ស រហូតឈានដល់ដំណាក់កាល​មិនអាចកែខៃ​ឱ្យប្រសើរវិញបាន។

ក្នុងបទសម្ភាសមួយ ស្តីពី ការផ្តល់អាជ្ញាបណ្ណផលិតផលគ្រឿងសំអាង លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យនៃក្រសួងសុខាភិបាល មានប្រសាសន៍ថា សម្រាប់អ្នកដែលមានបំណងកែសម្ជស្ស គប្បីជ្រើសរើសសេវាកម្ម ឬផលិតផលកែសម្ផស្ស ដែលមានចុះប្រវេទន៍ទទួលស្គាល់ត្រឹមត្រូវ ជាមួយក្រសួងសុខាភិបាល។ ព្រោះកន្លង​មក មានបុគ្គលខ្លះ មិនសូវជាយកចិត្តទុកដាក់​នឹងសុវត្ថិភាព​នៃសេវាកម្មទាំងនេះប៉ុន្មានទេ ជាហេតុធ្វើឱ្យសម្ផស្សខ្លួនត្រូវបំផ្លាញ និងមិនអាចព្យាបាលឱ្យដូចដើមវិញបាន។

បើតាមប្រសាសន៍ អ្នកនាំពាក្យក្រសួងសុខាភិបាលរូបនេះ មានករណីខ្លះ អាចនឹងឃើញផលចង់បាន នៅដំណាក់កាលដំបូងៗ ក៏ពិតមែន ប៉ុន្តែក្រោយមក អាចនឹងមានអាការៈហើមជាំ និងវិវត្តទៅដំណាក់កាលមហារីកផងដែរ បើសិនជាការអនុវត្ត របស់សេវាកែសម្ជស្សនោះ ធ្វើមិនបានត្រឹមត្រូវ។ ហេតុនេះ លោកស្រីវេជ្ជបណ្ឌិត ស្នើឱ្យសាធារណជន ពិនិត្យឱ្យបានច្បាស់លាស់ មុននឹងសម្រេចចិត្តប្រើប្រាស់សេវាកម្ម ឬផលិតផលណាមួយ។

គួរបញ្ជាក់ថា ដើម្បីជូនជាដំណឹងដល់សាធារណជន ជៀសវាងការប្រើប្រាស់ផលិតផលមិនត្រឹមត្រូវ ដែលនាំឱ្យប៉ះពាល់ដល់ សុខភាព និងសម្ផស្ស ក្រសួងសុខាភិបាល តែងចេញផ្សាយជាហូរហែរនូវផលិតផល រួមទាំងឱសថ ក៏ដូចជាគ្រឿងសំអាង ផ្សេងៗ ដែលមិនបានយកមកចុះបញ្ជីការ និងប្រវេទន៍ត្រឹមត្រូវពីក្រសួងសុខាភិបាល៕