បណ្ឌិត គិន ភា៖ អ្នកព័ត៌មានអាជីព នឹងជួយទប់ ទល់ព័ត៌មានលាបពណ៌​ដោយប្រព័ន្ធផ្សព្វ​ផ្សាយក្រៅប្រទេស

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បានលើកឡើងថា អ្នកសារព័ត៌មានអាជីព នឹងរួមចំណែកទប់ទល់ព័ត៌មានលាបពណ៌​ដោយប្រព័ន្ធផ្សព្វ​ផ្សាយ និងអង្គការមិនមែន​រដ្ឋាភិបាលរបស់លោកខាងលិចមួយចំនួន ដែល​តែងតែផ្សាយខុសពីរូបភាពពិតនៃកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កន្លងទៅ និងបច្ចុប្បន្ន ជារឿយៗប្រព័ន្ធផ្សព្វផ្សាយ និងអង្គការមិនមែន​រដ្ឋាភិបាលមួយចំនួនដែលទទួលបានជំនួយពីក្រុមប្រទេសលោកខាងលិច គឺតែងតែព្យាយាមផ្សព្វផ្សាយព័ត៌មានមិនពិត ព័ត៌មានញុះញង់ និងការបំភ្លៃព័ត៌មាននានា ដែលខុសស្រលះពីស្ថានភាពពិតនៅកម្ពុជា ហើយបង្កឲ្យមានការភាន់ច្រឡំជាច្រើនចំពោះកម្ពុជា។

ថ្លែងក្នុងពិធីបិទសិក្ខាសាលាបណ្ដុះបណ្ដាល ស្ដីពីតួនាទីប្រព័ន្ធផ្សព្វផ្សាយ និងការបោះឆ្នោត នៅរសៀលថ្ងៃទី២៩ ខែធ្នូ លោកបណ្ឌិត គិន ភា បានលើកឡើងថា អ្នកសារព័ត៌មានអាជីពដែលទទួលបានការបណ្ដុះបណ្ដាលនេះ នឹងរួមចំណែកលើកកម្ពស់ការផ្លាស់ប្តូរជា​មូលដ្ឋានអំពី​​រូបភាពនៃប្រទេសកម្ពុជាដែលត្រូវបាន​លាបពណ៌​ដោយប្រព័ន្ធផ្សព្វ​ផ្សាយ ក៏ដូច ជាអង្គការមិនមែន​រដ្ឋាភិបាលរបស់លោកខាងលិចមួយចំនួនផ្សាយខុសពីរូបភាពពិតនៃកម្ពុជា។

បណ្ឌិត គិន ភា បន្ថែមថា អ្នកសារព័ត៌មានអាជីពដែលបានគោរពវិជ្ជាជីវៈ និងក្រមសីលធម៌ពិតប្រាកដ ក៏នឹងរួមចំណែកទប់ទល់ការបំភ្លៃព័ត៌មាន ព័ត៌មានភាន់ច្រឡំ ព័ត៌មានក្លែងបន្លំដោយចេតនា និងសេណារីយ៉ូផ្សេងៗដែលគេបង្កើតឡើងសម្រាប់របៀបវារៈនយោបាយ​នានារបស់មហាអំណាចមួយចំនួន។

ត្រង់ន័យនេះ លោកបណ្ឌិត បានគូសបញ្ជាក់ថា ការនាំយកការពិត សភាពការណ៍ពិត រូបភាពពិត និងសច្ចភាពអំពីប្រទេសកម្ពុជាទៅកាន់ប្រជាពលរដ្ឋ ក៏ដូចជាពិភពលោកខាងក្រៅ គឺនឹងធ្វើឲ្យមជ្ឈដ្ឋានខាងក្រៅបានស្គាល់កម្ពុជាកាន់តែច្បាស់ ដែលមិនដូចការផ្សព្វផ្សាយរបស់ក្រុមប្រឆាំងឡើយ៕

ដោយ៖ ធឿន​ វ៉ាន់សុង