លោក យន្ត មីន មានកូន៤រូប ជាមន្ត្រីតុលាការ មន្រ្តីខេត្ត និងជាមន្ត្រីប៉ូលីស-យោធា

លោក យន្ត មីន ដែលជាអតីតអភិបាលខេត្តព្រះសីហនុ បច្ចុប្បន្នកំពុងមានមុខតំណែងជារដ្ឋលេខាធិការក្រសួងការពារជាតិ។ លោក យន្ត មីន ត្រូវបានប្រកាសតែងតាំងជារដ្ឋលេខាធិការនេះ កាលពីអំឡុងឆ្នាំ២០១៩ ដែលមានឋានន្តរស័ក្តិជានាយឧត្តមសេនីយ៍ បន្ទាប់ពីលោកបានកាន់តំណែងជាអភិបាលខេត្តព្រះសីហនុ តាំងពីឆ្នាំ២០១៥ ហើយក៏ធ្លាប់មានតួនាទីជាមេបញ្ជាការតំបន់ប្រតិបត្តិការសឹករងខេត្តកោះកុង។

មិនទៅណាឆ្ងាយពីកិច្ចការរាជការ កូនប្រុសចំនួន៤រូបរបស់លោក យន្ត មីន ក៏កំពុងបម្រើការងារជាមន្ត្រីរដ្ឋដែលមានទាំងក្របខណ្ឌជានគរបាលជាតិ ជាមន្ត្រីយោធា ជាមន្ត្រីរដ្ឋបាលសាធារណៈ និងជាមន្ត្រីតុលាការ។ ខាងក្រោមនេះ «កម្ពុជាថ្មី» នឹងណែនាំឲ្យស្គាល់នូវកូនប្រុសទាំង ៤របស់លោក យន្ត មីន ថាតើមានតួនាទី មុខតំណែងអ្វីខ្លះនៅក្នុងកិច្ចការរដ្ឋ?

១/ លោក មីន មករា

លោក មីន មករា បច្ចុប្បន្នមានតួនាទីជាប្រធានសាលាដំបូងខេត្តកោះកុងដែលត្រូវបានតែងតាំងក្នុងឆ្នាំ២០១៧។ មុនការតែងតាំងនេះ លោក មីន មករា ធ្លាប់បានធ្វើជាមន្ត្រីចៅក្រម តាំងពីឆ្នាំ២០០៩ ហើយក្នុងឆ្នាំ២០១៥ លោកបានតែងតាំងជាអនុប្រធានសាលាដំបូងកោះកុង។ កម្រិតវប្បធម៌របស់លោក មីន មករា គឺបានបញ្ចប់ការសិក្សាសញ្ញាបត្របណ្ឌិតផ្នែកច្បាប់ នៅសាកលវិទ្យាល័យឥន្ទ្រវិជ្ជា បន្ទាប់ពីលោកបាន​សិក្សាសញ្ញាបត្រថ្នាក់បរិញ្ញាជាន់ខ្ពស់ផ្នែក​ប្រវត្តិសាស្ត្រ​ នៅ​សាកលវិទ្យាល័យ​ភូមិន្ទ​ភ្នំពេញ និងសញ្ញាបត្រថ្នាក់បរិញ្ញាបត្រចំនួនពីរ គឺបរិញ្ញាបត្រផ្នែកអប់រំនៅវិទ្យាស្ថានភាសាបរទេស IFL និងបរិញ្ញាបត្រផ្នែកច្បាប់​ នៅ​សាកលវិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច។

២/ លោក មីន កុម្ភៈ

នៅអំឡុងខែសីហា ឆ្នាំ២០២២ កន្លងទៅ លោក មីន កុម្ភៈ ដែលត្រូវជាកូនប្រុសរបស់លោក យន្ត មីន ត្រូវបានប្រកាសតែងតាំងជាអភិបាលរងខេត្តព្រះសីហនុ។ មុនការតែងតាំងជាអភិបាលរងខេត្ត លោក មីន កុម្ភៈ មានតួនាទីជានាយករងទីចាត់ការទំនាក់ទំនងសាធារណៈ និងសហប្រតិបត្តិការអន្តរជាតិនៃសាលាខេត្តព្រះសីហនុ។

៣/ លោក មីន រស្មី

លោក មីន រស្មី គឺជាស្នងការរងនៃស្នងការដ្ឋាននគរបាលខេត្តកោះកុង ដែលទទួលផែនការងារធនធានមនុស្ស។ លោក មីន រស្មី ជាអតីតនិស្សិតសិក្សាផ្នែកគ្រប់គ្រង នៅសាកលវិទ្យាល័យជាតិគ្រប់គ្រង រាជធានីភ្នំពេញ។

៤/ លោក មីន រតនៈ

លោក មីន រតនៈ គឺជាកូនប្រុសពៅរបស់លោក យន្ត មីន ដែលបច្ចុប្បន្នលោកមានតួនាទីជាស្នងការរងនៃស្នងការដ្ឋានបុគ្គលិក-បណ្ដុះបណ្ដាល នៃបញ្ជាការដ្ឋានអង្គរក្ស មានឋានន្តរសក្ក័ថ្នាក់ឧត្តមសេនីយ៍ទោ។ ជាមួយគ្នានេះ នៅខែវិច្ឆិកា ឆ្នាំ២០២២ កន្លងទៅនេះ លោកក៏ត្រូវបានតែងតាំងជាជំនួយការសម្ដេចតេជោនាយករដ្ឋមន្ត្រី មានឋានៈស្មើអគ្គនាយក បន្ថែមពីមុខងារបច្ចុប្បន្ន។ លោក ជាអតីតនិស្សិតថ្នាក់បរិញ្ញាបត្រផ្នែកគណនេយ្យ នៅវិទ្យស្ថានវ៉ាន់ដាគណនេយ្យ និងបរិញ្ញាបត្រភាសាអង់គ្លេស នៅវិទ្យាស្ថានភាសាបរទេស IFL។ លោក មីន រតនៈ ក៏បានបញ្ចប់សញ្ញាបត្រអនុបណ្ឌិតផ្នែក​គ្រប់គ្រង​ពាណិជ្ជកម្ម នៅសាកលវិទ្យាល័យជាតិគ្រប់គ្រងកាលពីឆ្នាំ២០០៩ ផងដែរ៕

ដោយ៖ ធឿន វ៉ាន់សុង