សម្ដេចតេជោស្នើបេក្ខជនបាក់ឌុបគួរជឿជាក់លើប្រព័ន្ធប្រឡងដែលរៀបចំដោយក្រសួងអប់រំ

សម្ដេចតេជោ ហ៊ុន សែន​ នាយករដ្ឋមន្ត្រីនៃកម្ពុជា បានអំពាវនាវដល់បេក្ខជនប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) គប្បីជឿជាក់ និងទទួលយកលទ្ធផលនៃការប្រឡងនេះដែលក្រសួងអប់រំបានរៀបចំប្រព័ន្ធដ៏ត្រឹមត្រូវ។ សម្ដេច តេជោ ហ៊ុន សែន បា​នថ្លែងអំពាវនាវបែបនេះក្នុងពិធីជួបសំណេះសំណាល និងផ្ដល់រង្វាន់លើកទឹកចិត្តដល់សិស្សជាប់និទ្ទេស A នៅព្រឹកថ្ងៃទី២ ខែកុម្ភៈនេះ។

ក្រោយការប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិជាផ្លូវការ មានបេក្ខជនមួយចំនួនបានតវ៉ាឲ្យមានការពិនិត្យឡើងវិញចំពោះវិញ្ញាសារដែលបេក្ខជនទាំងនោះចាត់ទុកថាមានភាពមិនប្រក្រតី។

ទាក់ទិនករណីនេះ សម្ដេចតេជោនាយករដ្ឋមន្ត្រី បានថ្លែងដូច្នេះថា៖ «អ្នកប្រឡងគួរផ្ដល់នូវជំនឿទុកចិត្តនៃប្រព័ន្ធប្រឡងរបស់ក្រសួងអប់រំ ហើយបេក្ខជនគួរគោរពនូវការសម្រេចនានាដែលមានប្រព័ន្ធមួយដ៏ត្រឹមត្រូវ និងមិនអាចក្លែងបន្លំបាន ទេ»។

សម្ដេចតេជោបានបន្ថែមថា មានបេក្ខជនខ្លះទៀតប្រឡងជាប់ហើយ ប៉ុន្តែគ្រាន់តែមិនទទួលបាននិទ្ទេស A ក៏មកតវ៉ាដែរ ដើម្បីបាននិទ្ទេស A ហើយបានមកជួប និងទទួលរង្វាន់ពីសម្ដេចផ្ទាល់។ តែយ៉ាងណាក្ដី សម្ដេចតេជោនាយករដ្ឋមន្ត្រី បានជំរុញឲ្យបេក្ខជនដែលបានប្រឡងជាប់ទាំងអស់ត្រូវខិតខំប្រឹងប្រែងរៀនសូត្របន្តបន្ថែមទៀត ដើម្បីក្លាយជាធនធានមនុស្សដ៏ពូកែរបស់ជាតិក្នុងនាមជាអ្នកបន្តវេននៃកម្ពុជា៕

ដោយ៖ ធឿន វ៉ាន់សុង